تأييد "شون كونري" لـ"السيسي" يشعل الفيس بوك بالسخرية

تسببت إحدى الصفحات الإلكترونية المؤيدة للرئيس عبد الفتاح السيسي في موجة كبيرة من السخرية وذلك بعد الادعاء بأن بروفسير أمريكي يدعى "جون لويد" انبهر بمنطق "السيسي" في الدفاع عن قناة السويس.

وأرفقت الصفحة صورة للبروفسير المزعوم ، حيث تبين أن الصورة تخص الممثل العالمي "شون كونري" .

ونالت تلك التدوينة شهرة واسعة بسبب شهرة الصفحة التي تحوي نحو 3 ملايين مشترك.. وفيما يلي بعض التعليقات الساخرة التي وردت على الصفحة نفسها:

- نرجو الدقه في الخبر لو سمحتم عشان المصداقيه .. ده البروفيسور شون كونري عميد كلية فنون جميله جامعة ستانفورد.. مش كلية الزراعه.

- الناس اللي عمالة تتريق وتشكك في الكلام نسيتوا لما الريس حل مشكلة البطالة بعربيات الخضار .. وحل مشكلة الطاقة ب اللمبات الموفره ده غير صبح علي مصر بجنيه وسيبلها الفكة لو ممكن ومشروع المليون وحده سكنية والعاصمة الادارية الجديده وجهاز الكفته ..... هانسيب بقي كل الايجابيات دي ونتكلم في قناه ولا تفريعة .. انتوا بتتكلموا ف ايه بس يا جماعة؟

- اولا الي في الصوره جمب السيسي دا ممثل و مات كمان و اسمه شون كونري

ثانيا بقا هوا اوبما هيجيب عميد كلية الزراعه ليه عشان يتكلم في مشروع هندسي.

- أولا الراجل اللى ع الشمال ده ممثل اسمه شون كونورى sean connery

ثانيا لويد كريسماس ده اسم جيم كيرى فى فيلم غباء فى غباء dumb and dumber

أخيرا وليس اخرا ارحمو امنا بقا احنا بنعانى وانتو عاملين fake post علشان تمجدوه وتقولو قد ايه هوا عقليه خرافيه فعلا وبكل صدق حرام عليكم.

- الناس اللي الحقد مالي قلبها هما اللي بيشوفوا البروفيسور لويد على شكل الممثل الراحل شون كونري.. صفو قلوبكم من الحقد وانتو تشوفو..

- و انا بقول هوه شون كونري مختفي ليه الفترة اللي فاتت.. أتاريه وهب نفسه للعلم و بقى أستاذ في ستانفورد.

- ده فعلا البروفيسير لويد سميث وانا قابلته في امريكا كذا مرة بحكم عملي وليه اخ تؤام من الاب بيشتغل في السينما علشان كدة الامر مختلط عليكم والمقابلة حصلت بالفعل وكثير من المجلات العلمية اتكلمت عنها زي( ذاداي سفن_ وذاكونتري ) وجريدة (the Egyption today ) لكن نعمل ايه في حملات التشويه والتشكيك في سيادة الريس انتوا مش فاكرين لما حمر عينه للدولار خلاه بكام.