المحتوى الرئيسى

محمد أسامة يوجه رسالة خاصة لمنتقديه وماذا قال عن عادل إمام وأشرف عبدالباقي؟

08/11 20:13

رد الفنان محمد أسامة الشهير بأوس أوس نجم برنامج "مسرح مصر"، على الانتقادات التي تعرض لها مؤخرًا هو وزملائه مؤكدًا أنه خلال الفترة الماضية عانوا كثيرًا حتى كاد بعضهم أن يموت.

أوس أوس، قال عبر صفحته الشخصية بموقع "فيس بوك": "بقالي كتير ساكت بس قررت اتكلم علشان العين كترت وناس كتير مننا كان زمنها ماتت الفترة الأخيرة دية بس ربنا نجانا الحمد لله من كل الحاجات الوحشة.. ..وبجد الشتائم وقلة الادب زادت اوى الفترة الاخيرة ما بين الناس".

وأضاف: "زمان الناس كانوا بيتباهو ويقولو البنى ادم ده محترم...انما للأسف في زمانا ده الكل بيتباها ويقول "لا انت فكرني محترم ولا اية ..لا دا انا عربجي"! حاجات غريبة بجد وكمية شتايم وهجوم علينا أنا وكل فريق مسرح مصر معرفش لية! اكيد مش ال90 مليون هيحبونا بس في نفس الوقت الناس لازم تعرف اننا شباب تعبنا على الاقل 10 سنين بنمثل في الجامعة وفى الفرق الحرة وفى الاوبرا لحد ما وصلنا بتعبنا ومجهودنا وموهبتنا بفضل ربنا وبعدين استاذ اشرف عبدالباقى علشان نوصل لقلوبكوا واهتمينا أزاي الناس تضحك وبس".

وتابع: "في أصعب وقت كانت فيه مصر لما بدأنا من 4 سنين في وقت التلفزيون مش بيجيب فيه غير اخبار الثورة والمشاكل السياسية مفكرناش غير ازاي نعمل حاجة بسيطة تخلى الناس تضحك ولو ساعة كل جمعة حتى لو مفيش قصة أو موضوع كان كل قصتنا وموضوعنا إننا نبسطكوا ونخرجوا من مشاكل اللي كلنا كنا بنعيشها، ولما ربنا كرمنا فكرنا نعمل أول مسلسل بطولتنا وكنا معترضين على فكرة البطولة دلوقتي اصلا بس عملناه مش علشان الفلوس والكلام اللي بيتقال وربنا اللي عالم وحاولنا على قد خبرتنا الصغيرة اننا نقدر نتحمل مسئولية كبيرة زي دي وفكرنا في إن معظم جمهورنا بيتراوح عمرة ما بين 7الى 20 سنة فكان لازم نعمل مسلسل فكرتة بسيطة وبتخاطب اكتر الاطفال وبرضوا شتايم ونقد سلبى علينا وبس.. مش بقول معندناش اخطاء لا عندنا اكيد بسبب حاجات كتير كنا أول مرة نواجهها او نعرفها واتعلمنا الحمد لله منها الوحش قبل الحلو... بس في عز اللي احنا فيه لما الصحافيين والنقاد والاعلام يقفوا ضدنا اكيد بنحس بيأس وعمرنا مكلمنا صحفي ولا اي موقع نلومه على حاجة بيقولها ومركزين في شغلنا والحمد لله جمهور مسرح مصر اللي بيحاول يجلنا المسرح بيكون لازم يحجز من قبلها بشهرين ودة معناة حب كبير اوى من الناس لينا بعد ما بدانا المشروع ده ب 4 بيتفرجوا وكانوا صحابنا كمان ... الفترة اللي فاتت دية تعبنا وجربنا واخطائنا نتيجة قلة خبرة اكيد مننا بس لسه محدش فينا عامل ربع اللي جواه ولا ربع الافكار الشخصية بتاعت كل واحد فينا بس مستمرين بإذن الله ومكملين رغم انف الحاقدين وربنا معانا وعارف نوايانا علشان نعمل حاجات تبسط الناس وتسيب بإذن الله اثر في تاريخ السينما والدراما المصرية".

أهم أخبار فن وثقافة

Comments

عاجل