المحتوى الرئيسى

شريف عازر يكتب: هو إيه الفرق بين الكمين الحقيقي والمزيف؟

08/23 10:19

“هو إيه الفرق بين الكمين الحقيقي والمزيف؟”، ده كان تعليق صديقة على خبر إلقاء القبض على كمين شرطة مزيف في شارع القصر العيني بوسط البلد القاهرة. التعليق بالرغم من سخريته إلا أنه بيسأل سؤال جوهري فعلا يستحق التفكير:

يا ترى إيه الفرق بين كمين الشرطة الحقيقي وبين الكمين المزيف؟

فيه أكتر من نقطة للإجابة عن السؤال ده.. طبعا الرد الطبيعي هو إن الكمين الحقيقي بيكون تابع لوزارة الداخلية، بينما المزيف هو مجموعة من النصابين.

طيب، أنت كمواطن عادي راكب عربيته واتثبت في كمين، إيه اللي يثبتلك إن الكمين ده تابع لوزارة الداخلية؟ يعني هل مثلا بتسأل الناس اللي واقفة في الكمين يخلوك تشوف كارنيهاتهم؟

طبعا في بلدنا دي، لو سألت الظابط عن الكارنيه بتاعه، يبقى أنت يا مجنون يا مستبيع يا عندك واسطة كبيرة أوي! فطبيعي إن المواطن العادي يستسلم للكمين مفترضا إن مفيش حرامية ممكن تعمل نفسها “كمين” في شارع القصر العيني (اللي هو على بعد خطوات من وزارة الداخلية)! بس المشكلة بقى إنه حصل فعلا، والمواطن الطبيعي وقع في الفخ من غير ما يكون عنده اختيار أصلا إنه يتحقق من صحة الكمين!

من المتعارف عليه دوليا وقانونيا إن الشرطة بتلبس يونيفورم محدد ومميز، والزي ده المفروض يكون فيه اسم الظابط ورتبته، لكن من المتعارف عليه في بلدنا إن اللي بيبقوا واقفين في الكمين، بيبقوا لابسين مدني! مع إنهم شرطة بجد يعني، بس لسبب لا نعلمه قرروا يلبسوا مدني! طبعا كون إنهم ماسكين سلاح ده مش مقياس خالص على إنهم حقيقيين، لأنك زي ما أنت مش حتقدر تشوف كارنيهاتهم، فأكيد مش حتسألهم على ترخيص سلاحهم يعني!

آدي كمان عندك حتة إنهم شايلين سلاح دي، تمشي حقيقي ومزيف، لأن سهل جدا تجيب سلاح وتقف بيه في الشارع،والناس تفترض إنك شرطة.

ثالثا: لو قلنا إن معاهم عربية بوكس مثلا، في حالات كتير شفنا كماين حقيقية مافيهاش عربيات بوكس وفيها عربيات ملاكي عادية.. يعني كون إن مش معاهم عربية بوكس، مش معناها إنهم مش حقيقيين.. بالمختصر كده، شكلا مفيش أي حاجة تثبت إن الكمين ده حقيقي أو مزيف.

أما بقى من الناحية القانونية وتطبيق القانون، فللأسف معظم الكماين اللي وقفت فيها في حياتي، ماعندهمش فكرة عن القانون اللي بيطبقوه.. يعني مثلا أي كمين بيوقفك بيطلب الرخص، بس هل تعلم إن كمين المباحث مثلا مش من حقه يشوف الرخص؟! فقط نقط المرور وظابط أو أمين المرور هما اللي من حقهم يكشفوا على الرخص.

أما بقى كمين المباحث ده، فهو أصلا ليس له توصيف قانوني واضح.. أقرب حاجة له، هي تطبيق لحالة الطواريء، وقانونا المفروض الكمين ده يبقى موجود فقط بعد الساعة الواحدة بعد منتصف الليل.

ساعات الكمين بيطلب يفتش العربية.. طبعا مش محتاجين نقول إن عشان تفتش العربية لازم إذن نيابة، وطبعا إحنا ياما اتفتشنا في كماين من غير ما نشوف إذن نيابة ولا نيلة، فطبعا لو كمين مزيف طلب إنه يفتش العربية، فأنت مش حتشك في لحظة، لأن ده طبيعي، وطبيعي طبعا يرفض يوريك إذن النيابة، ده لو أنت أصلا اتشجعت واتجرأت وطلبت! آدي موضوع إذن النيابة ده طلع فشوش، ومش حيثبت أي حاجة.

طبعا اللي عامل كمين مزيف ده غرضه الرئيسي هو إنه ياخد فلوس منك.. مين مننا على مدار حياته ما أضطرش يدفع رشوة لكمين عشان يعدي بعد ما أمين الشرطة جاله وقاله: كل سنة وأنت طيب، وإديني الشاي، وأنا حاكلم حضرة الظابط؟! مع إنك بتكون مش عامل حاجة غلط وورقك سليم، بس لو أمين الشرطة قالك كده، هل ممكن ترفض مثلا وأنت عارف إنهم ممكن يعملوا فيك أي مصيبة، وخصوصا لو وقت متأخر بالليل، ومعاك حد من العائلة أو أطفال؟!

طبعا حتدفع من غير كلام.. أصلا النصاب اللي قرر يعمل كمين مزيف عشان ياخد فلوس من الناس، هو عارف أصلا أصلا إن الكمين الحقيقي بياخد فلوس رشوة، وعشان كده قرر إن دي سبوبة محترمة ومكسبها مضمون، ومفيش حد ممكن يشك إن الشرطة بتطلب فلوس!

من الآخر يعني.. واقعيا مفيش أي حاجة تقدر أنت كمواطن في سيارته تعملها عشان تثبت إن الكمين ده حقيقي أو مزيف.

طبعا مش محتاجين نقول تاني إن المفروض قانونا وموضوعيا إن يكون الفرق بين الكمين الحقيقي والمزيف، هو تطبيق القانون.

أهم أخبار مقالات

Comments

عاجل