المحتوى الرئيسى

للسفر 7 فوايد.. أهمها المصيف

09/16 11:14

كلنا بنستنى المصيف من السنة للسنة، لأنها من الأحلام الخفيفة الممكنة التحقيق، شوية أيام جميلة في حر الصيف كفيلة إنها تحوّل مودنا من النقيض للنقيض، كفاية قعدتنا قدام البحر بالساعات، سواء الصبح والشمس طالعة ومنورة الدنيا، أو بالليل ونسيم البحر بيلاعبنا بهواه اللى بيدخل للروح على طول.

خدنا الأجازة خلاص من الامتحانات والدروس وابتدينا نفكر هنروح فين، هناخد إيه معانا يناسبنا؟ هل هنقابل قرايبنا ولا الموضوع مقتصر على أسرتنا الصغيرة وبس؟

نبتدي مع بعض واحدة واحدة عشان نرتب أفكارنا سوا.

سؤال عظيم جدًا إجابته في منتهى السهولة. حسب إمكانية رب الأسرة هنروح، كل شواطئ مصر حلوة الحمد لله، وفيها جميع المستويات، من الساحل الشمالي وشرم الشيخ والغردقة إلى مستوى الطبقة المتوسطة من إسكندرية والعجمي وراس البر، إلى ما دون ذلك، كله موجود ومتوفر وعلى أد إيد المواطن المصري العادي خالص، وبتختلف من إنك تمتلك شقة أو شاليه في مكان من اللي قلنا عليهم أو لأ، بس حتى لو مش بتملك فالحل موجود ومتوفر وحسب إمكانياتك هيتم التأجير، حسب الميزانية الموضوعة قبل كده عشان نبقى على نور ومنتفاجئش.

سؤال مهم جدًا، لأن فيه أسر بتحب تروح كاملة (جدة وأولادها وبناتها وأحفادها) وفيه أُسَر صغيرة بتحب تروح مع نفسها، كل واحد حسب الراحة النفسية اللي بتخلينا نتواصل مع الآخرين.

سؤال مهم برضو، لأن ساعات بناخد حاجات مش بنحتاجها وحاجات محتاجينها بس مجاتش في تفكيرنا فبننساها، يا ريت نظبط ده من قبل السفر بفترة، عشان مننساش حاجة ومودنا يتغير للأسوء.

لو إنتم أسرة من أربع أفراد مثلاً هيبقى الموضوع اعتيادي، يعني مثلاً هتبقى شنطة واحدة للأب والأم، هيتحط فيها كل شيء خاص بيهم، من ملابس داخلية، ملابس خروج (يا حبذا التقليل لأن ممكن تعملوا شوبينج في أسواق البلد)، ملابس بيت للنوم أو القعاد بيجامة مثلاً، اختاري ليكي ولزوجك ملابس قطنية منعًا لأي تعرق أو زهق.

أما عن أطفالك، لو فيهم مثلاً طفل رضيع فشنطته معروفة، وهي اللى بتاخديها كل مرة وإنتي رايحة عند ماما، لأن طبيعي فيها كل مستلزماته اللي متعودة عليها من لبن وحفاضات وهدوم خروج وهدوم داخلية ولعب ومناديل.. كله كله. ولطفلك الأكبر خدي طقمين خروج (متنسيش الشوبينج) وبُرنُس بحر وأطقم داخلية قليلة برضو زيكم بالظبط.

كمان متنسيش الصن بلوك، وليكن أي نوع حسب إمكانياتك وبشرتك، وده عشان وشك واللي هيبان من جسمك إنتي وزوجك وأطفالك ميتأثرش بتغيير تأثير الشمس مع المية المالحة والهوا المليان يود، إلا بقى لو ناوية تعملي تان للون بشرتك، بس برضو بدون الكريمات الخاصة بالتان مش هينوبك إلا بعض حروق وخلاص، يبقى متنسيش الصن بلوك منعًا لأي ضرر محتمل.

في حالة إن إنتم أصحاب الشقة أو الشاليه

يبقى لازم تزوديه من تموين البيت، من زيت لسكر لرز ومكرونة ولحمة وفراخ وجبن، الحاجات الطبيعية في أي بيت، مع إن أكل برة موجود ومتوفر بكثرة، لكن الواحد ساعتها بيحن -سبحان الله- لأكل ماما، كمان لتوفير نفقات الأكل برة، لأن أيام المصيف بتبقى الأسعار مبالغ فيها .. فده حسب تعوّدك وإمكانياتك زي ما قولنا.

أهم أخبار مرأة

Comments

عاجل