وائل غنيم: الخرافات و"الفهلوة" لن تبني مصر

قارن الناشط السياسي وائل غنيم، بين مصر والولايات المتحدة الأمريكية في التعامل مع الأبحاث العلمية والأنشطة السياسية.

وذكر غنيم في تدوينة مطولة عبر صفحته الشخصية على موقع التواصل الاجتماعي "فيس بوك"، بعض الأمثلة بدأها بالقول: "على اليمين، أشرف البنداري، مخترع الوحش المصري، أول مركبة تسبح وتطير وتسير على الطرق الأسفلتية. انتهى الوحش المصري غرقا بعد أن ألقاه أشرف في ترعة القليوبية، على الشمال، إيلون ماسك، المخترع الأمريكي المهاجر من جنوب أفريقي، وتحته صورة ماكيت لاختراع الـ "هايبر لووب"، اللي هيبقى نقلة تاريخية في عالم المواصلات. ومن المتوقع إنه يوصل مدينتي سان فرانسيسكو ولوس أنجيلوس بقطار فائق السرعة بيوصل المسافرين في 30 دقيقة. (المسافة بين المدينتين ٦٠٠ كيلو متر يعني زي من القاهرة للاقصر). حاليا بيتم تجربة أجزاء من القطار في صحراء نيفادا الأمريكية".

وأضاف: "على اليمين اللواء إبراهيم عبدالعاطي، مخترع علاج الإيدز وكافة أنواع الفيروسات، اللواء اختفى في ظروف غامضة بعد إعلانه عن أهم وأخطر انجاز طبي في تاريخ البشرية بدون حاجة لأي أبحاث علمية. على الشمال، العالم الأمريكي دوج ميلتون، اللي معمله في هارفارد وصل لواحد من أهم الاكتشافات اللي "قد تؤدي لعلاج مرض السكر من النوع أ". مش عارف طايرين بيه وهو لسه في مرحلة نشر أبحاثه، ومش فاهم ليه معملش مؤتمر صحفي أكد فيه إن نسبة العلاج هيبقى 100%. وليه ماأهداش الأبحاث اللي عملها للرئيس أوباما وسيادة وزير الدفاع الأمريكي".

وواصل: "على اليمين، ليليان داوود، مذيعة لبنانية كانت متزوجة من مواطن مصري وعندها طفلة مصرية الجنسية، كانت بتقدم برنامج سياسي في مصر. تم طردها من مصر بعد دقائق من انهاء تعاقدها، وإمعانا في إهانتها مشيت من البلد من غير حتى شنطة هدومها ومن غير ما تعرف هتشوف بنتها ازاي. على الشمال، تريفور نوح، مواطن جنوب أفريقي، أصبح المقدم الأساسي لبرنامج "العرض اليومي" بتاع جون ستيوارت بعد اعتزاله. تريفور كل يوم بيتريق على الأمريكان وسياسييهم وبيهزأ ترامب وكلينتون، وبيتريق على سياسات أمريكا الخارجية، وأجهزتها السيادية. والأغبياء لسه مطردوهوش، وسايبينه يقدم على الجنسية الأمريكية".

واستطرد: "في اليمين، آية حجازي، خريجة القانون من جامعة جورج ماسين الأمريكية، واللي رجعت مصر بعد الثورة عشان تفتح دار لرعاية أطفال الشوارع لإنقاذهم من مصير الإجرام المحتوم. آية مسجونة بقالها أكتر من تلات سنين والقاضي لسه بيأجل في القضية بدون أي حكم. على الشمال، زينب سالبي، مواطنة أمريكية من أصل عربي، وخريجة نفس الجامعة اللي اتخرجت منها آية. زينب تم تكريمها رسميا من عشرات المؤسسات الرسمية والأهلية بسبب جهودها لتخفيف آلام الحرب على مسلمي البوسنة والهرسك. المنظمة الخيرية اللي بدأتها زينب جمعت أكتر من ١٠٠ مليون دولار أمريكي تم صرفهم على أكتر من ٤٠٠ ألف عائلة بوسنوية بعد انتهاء الحرب هناك في التسعينيات".