10 افكار ازاى تلبسي لون الروز باستيل المسيطر على الموضة السنة دى
دور الازياء اعلنت عن لون جديد و مميز فى موضة السنة دى و هو لون الروز باستيل ، و علشان تفضلى دايما على الموضة و تعرفى اخر اخبار الازياء فى المقال ده هتعرفى معانا ازاى تلبسى لون الروز باستيل بصور لافكار و ستايلات مختلفة تضميها لملابسك .البالطو قطعة ملابس مهمة واساسية خصوصا اننا داخلين على فصل الشتاء ، لكن معظم الوقت اختيار البالطو المناسب من حيث الشكل او اللون بيبقى مشكلة. جربى السنة دى تلبسي بالطو بلون الروز باستيل لانه بيليق على مجموعة متنوعة من الالوان زى الاسود و الابيض لكن ممكن كمان تجربيه مع مجموع من الالوان الناعمة او الهادية زى اللبنى الكريمى او الالوان النيود .بما انه احنا لسه فى فصل الخريف و ليه فى مساحة اننا نلبس هدوم خفيفية او صيفى ، ممكن تجربى تلبسي فستان صيفى متوسط الطول بلون الروز باستيل ، الحلو فى الفساتين انها ممكن تتلبس بشكل بسيط من غير تفاصيل كتيرة لكن بيطلع شكلها جميل وعلى الموضة، الفكرة كلها فى اختيار اللون. جربى يبقى فى دولابك على الاقل فستان واحد باللون ده .الجيبة الميدى بتفكرنا بموضة ازياء الخمسينات و بيبقى شكلها ستايل و على الموضة خصوصا لما بتتلبس فى المناسبات لانها بتدى لوك اليجانت و كلاسيك، ممكن تلبسي جيبة بلون الروز باستيل و تدخلى فيها تفاصيل باللون الاسود او اى لون تانى تفضليه .مع شوز مناسب ، تقدرى تلبسي تونيك طويل و هيبقى شكله مختلف وحلو لو بتحبى تلبسيه على بوت ، او ممكن تبدلى البوت بكوتشى او صندل لو بتحبى بقى ستايلك كاجوال اكتر ، او زى الصورة ممكن تلبسي تونيك بلون الروز باستيل مع بوت اسود برقبة عاليه علشان تعملى لوك شتوى و stylish .شوز صيفى بكعب عالى باللون روز باستيل لازم يبقى موجود فى دولابك، لانه اللون ده بيعتبر هو اللون المسيطر على الموضة السنة دى و هيقابلك هدوم و شنط و حتى اكسسوارات كتيرة باللون ده فانه يبقى عندك على الاقل شوز واحد من نفس اللون مفيد و هيكمل اى لوك تعتمدى فيه على اللون ده .تقدرى تعملى لوك كلاسيك مناسب للشغل بانك تلبسى بنطلون بلون الروز باستيل مع بلوزة من نفس اللون او درجه قريبة منه ، و عليهم بالطو و شوز كعب عالى بلون بيج او اى درجة تفضليها من الالوان النيود او الخفيفة . بالطريقة دى هتعملى لوك مناسب للشغل او المكتب و لكن كمان تريندى و على الموضة .مهما تكونى عاملة لوك بسيط و تكمليه بالاكسسوارات و الشنط لانها بتقدر تحسن اى لوك بشكل كبير ، يعنى لو معاكى الشنطة المناسبة هيبقى شكلك حلو جدا و بأقل مجهود. علشان كده مش لازم تبقى لابسه بالطو او جاكت غالى او شوز بكعب عالى مثلا علشان تبقى على الموضة ، ممكن بشنطة بسيطة بلون الروز باستيل تحولى اى طقم عندك لطقم تريندى جدا .السكارف طول الوقت بيعتبر اكسسوار حلو جدا و بيجمل اى لوك، حاولى تجربى تلبسى سكارف او كوفية بلون الروز باستيل مع جاكت او بالطو بنفس اللون فى الشتاء السنة دى لما الجو يبقى محتاج تلبسي سكارف او كوفية ، و جربىيهم على اكتر من طقم بالوان مختلفة . الجيبة الماكسى بتعتبر قطعة ملابس موجودة و دايما على الموضة و مابتقدمش، علشان كده لو بتحبى تلبسي جيبة ماكسى او بتعتمدى فى ستايلك على الجيبة جربى تلبسي جيبة بلون الروز باستيل و ادمجيها مع بلوزة بلون اللبنى الكريمى زى الصورة او اى لون تانى تفضليه .جربى كمان تختارى بلوفر بالستايل او القصة اللى تعجبك لكن يكون من لون الروز باستيل و كمليه بشنطة و شوز بلون فاتح مع جينز . و هتحسى اللوك بتاعك مختلف و مميز .
Comments