هجوم عنيف لـ«رجال الشرطة» على «أديب» و«أبوهشيمة»

شنت صفحة « كلنا رجال الشرطة المصرية»، هجومًا عنيفًا على الإعلامي عمرو أديب ورجل الأعمال أحمد أبو هشيمة مالك قنوات «أون تي في»، بسبب ما وصفته بانتقاد «أديب» لبعض الأوضاع السيئة في البلاد، ومحاولته الترويج لعودة رجال «مبارك» لإثارة الشارع ضد الرئيس عبدالفتاح السيسي.

وكان «أديب» استضاف في أولى حلقاته في برنامجه «كل يوم» الذي يقدمه على فضائية «أون تي في» المملوكة لرجل الأعمال أحمد أبو هشيمة، وزير التموين السابق خالد حنفي، ورجال الأعمال الهارب حسين سالم.

كما دشن أديب مبادرة لحث التجار على تخفيض الأسعار 20% تحت شعار حملة «الشعب يأمر»، معتبرين أن ذلك محاولة منه لتهميش الرئيس والحكومة.

وقالت الصفحة في عدد من المنشورات: «عمرو أديب عامل حملة اسمها الشعب يأمر وبيطالب بتخفيض الأسعار من التجار ٢٠٪‏ عبر قناة أبو هشيمة.. هااايل وشكرا كمان.. السؤال: هل ممكن أبو هشيمه يخفض مبيعات الحديد وجميع منتجات مصانعه ٢٠٪‏؟ طيب هل ممكن عمرو أديب يتنازل عن ٢٠٪‏ من الملايين اللي بيقبضها من راتبه لصالح الغلابة؟ أتأمرون الناس بالبر وتنسون أنفسكم».

وتابعت في منشور آخر: «نفس اللى كان بيشتم إمبارح فى عمرو أديب علشان بيهيج البلد، بيمدح فيه النهاردة علشان حملة الشعب يأمر اللى هو متبنيها لتخفيض الأسعار !!! أنا بدأت أيأس فعلا إننا هانتعلم !! بدأت أيأس أننا امتى هنتعلم إن الثعبان مابيطلعش عسل من بقه.. وأن الغراب مابيعرفش يغنى !! وأن الشيطان عمره ما بيعظ الإنسان بحاجة تنفعه!!! امتى هانتعلم؟ مش عارف.. إمتى هانبقى راسيين ونفكر ومانبقاش خُفاف كلمه تجيبنا وكلمه تودينا ؟ مش عارف!!!، على العموم وجهة نظرى أن الحملة دى مشبوهة وهدفها إظهار الرئيس والحكومة بمظهر العاجزين الفاقدين للسيطرة!! فاكرينه مرسى هايركنوه ويعملوا إنهم هما اللى بيدوروا البلد !! اصحوا يا جماعة حرام عليكم ! مش الأقرع ده اللى يشتغلكم». .

وأضافت الصفحة التي يبلغ عدد متابعيها أكثر من 370 ألفًا: «أبو هشيمه اشترى قناة.. أبو هشيمة اشترى مذيع.. أبو هشيمة بيحاول يشترى شعب!! خدوا بالكوا واركنوا العواطف والتفكير الرومانسي على الرف شوية! اوعوا أبو هشيمة يشتريكم بهاشتاج ملوش قيمه !! ماتبقوش خنجر فى ظهر الراجل اللى واثق فينا ووقف معانا وأنقذنا من (كلاب البنا) الإرهابيين ومن خونة وعملاء الدولار اللي كانوا هيبيعوا الوطن مقابل الدولارات».

وقالت في منشور آخر نشرت عليه صورة تجمع «أديب» بـ«أبو هشيمة» في باريس: «عمرو جاعوره مع أبو هشيمة فى باريس وبعد كده يكلمونا عن الغلابة إللي واخدين توكيل يتكلموا عنهم ــــــــــــ! حد ينده لنا على انشراح».