ارتفاع أسعار «كعك العيد» بالإسكندرية.. والأهالي: «الفرحة مش هتقف عليه ومش هنشتريه»

ارتفعت أسعار كعك العيد خلال شهر رمضان الجارى بشكل كبير، ما تسبب فى عزوف كبير من الزبائن، وضعف الإقبال على المحلات واستياء الباعة والتجار.

وقال على عبد الباسط، بائع كحك بمنطقة المنشية فى الإسكندرية، إن الأسعار ارتفعت بسبب المكونات التى زادت أسعارها بشكل كبير، إذ وصل كيلو السمنة لـ140 جنيها، فأصبح كيلو الكحك المصنوع من السمن الصناعى بـ25 جنيهًا.

وأضاف: الكحك المصنوع من سمن بلدى ارتفع سعره لـ40 جنيهًا، والبسكويت من الصناعى بـ25 جنيها، فى حين وصل البلدى إلى 35جنيها، وبيتى فور بسمن صناعى بـ35 جنيها، والبلدى بـ45 جنيها، كما وصل سعر كيلو الغريبة بسمن صناعى إلى 35 جنيها، والبلدى إلى 45 جنيها، مشيرا إلى أن الأسعار بشكل عام ارتفعت بنسبة 25%، بسبب المكونات المستوردة التى زادت أسعارها بسبب سعر الدولار الذى قارب 11 جنيها مصريا.

ولفت بائع الكحك إلى أن ارتفاع سعر الدقيق، وباقى المكونات تسبب فى ضعف الإقبال على شراء الكحك قبل أيام قيلة من حلول عيد الفطر، "الناس مابقتش تلتزم بعادات رمضان والعيد زى زمان.. الكحك مبقاش فى قاموس كل الأسر، والغلاء السبب طبع".

مصطفى حسين، بائع بسكوت وكحك بمنطقة العجمي، قال إن الأسعار فى المنطقة أعلى قليلا من وسط الإسكندرية، إذ وصل كيلو الكحك السادة المصنوع من سمن بلدى إلى 50 جنيها، فى حين كحك المسكرات وصل إلى 70 جنيهًا، مشيرا إلى ارتفاع الأسعار عن العام الماضى بنسبة 20%، «مفيش إقبال من المواطنين.. الزبون اللى بيجى بيشترى نص كيلو كحك ونص بسكوت فقط.. ومفيش زى زمان ناس بتشترى كميات كبيرة».

بدورهم، اعتبر الزبائن أن ارتفاع الأسعار سبب رئيسى فى العزوف عن شراء الكحك بأنواعه المختلفة. فقالت ابتهال حليم، ربة منزل: «الأسعار نار.. وفيه محلات بتبيع طبق الكحك بـ600 جنيه، يعنى أغلى من الدهب.. إحنا مش معانا، ومش بنحب الكحك أوى وعلشان كده مش هنشتريه السنة دي».

وأضافت ريم مروان، ربة منزل أيضا: «لم أشتر سوى كيلو كحك سادة فقط بـ50 جينها.. ودا كفاية جدا.. أنا عايشة مع جوزى بس ومافيش عندنا أولاد لسه.. وياريت نقدر نخلصه.. ومش هشترى حاجة مش محتاجاها حتى لو الأسعار رخيصة».