اعرفي معانا ازاي تعملي تقشير البشرة زي مراكز التجميل في البيت بمكونات طبيعية

تقشير البشرة من الحاجات المهمة جدا اللي بتحتاجها البشرة عشان ننضفها ونشيل كل الجلد الميت ونحافظ عليها نضرة وصحية, وتقشير البشرة في مراكز التجميل بيتعمل في اكتر من خطوة منها البخار, والتدليك, واستخدام الكريمات لكن طبعا الحاجات دي في مراكز التجميل بتبقى غالية اوي عشان كده احنا النهاردة جايبين لكل بنات حوا خطوات تقشير البشرة زي مراكز التجميل بالظبط تقدري تعمليها في البيت بنفسك وباستخدام مكونات طبيعية متوفرة في البيت ورخيصة.اول خطوة هنعملها هي تنضيف البشرة هنغسل بشرتنا والرقبة كويس جدا بالغسول المناسب لنوع البشرة عشان نشيل اي اتربة او اوساخ وبعد الغسيل ممكن نستخدم مزيل مكياج لو حاطين عشان يزيل او اي اثار مكياج من على البشرة.. تقدروا تشوفو من هنا افضل انواع غسول ومقشر البشرة.التقشير بيساعد على ازالة الجلد الميت من البشرة وبيجدد خلايا البشرة, بيكون بفرك البشرة بحركات دائرية بأطراف الصوابع ونركز اكتر حول الانف والجبين وعلى المناطق اللي فيها دهون زيادة, وبعدين نغسل البشرة كويس بالمية.. تقدروا تشوفوا من هنا وصفات طبيعية لتقشير الجلد.البخار خطوة مهمة جدا لانه بيفتح مسام البشرة وبيخليها مستعدة لاستقبال الماسكات والاستفادة بيها اكتر, حطي مية على النار وممكن تضيفي عليها اعشاب زي البابونج او البقدونس او ضيفي شرايح الخيار او الليمون وسيبي المية تغلي وبعدين ارفعيها من على النار وغطي راسك بفوطة وعرضي بشرتك للبخار لمدة 10 دقايق.الخطوة دي بعد ما جهزنا بشرتنا ونضفناها هنبدأ نحط اي ماسك على البشرة كلها ماعدا منطقة حوالين العين, ونسيبه من 10 – 20 دقيقة وبعدين نغسله.. ممكن تشوفو من هنا 5 ماسكات طبيعية لجمال ونضارة البشرة.اخر خطوة هتكون ترطيب البشرة كويس بالكريم المرطب المناسب لنوع بشرتك وحطي الكريم على البشرة كلها ومتنسييش الرقبة لاننا دايما بننساها في الماسكات او الترطيب حطي الكريم المرطب على الاماكن المكشوفة كلها.. اعرفي من هنا افضل انواع مرطب البشرة حسب نوع كل بشرة.– العسل من اكتر المكونات المناسبة للبشرة الجافة لانه يعتبر مرطب طبيعي, ممكن تستخدمي اي نوع عسل نحل تحطيه على البشرة وتسيبيه 10 دقايق وبعدين تغسليه بمية دافية, وممكن كمان تعملي زيت زيتون على البشرة بنفس الطريقة.– او تخلطي زيت الزيتون مع عسل نحل وخل بكميات متساوية وتحطيهم على البشرة وتسيبيهم لمدة 15 دقيقة, وبعدين تغسلي البشرة بمية دافية.الزبادي من الحاجات المفيدة جدا للبشرة والميزة فيه انه مناسب لاي نوع بشرة, حطي طبقة رقيقة من الزبادي على البشرة وسيبيها 10 دقايق على الاقل وبعدين اغسلي بشرتك ونشفيها ورطبيها.– الشوفان معروف انه مقشر وبيجدد البشرة, نطحن الشوفان في الخلاط لحد ما يبقى عندنا دقيق ناعم نضيف عليه مية لحد ما تتكون عندنا عجينة قوامها مناسب نحطها على البشرة ونسيبها عشر دقايق وبعدين نغسله.– وممكن تعجني دقيق الشوفان بمية دافية وتحطي عليه اضافات تانية زي النعناع او الريحان او الزعتر او اكليل الجبل, وكل الاضافات دي مناسبة لكل انواع البشرة, او نضيف ليمون او بقدونس للبشرة الجافة, او المرمرية للبشرة الدهنية.بذور الكتان غنية اوي بالاوميجا 3 المفيدة جدا لتجديد خلايا البشرة وبتحافظ عليها صحية, وهنعمله بطريقة بسيطة جدا هنجيب بذور الكتان ننقعها شوية في المية لحد ما نلاقي البذور حجمها كبر وطريت هناخدها نحطها على البشرة ونسيبها لحد ما ينشف وبعدين نغسله بمية دافية.بياض البيض فيه عناصر كتير بتساعد على تغذية وشد البشرة, هنحطه بس على البشرة لوحده من غير اي اضافات ونسيبه لحد ما ينشف وبعدين نغسله.من الحاجات المفيدة اوي كمان طين البحر الميت وهنلاقيه عند العطار, نجيبه ونعجنه بالمية لحد ما يتكون عندنا عجينة نحطها على البشرة ونسيبها لحد ما تنشف وبعدين نغسل البشرة.