القفص المصدي

"ليس هناك زوجة جميلة، وزوجة ليست جميلة.. ولا زوجة ذكية، وزوجة غبية.. ولكن هناك زوجة يحبها زوجها، وزوجة لا يحبها زوجها".. إحسان عبد القدوس.

كل زوجين حالة، مينفعش نطبق عليها نفس قاعدة الجواز، لكن في المجمل الناس اللي عاوزة تطلق مجموعتين:

المجموعة اللي بتندم بعد الطلاق، بتشوف إنه كان حل متهور لمشاكل يومية متكررة في بيوت كتير، إلا إن درجة حبهم قلت فاستسهلت الرحيل، وبعد ما تتصدم بالواقع تكتشف إنها خلقت مشاكل أسوأ، وتتمنى لو رجع بيها الزمن كانت فكرت تحل مشاكلها أو تقوّي الحب والعشرة بينهم، أو تتعايش بطريقة أخرى، لأنه لا يوجد حياة مثالية.

فيه مشاكل عادية لا تستدعي الطلاق.. خناقة على خروجة، مصروف البيت، أكلة اتحرقت، أختك قالتلي، أمك عادتلي، تمارين العيال أو مذاكرتهم، كل الروتين العادي اللي بيختلف من وجهة نظر آدم لحواء.

فيه أيام في الجواز بتعدي مملة، لا إنتو بتقربوا ولا إنتو تستحملوا البُعد، الملل هو صديق الزواج الأول، لذلك فكّري جيدًا، مش عشان تموّتي صرصار تولعي في المطبخ كله.

المجموعة التانية اللي بتدمر حياة بعض، بتطفيهم كل يوم زيادة، هم أقرب للموت من الحياة، عندهم مشاكل مستعصية، زي الخيانة المستمرة أو الضرب أو الإدمان أو البخل الفظيع، دول ستات لازم يكافحوا للحصول على حياة جديدة مع ناس تداوي القلب مش تحرقه.

عندي صديقة مرت بتجربة طلاق وعاشت فترة لوحدها، لحد ما قابلت راجل حبته واتجوزته، ومع كثرة المشاكل قررت تكلمني تاخد رأيي تتطلق ولا تكمل.

فسألتها إنتي عاوزة إيه؟ قالتلي بحبه.

وقفت أفكر أمام الإجابة.. ليه ست تحب راجل بيوجع قلبها؟ قالتلي أمه دعياله.

يمكن خايفة من الوحدة، ويمكن رغم كل عيوبه حضنه بيدفيها، في النهاية كل ست هي الوحيدة القادرة على ترتيب قائمة أولويات قلبها. 

بعد سنين جواز وخلفة وشوية صدمات في الحياة، الست بتبقى شايفة بوضوح تام هي عاوزة إيه من الدنيا.. عاوزة تكمل في جوازتها أو تاخد عيالها وتهرب من قفص الزوجية.  

بتحب شغلها أو عاوزة تغيّره أو عاوزة تبطل شغل أساسًا.

بتحب الشعر الطويل ولا القصير.

أهمية الأصدقاء والجيران والأهل والأنشطة الاجتماعية  في حياتها. 

كل شيء تقريبًا بيتغيّر بالوقت والتجارب، كل سن بداية جديدة بتعيد فيها الست أحداث حياتها، مضاف إليها نكهة النضج.

كان فيه قصة منشورة من أسبوع عن ست كانت بتعيط في المواصلات وبتتكلم بصوت عالي تتوسل لجوزها ميطلقهاش، ولما سألوها مالك انهارت وقالتلهم عندي سرطان وجوزي عاوز يطلقني.

الزوج الندل اللي اتخلى عن مراته في أكتر وقت محتاجاله فيه. 

الزوجة.. ليه بتتحايل عليه يفضل جنبها؟ محدش بيشحت من حد الحنية.