البنت ضرة أمها

وفجأة بنلاقي نفسنا طول الوقت متعصبين وبنشتكي، العند ونشفان الدماغ والنِدّية والمردات والوقوف على الواحدة.. أمهات البنات طبعًا فاهمين اللي بتكلم عليه، فجأة تلاقي واحدة طولها متر عمالة تتصيّدلك وتتصيدلها في الغلطات زي ما نكون ضراير.

القاعدة بتقول أي سلوك سيئ من الطفل هو عَرَض لخلل عندنا إحنا مش عندهم، هي ممكن "كوكو" تغلط بس أنا السبب في هذا الغلط، هااااح يا ربي! الدخول في دواير من الشكوى والعناد المضاد والخناق وكهربة البيت كله عشان مش عارفين نتعامل، ومش فاهمة هي بتعمل كده ليه وعايزة مني إيه. التحول لجنرال حربي بيسيطر على المعركة والكلام كله بلهجة الأوامر حتى لو كان عشان الفسح واللعب. وفجأة أخدت بالي إنه لا البيت ساحة معركة ولا مركز إدارة أزمات. أبص على وشي وأنا معدية قصاد مرايا ألاقيه كله توتر. طب ليه؟ إمتى هبقى سعيدة وراضية في سنتي بقى؟

فكرت أجرب أهدا؟ أو الأحسن كمان أفكر نفسي بكل مزاياها، البنت كلها إيجابيات.. بدل ما أنا مركزة إما إني بحبها في المطلق أو عمالة أشتكي من اختلاف الطباع وإني مش قادرة أحتويها، أول عشر صفات إيجابية ملهاش علاقة بحبي لها، ولقيت إن البنت فعلاً شخصيتها غنية ومليانة صفات تتقدر.

"كوكو" أخت حنينة، مهما افترى "حسن" عليها ضرب مبتأذيهوش. بتعلمه الحروف والكلمات وبتحاول تاخد بإيده في كل المواقف وتعلى بيه. 

"كوكو" بنت منظمة، ميني بكيزة، بتهتم بالتفاصيل والخطط وإزاي هنعمل كده وإيه الخطوة الجاية. 

"كوكو" طفلة تشرف، في التمرين في المدرسة في الجامع.. عمرها ما عملت مشكلة ولا كسفتني. 

"كوكو" بنت مجتهدة، بتحاول تبقى أحسن وعندها احترام شديد لنفسها. 

"كوكو" مشاعرها واضحة، اللي بتحبه بتحبه بجد واللي ميلزمهاش ولا كأنه موجود في حياتها. 

"كوكو" بتستجيب للصفات الجميلة، حتى لو بتحب لعبها وبكيزة في نفسها، بتجاهد الحب ده لما نيجي نتبرع بحاجة من عندها، أنا عارفة إنها بتقاوم نفسها في القرار ده.. وبحترم إنها دايمًا بتراجع نفسها وتستجيب. 

"كوكو" عينيها فنية، ملاحظاتها للأماكن والألوان فيها لمسة فنية، ودايمًا هي اللي بتشاور لي على الجمال الموجود في الأشياء. 

"كوكو" طفلة مسؤولة، متعملش حاجة خطر، عمري ما حملت هم اندفاعها أو أي تصرف أهبل خطير على حياتها. عاقلة وبتحسب حركتها. 

"كوكو" طفلة رحيمة، رحيمة بالأضعف منها، حتى لو عملت تصرف قاسي على الأصغر منها أو القطة، تعاتب نفسها وتتأسف. 

"كوكو" بنوتة، بتعرف تدلع نفسها ومهتمة إن يكون شكلها أنيق ومهندم وشعرها حلو، وتركز إن يكون هيئتها مناسبة للمكان اللي هتبقى فيه.