بعد رفعه علم المملكة بالأولمبياد.. «تويتر» ينتفض #رجعوا_حمادة: طب اللي باع الأرض.. وسعودية: تصغير لأم الدنيا

نشطاء: الرخص مناخ عام.. وأسلوب مصطفى بكري ينتشر.. واللي ما يحترمش بلده ما يستحقش ينول شرف تمثيلها

تداول نشطاء مواقع التواصل الاجتماعي، مقطع فيديو لأحد اللاعبين المصريين يرفع العلم السعودى، خلال دخول البعثة المصرية فى حفل افتتاح أولمبياد ريو دى جانيرو.

ودشن نشطاء موقع التواصل الاجتماعي "تويتر"، هاشتاج "#رجعوا_حمادة" خلال الساعات القليلة الماضية كرد فعل على سلوك لاعب الرماية، حماده طلعت، تعبيرًا عن غضبهم على ما اعتبروه إهانة اللاعب لاسم مصر في المحافل الرياضية العالمية.

قال الفنان أحمد الشامي، "لازم تتسحب منه الجنسية أصلاً.. ده إزاي يلعب لازم يترحل ويتحاكم. سابقة لم تحدث في التاريخ.. طبعاً الفاشل رئيس البعثة لن يتحرك #رجعوا_حماده".

ونشر الحقوقي جمال عيد، صورتان واحده للاعب المصري والثانية لسيدة تحمل العلم السعودي فى ميدان التحرير، وعلق عليها، "ليست حالة فردية، بل مناخ النفاق والرخص والانبطاح للرز بدأ ينبت ويزدهر، إما ننتبه ونعالج أو نحصد المزيد #رجعوا_حماده".

وقالت شيرين وجدي، "دولة انبرت تدافع عن بيع جزيرتين لبلد الكفيل.. بتتشطروا على واحد جاهل جعان نفسه ف شوية رز.. إشمعنا الريس.. ولأنها فعلا دولة رخيصة.. لن يجرؤ أحد على أنه يرجعوه.. الرز يزعل #رجعوا_حماده".

وقالت بيان، "رغم إني سعوديّة وأتشرف بذلك، لكن كفاية تصغير لبلد بحجم أم الدنيا! بلد الحضارة والفن والتّاريخ العريق.. بلد ياما تمنيت أكون منها #رجعوا_حماده".

وقالت بنت مصر، "لو حابب تستعرض عضلاتك على مصر وتشتم وتحط من قدرها يبقي بعقلك وعلمك وتاريخك مش بفلوسك ورزك.. لأن الفلوس بتطير والرز أخره البلاعه #رجعوا_حماده".

وقالت إسراء سعد، "#رجعوا_حماده وزير الشباب والرياضة مسؤول إنه يرجع الواد ده بأي تمن ويبطل لعب تاني علشان اللي ما يحترمش بلده ما يستحقش ينول شرف تمثيلها".

وقال عبد الرحمن شرف، "يعني حمادة اللي رفع علم السعودية يرجع! طب اللي باع الأرض للسعودية يتعمل فيه إيه؟! #رجعوا_حماده".

وقالت جي لوجيدا، "وفيه مصريين بيقولوا عادى إيه المشكلة! طيب إيه رأيك يا محترم أن السعوديين نازلين تريقة علينا بسببه.. هترجعوه يا بلد ولا هتخافوا! #رجعوا_حماده".

وقال أحمد عاطف، "زمان كان عندنا مصطفي بكري في الإعلام بس دلوقتي بقي عندنا بكري في كل المجالات سياسة وإعلام وقضاء وجيش وداخلية ورياضة كمان #رجعوا_حماده".