المحتوى الرئيسى

فسح في القاهرة من غير ما تخرب الميزانية

08/26 09:12

أين تخرج بأطفالك في القاهرة بدون ما تخرب الميزانية؟

سألتني صديقة مقيمة برة مصر بقالها سنين، عن الفسح اللي ممكن تفسحها لبنتها أثناء إقامتها في مصر لمدة ثلاث أسابيع، وهتتكلف قد إيه، لما بدأت أقولها على الأماكن المشهورة وحسبتلها هتتكلف قد إيه لقينا إننا بنتكلم في حوالي ثلاث آلاف جنيه فسح داخل القاهرة لوحدها، من غير المصيف، لو فسحتها مرتين في الأسبوع، والباقي اكتفوا بالزيارات العائلية. فبدأت أفكر معاها في الفسح اللي جربتها مع الأولاد وكانت اقتصادية وغير مكلفة التكاليف الجنونية اللي بندفعها.

شارع أبو بكر الصديق، مصر الجديدة

التذكرة تتراوح بين ٢٠ و٣٥ حسب النشاط والفئة العمرية، مواعيد العمل (المتحف من ٩-٢ والحديقة لحد ٦ مساءً). 

أنا رحت متحف الطفل مرتين مع "كوكو" و"حسن". مرة عشان نحضر حفلة شخصيات فروزن نظمها ناس من خارج المتحف، ودي كانت سيئة جدًا جدًا، ومرة رحنا العروض اللي أُقيمت من ضمن فاعليات مهرجان الطبول ودي اتبسطنا أوي، ويومها دخلنا المتحف نفسه و"كوكو" اتبسطت جدًا. الخلاصة المتحف نفسه جميل ومناسب من سن خمس سنوات، والجنينة جميلة جدًا ومناسبة لكل الأعمار، أما الفاعليات اللي بتُقام على أرض المتحف محتاجة شوية تدقيق، يعني تكوني رايحة لحد عارفة إنه بيعمل فاعليات حلوة ومنظمة. وأحسن حاجة تروحي من بدري عشان تلحقي المتحف، هتلاقي كافيتريا بسيطة بتعمل شاي وعصير وساندويشات بأسعار معقولة، وحوالين المتحف مطاعم بتوصل دليفري جوة المتحف عادي. 

التذكرة بـ١٠ ج أو اشتراك سنوي ٨٠ ج،قاعة القراءة مفتوحة لحد ٦عصرًا والنشاطات في المكتبة لحد الساعة ٢ لو فيه عدد من الأطفال في المكتبة، المكتبة نفسها فيها نادي سينما وكورسات لغات ونظام حساب الـUCMAS وموسيقى ورسم، وكلها بأسعار مدعمة عن برة بمراحل. قاعة القراءة دي لو قعدت أشعر فيها من هنا لبكرة مش هوفيها حقها، كتب في كل المواضيع وقصص وموسوعات علمية مبسطة عن كل حاجة موجودة في الوجود، دورت على كتب بتتكلم عن كيفية تعامل الطفل مع مشاعره السلبية من خوف أو غضب أو غيرة ولقيت، دورت على كتب أعمال فنية ولقيت، دورت على قصص بالفرنساوي ولقيت، دورت على قصص دينية مبسطة ولقيت، دورت على تجارب علمية ولقيت. مكتبة موسوعية شاملة من عمر سنتين لعمر ١٦ سنة. نفس المكتبة موجودة في مصر الجديدة في ش العروبة تحت اسم مكتبة مصر الجديدة العامة. 

التذكرة بـ١٥ ج فوق سن الثلاث سنوات، مسرح العتبة قريب جدًا من المترو وعروضه شغالة طوال الصيف وأجازة نصف العام. 

دايمًا بيبقي فيه عروض وحفلات للأطفال شهريًا، والأسعار تتراوح من ٢٠-٥٠ ج. تابعي الجدول الشهري للساقية هتلاقي عروض مسرح عرائس الساقية، وهي مناسبة لسن ٤-٧ سنين لأنها بتبقى حواديت بسيطة وقصيرة ومباشرة جدًا في الوعظ الأخلاقي، فمناسبة للفئة العمرية الصغيرة دي. 

برضو أسهل طريق المترو، في خط المرج حلوان محطة مترو مارجرجس، تنزلي ناحية المتحف القبطي، وبالمرة ممكن لو الأطفال في سن كبيرة تدخلوا المتحف القبطي ومجمع الأديان ومسجد عمرو بن العاص. في سوق الفسطاط نفسه هتلاقي ورش أسبوعية وعروض مجانية في الويك إند مناسبة لكل الأعمار، سعر الورشة بيبقى غالبًا ٥٠ ج، ده غير المعارض والأعمال الفنية العظيمة المعروضة في السوق. 

لو كنتي مش مشتركة في نادي أو زهقتوا من النادي بتاعكم، النادي السويسري اختراع عظيم، مراجيح ومكان هادئ في الظل وأسعار الكافيتريا معقولة جدًا مقارنة بجودة الأكل، وتذكرة الدخول بـ١٠ ج، مكان لطيف لقضاء اليوم، وممكن كمان تجيب أدوات فنية وألوان مياه والأطفال يفرشوا على النجيلة ويرسموا. 

7- بيت السحيمي في شارع المعز: 

كل جمعة فيه ورش مجانية للأطفال من الساعة ١-٤، وهو شارع المعز لوحده فسحة ومتحف مفتوح في الشارع، الأطفال هيشوفوا الفلكلور والبيوت القديمة والشرطة الخيالة وبزارات التراث الشعبي، ولما يتعبوا أو يزهقوا من المشي اتجهوا لبيت السحيمي وشوفي العروض المتاحة في الوقت ده والورش الفنية، مهم توصلي في الميعاد لأنه بالمجان فالأولوية بأسبقية الحضور. 

نيجي بقى للجناين، القاهرة مليانة جناين وأنا شخصيًا فسحتي المفضلة هي الجناين، الأولاد يبقى عندهم مساحة للجري وافتراش النجيلة واللعب بالعجلة أو الكورة ولم أوراق الشجر والتسلق. كل فترة آخد "كوكو" على جنينة ونجيب ملاية ونقعد على الأرض نعمل حفلة شاي وساندويشات ونقعد نتكلم في كل حاجة مع بعض.

جنينة الأورمان: رحتها في حفل خيري أقامته "ألوان وأوتار"، طبعًا الحفلة كانت منظمة وكان فيه نشاطات كتير للأطفال، لكن حتى من غير النشاطات دي الجنينة جميلة جدًا ويتعمل فيها كل حاجة.

تذكرة من ست سنوات ٣٠ ج، وفيه أنشطة بتذاكر تتراوح من ١٠-٣٠ج، أنا شخصيًا مش بحب المكان عشان ممنوع العجل والسكوتر بكل أنواعه، وكل الفاعليات اللي حضرتها كانت غير منظمة وهادفة للربح من الأكل بدون الاهتمام بالتفاصيل، لكن من غير حضور الفاعليات فهي متنفس طبعًا لسكان القاهرة الجديدة والمراجيح اللي فيها حلوة أوي. 

حديقة الأسماك: لطيفة جدًا وكلها زهور وسلالم للتسلق، فضلت أطلع مع الأولاد لحد ما وصلنا لأعلى نقطة في الجنينة كاشفة الزمالك كلها، و"كوكو" هاصت في أشجار الورد ومنطقة ألعاب الأطفال جميلة جدًا وأرضها رمل، وده في حد ذاته لعبة بالنسبة لـ"حسن"، ممكن أصلاً تروحوا بأدوات البحر. بس الحقيقة قعدت أدور على أسماك ملقتش خالص. 

حديقة الأزهر: سعر الدخول للكبار ١٠ جنيهات وللأطفال أكبر من ٤ سنين ٧ جنيهات. حديقة الأزهر فيها الحل العبقري بتاع فسحة للكبار والأطفال مع بعض، أولاً فيها مطاعم جميلة جدًا وكمان منطقة ألعاب الأطفال مش بطالة ومساحات النجيلة الشاسعة، ده غير بقى الأهم إن ممكن تظبطي الخروجة مع يوم فيه حفلة ظريفة في مسرح الجنينة، مسرح الجنينة مسرح مفتوح في الهواء ومرحب بالأطفال، غالبًا على ما بنوصل لتوقيت الحفلة الأولاد بيناموا وبسمع الحفلة في هدوء، ولو حتى كانوا صاحيين ممكن تقعدوا في الصفوف الخلفية وتديهم مساحة يفركوا من غير ما يزعجوا حد.

أهم أخبار مرأة

Comments

عاجل