يوم واحد في الفاتيكان

لما تزور روما عاصمة إيطاليا، وهي من أجمل بقاع الأرض حيث تعتبر متحفًا مفتوحًا، يبقى لازم تقضي يوم في مدينة الفاتيكان.

الفاتيكان هي أصغر دولة من حيث المساحة في العالم، في قلب مدينة روما، التي تحيط بها من جميع الاتجاهات، ويفصلها عنها أسوار خاصة، "الفاتيكان" فيها معالم أثرية مميزة جدًا مثل كاتدرائية القديس بطرس وكنيسة سيستينا.

لما تزور "الفاتيكان" هيسمحولك أنك تدخل تتفرج على رسومات سقف وجدار كنيسة سيستينا Sistine Chapel لمدة 10 دقائق فقط، وكمان ممنوع التصوير نظرًا لأن الرسومات بدأت يحدث لها أضرار، وهيقولولك لو تقدر تمنع نفسك من التنفس، قصة رسم السقف ده من أكثر القصص الملهمة اللي ممكن تسمعها.

البابا يوليوس طلب من مايكل أنجلو، إنه يرسم سقف الكنيسة، ويقال إن رسامًا آخرًا هو اللي رجح اسمه عشان يثبت فشله، الفكرة إن مايكل أنجلو كان شايف نفسه نحات مش رسام، ورفض إنه يرسمها، وهرب لكن البابا أصر وعرف يرجعه تاني ويجبره إنه يرسمها.

استطاع مايكل أنجلو أن يبتدع نظام سقالات تخليه يقدر يبدع العمل ده وهو واقف، واستمر في رسم السقف لمدة 4 سنوات، عشان كده ده أدى لأذى ببصره وورقبته وظهره، لكن أنتج إبداعًا يعتبر معجزة حتى وقتنا الحالي.

ويقال إن مايكل أنجلو، كان ذكي كفاية عشان محدش من الرسامين المساعدين ينسب أي فضل ليه في رسم أي جزء من السقف، فكان بيوظفهم ويطردهم بانتظام، السقف هو عبارة عن تصوير لـ9 مشاهد هي "فصل النور عن الظلام"، "خلق الشمس والقمر والكواكب"، "فصل الماء عن اليابسة"، "خَلق آدم"، "خلق حواء"، "سقوط الإنسان وطرده من الجنة"، "تضحية نوح"، "الطوفان"، وأخيرًا مشهد "سُكْر نوح".

الفكرة من القصة دي لما تسمعها لازم تفكر أولًا إنك ممكن تكون مش شايف في نفسك حاجة بش الظروف تكشفلك نفسك، وإنك مبدع فيها فممكن تكون مرونتك مع الظروف اللي حواليك تكشفلك إبداعك في مكان تاني، كمان إنك لما تعمل أي حاجة لازم تبدع فيها، وتتقنها حتى يصبح عملك خالدًا ولا تستسلم للفشل.

خلي بالك وأنت هناك، هتقابل مرشدين سياحيين كتير، اسأل عن الأسعار وفاصل عشان السعر ممكن يتراوح ما بين 35 يورو لـ75 يورو، متضمن تذكرة الدخول، وهيدوك سماعات جهاز تسمع فيه المرشد، وكمان في مرشد مصري اسمه أحمد لو عايز تسمع بالمصري.

طبعا عشان تروح الفاتيكان وتقضي يوم فيه لازم تزور روما عاصمة إيطاليا، اللي ممكن تلفها كلها على رجليك، وتاكل باستا وبيتزا وآيس كريم، طول اليوم، "بولة الآيس كريم الواحدة" ممكن تكون بـ5 أطعمة مختلفة".

عشان تروح إيطاليا لازم تاخد ميعاد للتقدم للفيزا عن طريق مكتب VFS في مصر عن طريق موقعهم الإلكتروني http://www.vfsglobal.com/italy/egypt/، وطبعا هيكون مطلوب منك يكون معاك في الميعاد "استمارة التقديم للفيزا، حجز الطيران والأوتيل، جواب من شغلك أو ما يثبت امتلاك شغل ليك، كشف بحسابك في آخر 6 أشهر يكون حركة التعاملات قوية من سحب وإيداع، تأمين صحي لأيام السفر أو أكثر، صور شخصية، وجواز السفر، وصورة منه وممكن يطلبوا منك شهادة تحركات لو مش معاك (شنجن) قبل كده".

تذاكر السفر بتكلف نحو 2500 لـ4000 جنيه ذهاب وعودة احجز من هنا https://www.travelstart.com.eg/ أو من هنا www.skyscanner.com، كمان الأوتيلات ممكن تقعد في هوستيل بـ200 جنيه الليلة أو أقل أو في أوتيل بـ300 لـ400 الليلة قريب من وسط البلد، وكمان جنب المواصلات، احجز من هنا www.booking.com، واختار Rome city center وlowest price first، أو تقعد ببلاش من استخدام موقع couchsurfing.com.