رواية "أفـيزيـا".. حينما يسرد الموتى سيرة الأحياء

تستعد دار اكتب للنشر و التوزيع ﻹصدار رواية “أفـــيزيـا.. حينما يسرد الموتى سيرة الأحياء” تأليف خالد زيدان.

"أمتصَّ غضبي وجعلني أُنْصِتُ له كتلميذة في مراجعة ليلة الامتحان. ردَّ: - دا مش حشيش دا "فُودُو"! وراح يدخن أول أنفاسه: - فودو؟! - بصي هو اللي جربوه بيقولوا حاجة خرافية تلات أنفاس منه بيدوكي تذكرة رايح جاي 20 دقيقة في عالم مُوازي.

أنتي مش عارفة أنا عملت إيه عشان أجيب السيجارة دي من "أفغاني" وبصراحة قلت مافيش أحلى من سيجارة فودو تبقى حفلة الوداع للدخان والسكة الشمال. - تقوم مجربها وأنت معايا وعلى طريق سفر! سيف وحياتي أرمي السيجارة دي! - أرمي إيه بس دي بتمن صباع حشيش وبصراحة خُفْت أشربها في الحفلة أطلع أخطف المايك من منير. لم أستطع تحمُّل الرائحة ففتحت النافذة التي بجواري، ليعترض هو مباشرةً - لا لا، اقفلي الجُوبّ هيطير.

- هاتخنق من الدخان! - يا فندم سعادتك تسندي راسك وأنا أفتح لحضرتك التكييف وأشغلك فيروز حبيبتك ودعينا نذهب سويا إلى حيث لا ندري.

- مالك؟ - هاها، لا ماتركزيش، باينه مفعوله بدأ وطلب معايا بعربية فصحى. - طب كفاية بقى وأرمي الهباب ده عشان أخرته سودا. - العرافة رؤى تتوقع نهاية دراماتكية لـسيف شهيد الفودو، كما توقعت له ارتفاع أسهم جهينه في عزّ ما السهم نازل. بمنتهى الثقة أجبت: - عمري نزلتلك سهم في البورصة؟ - مانا مستغرب، أنتي مخاوية يا بت؟ - مالكش فيه واطفي الزفت ده.

- آخر جُوبّ قُلنا. اعتدلْتُ في جلستي محاولةً التناسي والاستمتاع منتشيةً بعبق رائحة bavlgari برفيوم الذي يستخدمه سيف، ويتفاعل سكوني مع صوت فيروز. أغمضتُ عينَيّ وهاجرتُ بشرودي لبلاد الخيال حيث غدٌ أفضلُ معه، ولا أحد سواه. وقررت الخروج عن صمتي لأُقِرَّ: - إنت عارف إنك مجنون (لم أنتظر أي ردة فعل)، عمري ما فكرت إننا نتجوز عشان طول الوقت بتوَصَّلِّي إن أنت مش بتاع جواز أصلًا، ومع ذلك ماقدرتش أبطلك! استحملت كمان تحكماتك، أسلوبك، حياتك، علاقاتك، وحتى عطك! السبب؟ إني.. بحبك يا سيف.