بعد الهجوم على سائق "التوك توك".. جيهان منصور: مش هتعرفوا "تخرسوا" الناس

استنكرت الإعلامية جيهان منصور، اتهام سائق "التوك توك" بالإنتماء إلى جماعة الإخوان المسلمين، بعد حديثه مع الإعلامي عمرو الليثي.

وقالت منصور في تدوينة عبر صفحتها الشخصية بموقع التواصل الاجتماعي "فيس بوك": "الهجوم الحاد على مواطن مصري سواق توكتوك قال رأيه في اداء الحكومة شيء غريب جدا، هو الناس دي عايشين في كندا ولا سويسرا!؟ وبعدين الناس المستغربين من انه شخص مثقف وبيسوق توكتوك، ماهو دي نتيجة متوقعة للفقر والبطاله والفساد، فالناس بتشتغل على توكتوك حضرتك عشان تعيش! مستغرب ليه حضرتك!؟".

وتابعت: "ماهو في زمن حملة الماجستير والدكتوراه مش لاقيين شغل! عادي تلاقي سواق التوكتوك خريج جامعة عشان يعيش!".

وواصلت: "الشغل مش عيب والراجل ماقالش حاجة غلط واسلوبه كان مهذب جدا، وكفايه تطبيل اعمى مش هتعرفوا تخرسوا الناس في الشارع وتخلوهم يقولوا الكلام اللي بيسمعوه في التليفزيونات بتاعتكم!".

وتحدث سائق "التوك التوك" بآسى عن تدهور حال مصر في السنين الأخيرة، بشكل جعل المشاهدين يتعاطفون معه.

وفي الفيديو قال السائق، لبرنامج واحد من الناس مع الإعلامي عمرو الليثي المُذاع على قناة الحياة: " نتفرج على مصر في التلفزيون نلاقيها فيينا، ننزل الشارع نلاقيها بنت عم الصومال".