حوار| إلهامي عجينة: كلنا حرامية "بس تيجي الفرصة"

بعد التصريحات المثيرة للجدل للنائب عضو مجلس النواب، إلهامي عجينة، عن غرق مهاجرين "رشيد" ووصفهم بالمنتحرين، وأنهم ليسوا شهداء، أجرى موقع "دوت مصر" حوارا مع النائب لتوضيح ما أطلقه من تصريحات.

هناك غضب بسبب تصريحاتك فما هو ردك؟

أضاف عجينة "الناس بتزعل من كلمة الحق ، أنا زعلان زي أي مواطن مصري زعلان علي إنسان مات، لكن إذا كان المواطن هو اللي مُصِر علي الموت".

"أولا أنا صرحت أن الحكومة عليها دور كبير في التقصير، لكن الأهالي أيضا عليها دور لأنهم هم من ألقوا بأنفسهم في التهلكة ودي الحقيقة، ويعني مثلا أنا راجل برمي الزبالة أمام منزلي وأرجع أقول أن الحي مُقصِر في عملة ومش جايب عمال نظافة، أيوة الحي واجب عليه أن يوفر عمال للنظافة، بس إحنا بردوا المفروض ما نلقيش بالزبالة في الشارع لأن احنا علينا دور كمواطنين هناك رجل أيضا له ابن غرق ثم وفر 50 ألف جنيه للأبن الأخر لكي يهاجر هجرة غير شرعية، وطالما أنت وفرت 50 ألف جنية يبقي مش مهاجر عشان هتموت من الجوع".

أنا كنت ببعث برسالتي مش للناس اللي غرقت وماتت لا أنا بوجهها للناس اللي لسه مُصِرة على السفر والموت، والناس عاوزانا نقول بقى دول غلابة وماتوا يا عيني ويا حرام، لا طبعا ده غلط وبكرة هيسافر غيرهم كتير ويموتوا لو فكرنا بمثل هذه الطرق".

لكن المهاجرون يقولون: نحن نسافر للبحث عن عمل.. ما رأيك؟

"هيشتغلوا أيه في أوروبا، هنا لو بحثوا هيلاقوا شغل أفضل من الشغل في أوروبا، وهيكسبو أكتر من المكسب في أوروبا، ويسألوا الناس المصريين في إيطاليا، آلاف المصريين في إيطاليا مش لاقيين شغل، كام واحد من اللي سافروا أوروبا نجحوا 2 أو 3% هم من نجحوا والباقي قاعدين هناك من أكتر من 15 سنة ومش عارفين يعملوا حاجة، الناس بتنظر للقلة ولا تنظر للغالبية من سافروا وفشلوا".

"الناس بتقول إزاي نائب ويقول على الناس الكلام ده، أه أنا بقول كدة عشان بقول الحق والناس غلطانين ومُصِر على كلامي إن كل من سافر غير شرعي غلطان لأن ده غير قانوني".

"إحنا بنغلط ونقول الحكومة فين، أه الحكومة عليها مُقصِرة وفوقها الطين والمفروض تراقب، لكن كمان الأهالي أخطؤوا لأنهم وافقوا على سفر أبنائهم بطريقة غير شرعية وغير قانونية، ودي جريمة في حق أبنائهم وحق أبناء مصر".

ما هي الوظائف الخالية لكي يتقدم لها الشباب بدل السفر والهجرة؟

"المناطق الصناعية في مصر مليئة بالوظائف الخالية، لكن الشباب عاوز يشتغل مدير أو وزير وعاوز يقعد على المكتب، وهو أصلا مسافر يغسل أطباق ويمسح بلاط ويبقي "مرمطون" ويبيع ليمون ولا جرايد في الشارع وكل الشغل ده متوافر عندنا في مصر".

ما رؤيتك لقضية الهجرة و ما هو الحل؟

"الحل هنا أن يتم القبض على كل السماسرة، تم عمل أمس قانون في اللجنة التشريعية عشان السماسرة والأهالي أيضا، لأن المفروض الأب يُحاسب لأنه سمح لابنه بالسفر سواء مات ابنه أو لم يمُت، لكي نضمن ألا تتكرر مثل هذه الحوادث مرة أخرى، وأن يقف الأب أمام ابنه ويمنعه من ارتكاب هذه الجريمة في حق نفسه أولا ثم في حق الدولة ثانيا، وده الحل الوحيد للقضاء على الهجرة غير الشرعية".

"بعض الناس بتقول عليهم شهداء، وده خطأ كبير لأنهم غير شهداء لأنه مسافر وعارف أنه بنسبة 95% هيموت، يبقي مش شهيد و"منتحر"، يعني أنا مثلا أروح أقف أمام القطار وأقول إني شهيد، والناس اللي تقدر توفر 50 ألف جنيه عشان يسافر كان ممكن يعمل مشروع هنا في بلده أفضل".

وكيف ترى تعامل الحكومة مع الموقف؟

"تعامل الحكومة مع الموقف سيء جداً، لأنه من المفترض أنه بمجرد علم الحكومة بهذه الكارثة التحرك وبقوة لإنقاذ الناس، لكن الحكومة للأسف الشديد لم تتحرك إلا بعد 3 أو 4 أيام لكي ينقلوا الجثث فقط، لكن من أنقذ الناس هم الصيادين بمراكبهم الصغيرة".

"حابب أوجه رسالة إلى الناس صاحبة مقولة أنا هنا ميت وهنا ميت، لا مش أنت الوحيد في مصر فقير، لا.. مصر كلها فقراء، بس مش كلهم قرروا الانتحار مثلك".

"أنا واحد من الناس سافرت إلى بلجيكا وأنا صغير ثم إلى هولندا وغسلت أطباق ومسحت بلاط و أتمرمطت، لو كنت عملت ده في بلدي كنت كسبت أكتر من اللي كسبته في أوروبا، بس للأسف الشاب المصري ميعرفش يشتغل كده في بلده بحجة الكسوف".