المحتوى الرئيسى

الطريق لقلب الراجل معدته

08/07 09:00

لما كتبت على الفيسبوك تفتكروا فعلاً "هل الطريق لقلب الراجل معدته؟"، معظم الستات كتبت لا.. الطريق لقلبه إنها تبقى حنينة، عاقلة، شخصيتها مريحة، الحب هو أقصر طريق للقلب. لكن أنا لو حد سألني بعد كل سنين الجواز وخبرات الصديقات هقول "آه طبعًا".. مريحة إيه وبطيخ إيه وشهادات إيه، أي راجل على كوكب الأرض بيقرب لست بيقربلها عشان حلوة، وبيفضل معاها عشان أكلها حلو.. آسفة عزيزتي المصدومة.

فيه نكتة بتقول راجل غني كان بيختار ست يتجوزها من أربع ستات، فأعطى كل واحدة مبلغ كبير تصرفه وبعد أسبوع يقرر، فالأولى عملت مشروع تجاري، والتانية عمل خيري، والتالتة اشترت فساتين، والرابعة حوّشتهم.. اتجوز مين يا ترى؟ اللي جسمها أحلى. 

الرجال هم أطفال أطول قامة.. لا يعنيهم في الحياة سوى عملهم، وفي الحب والزواج لا يهتم بشيء أكثر من الجنس والأكل، كل الأشياء الأخرى.. شخصيتها، أفكارها، لبسها، تدينها، أهلها.. كله ثانويات أمام احتياجاته الأساسية، وأي راجل يقولك غير كده وإنه بيهتم بالجوهر ومش مهم شكل الست وأبعاد جسمها، ومش مهم طريقة عملها للمكرونة بالبشاميل وطشتها للملوخية ولفّتها لورق العنب، فهو يا عزيزتي كداب.. كداب وبيتجمل، وفي أقرب وقت هيقولك فلانة أكلها حلو وفلانة شكلها حلو.

أول ما الست بتتجوز بتتصدم إن الراجل جعان، في السرير وعلى السفرة، في السرير لو بيحبك فهو مش هيقارنك بحد، لكن على السفرة، يسقط الشيف شربيني والشيف أسامة ويسقط طبيخ أمك ويعيش طبيخ حماتك يعيش.

طول الوقت هيقارن أكلك بأكل أمه، "حبيبتي ماما بتحط ملح أكتر، زودي الملح.. مش عاجبني الباشميل ده، اسألى ماما بتعمل البشاميل إزاي.. الملوخية ماما مبتحطش عليها نص طماطماية.. المحشي ماما بتحط عليه لحمة مفرومة..." وهكذا، وتفضلي مهما حاولتي يبقى ليكي شخصيتك المستقلة، إلا إن شبح حلل حماتك بتطاردك دايمًا.. والحل إنكم تتقابلوا في نص الطريق، لازم ترضيه وتبعدي قصة كرامتك، وتسألي حماتك وتكسبي جوزك، والأصناف الجديدة الخاصة بيكي هتاخد سنين وبعدين تنتصرعلى السفرة، لأن الراجل اللي قعد ياكل من إيد أمه كل سنين عمره صعب في يوم وليلة يغير الطعم بسهولة، لكن تفائلي، لأن الرجالة كائنات نمطية؛ بعد شوية هياخد على أكلك ويحبه.. اصبري.

عندى نظرية لطالما دافعت عنها، وهي أن عادات الرجل الغذائية تتشابه إلى حد كبير جدًا مع عاداته الجنسية، يعني لما تقعدي تاكلي مع راجل على السفرة هتفهمي من طريقة تعامله مع الأكل طريقة تعامله في الجنس.

الراجل النضيف المحفلط في أكله وطبقه وبيشم ريحة الأكل، هو أيضًا محفلط في السرير ونضافة الملايات ونعومة جسمك وريحة برفانك.

الراجل الرياضي المهتم بصحته بياخد باله من الأكل الصحي، ولا يمارس الجنس بكثرة، وبيخاف على ركبه، وأيام الجيم والنوم بدري أهم منك ستين مرة.

الراجل اللي مبيحبش الأكل.. مبيحبش الجنس، الغريزة عنده في أضعف صورها.

أهم أخبار مرأة

Comments

عاجل