خاد فهمي يرد على مدير "المتاحف العسكرية" بعد حديثه عن حطين وعين جالوت

ندد خالد فهمي، أستاذ التاريخ بالجامعة الأمريكية بالقاهرة بتصريحات مدير المتاحف العسكرية اللواء أركان حرب، نجم الدين محمود، حول أبرز معارك الجيش المصري.

وقال في تدوينة عبر حسابه على موقع التواصل الاجتماعي "فيس بوك": “النهار دا صفحة برنامج "صباح الخير يا مصر" على يوتيوب ناشرة حديث شيق جدًا مع واحد لوا أركان حرب اسمه نجم الدين محمود إمام، ووظيفته مدير إدارة المتاحف الحربية، وواحد تاني اسمه إبراهيم جابر، وصفته منظم الجناح المصري بالقرية العالمية بدبي، المناسبة هي، وحسب مقدم البرنامج، اللي معرفش اسمه، إن الجناح المصري حاز مؤخرًا على المركز الأول من بين أكتر من خمسين دولة".

وتابع: "أنا بحثت على الموقع الرسمي للقرية العالمية عن الجائزة دي اللي مصر حققتها، لكن ما لقيتش أي حاجة عن الموضوع دا ولا عن أي جوائز مصرر حققتها أو أي دولة تانية حققتها، اللي لقيته إن القرية العالمية، ودي بالمناسبة مهرجان سياحي تسويقي سنوي بتعقده دبي وبيصل عدد زائريه ل٧ مليون سايح (من سنتين)، لسه ما اتفتحتش السنة دي، وإن تاريخ افتتاح موسم ٢٠١٦/٢٠١٧ هو من ١ نوفمبر ٢٠١٦ إلى ٤ ابريل ٢٠١٧".

وأضاف: "إنما الغريب إن المقابلة التليفزيونية دي تاريخها النهار دا، ٢١ سبتمبر ٢٠١٦، والحديث كله بيدور عن الجايزة اللي الجناح المصري حققها مؤخرًا، السؤال الأول بالتالي هو.. أنهي سنة الجناح المصري حقق فيها المركز الأول؟ ولو هي السنة دي، يبقى إزاي حصلت مصر على جايزة في مهرجان لسه ما اتفتحش؟ ولو الجايزة عن معرض السنة اللي فاتت، يبقى ليه برنامج "صباح الخير يا مصر" بيعرض المقابلة دي النهار دا وبيزعم إن الجايزة حصلنا عليها مؤخرا؟".

وواصل: "السؤال التاني، وبغض النظر عن التاريخ الصحيح لحصولنا على الجايزة (إن صح وجودها)، هو إيه علاقة المتحف الحربي بالجناح المصري في القرية العالمية؟ البرنامج بيشرح ويقول إن الجناح المصري السنة دي كان عبارة عن قلعة صلاح الدين، وبما إن القلعة تحتوي على المتحف الحربي، فقرروا التنسيق مع إدارة المتاحف الحربية ويبنوا مجسم للمتحف الحربي في الجناح المصري".

وذكر: "السؤال تحديدًا هو إيه علاقة المتحف الحربي بمهرجان تسويقي سياحي عالمي بيعقد في دبي؟ من ضمن كل مصادرنا السياحية اللي ممكن نسوق بيها للسياحة في مصر ونجذب السياح ليها، ليه نختار متحف حربي كمبنى أو أثر نظهر بيه تفرد مصر وغناها؟ الأستاذ إبراهيم جابر (اللي طلع متعهد تصميم وإقامة الجناح المصري في القرية العالمية على مدار الأربع أو الخمس سنين اللي فاتت) بيقول إن الغرض هو تعريف الأجيال الجديدة من المصريين اللي ساكنين في الإمارات على تاريخ بلدهم، لكن لو صح الكلام دا يبقى من حقنا نتساءل، مرة تانية، هو توعية المصريين المغتربين بتاريخ بلدهم بيتم عن طريق جناح في مهرجان تسويقي؟ ولكن الأهم من دا، هو من امتى تاريخ الجيش بقي مرادف لتاريخ مصر؟".

وأردف: "السؤال الثالث، إزاي سياتوا نجم الدين محمود إمام بيشغل منصب مدير إدارة المتاحف الحربية؟ السؤال نابع من معلومات تاريخية قالها سياتلوا في مجال تخصصه تنم على إنه غالبًا جاي من كوكب تاني أو إنه بيسرد حقائق عن تاريخ جيش تاني غير تاريخ الجيش اللي بيدعي إنه بيحكي عنه، فمثلاً (في الدقيقة ٣١:١٦) بيقول إن من أهم معارك الجيش المصري عبر العصور "معركة حطين اللي خاضها الملك رمسيس الثالث ضد الحيثيين".

واستطرد: "معركة حطين يا سياتلوا كانت بين صلاح الدين الأيوبي والصليبيين سنة ١١٨٧ ميلادية، وغالبًا سياتك قصدك معركة قادش حوالي سنة ١٢٧٤ قبل الميلاد (يعني فرقت معاك بـ ٢٤٦١ سنة) اللي خاضها الفرعون رمسيس التاني (مش الملك رمسيس الثالث) ضد الحيثيين، سياتلوا كمل وقال إن تاني أهم معركة خاضها الجيش المصري في تاريخه الطويل كانت "معركة عين جالوت بين صلاح الدين الأيوبي والصليبيين في بيت المقدس، وانتهت بتحرير بيت المقدس".

وأكمل: "معركة عين جالوت يا سياتلوا كانت بين المماليك بقيادة سيف الدين قطز والمغول بقيادة كتبغا سنة ١٢٦٠، وما انتهتش بتحرير بيت المقدس إنما بإيقاع أول هزيمة للمغول وحماية مصر من الانهيار، سياتلوا بعد كدا أتحفنا في حقيقة ثالثة وهي إن المعركة الثالثة الفاصلة اللي خاضها الجيش المصري كانت "معركة نزيب البحرية بقيادة إبراهيم باشا، الإبن الأكبر لمحمد علي، اللي بيعد من أكبر القادة العسكريين للآستانة، وانتهت بانتصار القوات المصرية"، معركة نزيب (نصيبين) يا سيتلوا ما كانش لها علاقة بالبحر، المعركة دي كانت معركة برية دارت رحاها جنوب الأناضول بين الجيش المصري بقيادة إبراهيم باشا وبين جيش الآستانة بقيادة حافظ باشا ومساعده الألماني فون مولتكه، ودا كان في يونيو ١٨٣٩".

وروى: "سياتلوا كمان قال (الدقيقة ٩:٤٨) “في شهر فبراير من كل عام بيتم إقامة معرض واحتفالية عالمية في مسرح الجلاء تبرز دور القوات المسلحة المصرية في دعم دول الحلفاء في الحرب العالمية الأولى، السؤال هنا لسياتلوا.. أنهي قوات مسلحة مصرية تقصدها سياتك؟ الحرب العالمية الأولى جرت بين سنة ١٩١٤ وسنة ١٩١٨، وفي السنين دي ما كانش فيه قوات مسلحة مصرية من الأساس، وبالتالي الزعم بإن القوات المسلحة المصرية ساعدت الحلفاء في الحرب العالمية الأولي يشبه موقف عادل إمام في مسرحية شاهد ما شافش حاجة لما اشتكى لكالابالا، الأرنب بتاعه، إن فاتورة التليفون جات له وفيها مكالمات زيادة بـ١٨ جنيه، مع إنه ما عندوش تليفون أصلاً".

وأوضح: "مصر وقت الحرب العالمية الأولي كانت خاضعة للاحتلال العسكري البريطاني، والقوات المسلحة اللي كانت موجودة في مصر كانت قوات بريطانية يرأسها جنرال بريطاني اسمه ج. ماكسويل، لو سياتلوا عنده اسم القائد المصري اللي كان رئيس هيئة أركان القوات المسلحة المصرية أو القائد العام للقوات المسلحة المصرية فيا ريت يقول لنا عليه، بغض النظر عن التفاصيل دي، فيديو الحلقة رائع الصراحة ومعبر تعبيرًا دقيقًا عن حال كل من التليفزيون المصري والقوات المسلحة المصرية".

واختتم: "لقطتين دالتين تجُب في دلالتهما كل ال سياتلوا قاله، اللقطة الأولى في الدقيقة ١٣:١٢ لما الضيف الكريم، إبراهيم جابر، قال إن هدف المعرض كان توعية الأجيال المصرية اللي عايشه في الخارج زي "الابن الوحيد اللي ما بيخشش السجن" وبعدين تدارك زلة اللسان وقال "الجيش"، اللقطة التانية في الدقيقة ٢٩:١٥ لما فجأة وفي ظهور مفاجئ بنشوف قطة مشمشي سارحة في الخلفية".