ازاي اكل الدهون يخليكي اذكى !

هل اكل الدهون ممكن يخليكي اذكى او مفيد للمخ ؟ الدهون فعلا مفيدة جدا للمخ لانه 60% من تكوينه من الدهون وبالتالي مخنا بيحتاج للدهون عشان يشتغل بشكل احسن عشان كده التغذية السليمة هي المفتاح اللي نحافظ بيه على سلامة المخ, والدراسات اثبتت ان التغذية بتأثر على نمو المخ طول حياتنا, والدهون بتوفر الطاقة للمخ وبتحميه من امراض المخ, كمان الدهون الاحادية الغير مشبعة بتزيد من انتاج استيل كولين وده ناقل عصبي ليه دور مهم جدا في التعلم والذاكرة.الدهون الغير المشبعة بتحتوي على الاحماض الدهنية الاساسية اللي هو “اوميجا 3” و “واوميجا 6” والمخ بيحتاج الدهون دي بشكل اساسي لان الدراسات اثبتت ان الانسان لما بياخد كميات كبيرة من الاحماض الدهنية اوميجا 3 ده بيرتبط بشكل اساسي جدا في انه يخفض معدلات الاكتئاب الشديد والاضطراب, وبتساعد في تحسين وظايف المخ زي الذاكرة, وقدرات الكلام او النطق, وكمان بتنمي المهارات الحركية, , لكن احنا جسمنا مش بينتج الاحماض دي عشان كده لازم ناخد الكمية اللي لزمانا منها من خلال التغذية اننا نزود من الاكل اللي فيه الاحماض الدهنية.الدهون المشبعة دي من المكونات الرئيسية اللي داخلة في تكوين خلايا الدماغ, عشان كده هي ضرورية جدا لينا عشان هتخلي وظايف المخ تشتغل بشكل سليم, والدراسات اثبتت ان الاشخاص اللي بيحصلوا على الدهون المشبعة اكتر بيقل خطر اصابتهم بالخرف اللي هو يعتبر من علامات الشيخوخة بنسبة 36% , كمان الدهون المشبعة مفيدة جدا في تحسين وظايف الكبد وبيزود من مناعة الجسم, وبيحافظ على التوازن الهرموني في الجسم بشكل صحيح.الافوكادو من الحاجات الغنية جدا بالدهون الاحادية الغير مشبعة بيحسن جدا من وظايف الدماغ, وبيساعد على تدفق الدم بشكل سليم للدماغ وده بيخلي وظايف الدماغ تشتغل بشكل سليم, ومفيد جدا للقلب لانه بيخفض نسبة الكوليسترول المضر في الدم وبيمنع جلطات الدم, كمان فيه نسبة من البوتاسيوم اللي بيساعد على السيطرة في ضغط الدم, كمان بيحتوي على المغنسيوم اللي بيقلل الاصابة بامراض القلب.السلمون من الاكلات الغنية جدا باحماض الاوميجا 3 الدهنية, والافضل عشان نقدر نستفيد من السلمون ومن الاحماض اللي فيه اننا ناكله معمول على البخار او مشوي عشان نحافظ على احماض الاوميجا 3 ويستفاد منها الجسم بشكل مظبوط.المكسرات تعتبر من اكبر المصادر للدهون الغير مشبعة وفيتامين E  وده بيحسن من وظايف الدماغ, والمكسرات بشكل عام مفيدة ولكن بشكل خاص افيد الانواع هو الجوز واللوز بيحافظوا على الذاكرة.البيض بيحتوي على الدهون المشبعة والكلورين وده بيحسن من الذاكرة, ومن صحة الدماغ بشكل عام.زيت الزيتون يعتبر من الدهون الصحية جدا لصحة المخ, بيساعد جدا على تحسن الذاكرة, وبيحمي من الخرف وبيخلي المخ يشتغل بشكل سليم, وزيت الزيتون من الحاجات اللي نقدر نضيفها لاي نوع اكل بتديها طعم حلو وبتزود فايدته في نفس الوقت.زيت جوز الهند بيحتوي على سلسة الشحوم الثلاثية ودي من الحاجات اللي بتخلصك من الدهون الزيادة في الجسم وبتساعد في بناء الانسجة وبتزود حجم العضلات, وزيت جوز الهند بيساعد على تجديد وشفاء الخلايا العصبية في المخ ويخليها تشتغل بشكل سليم.بعد ما عرفنا فوايد الدهون الصحية لازم نحرص جدا اننا نحصل عليها في نظامنا الغذائي عشان نحسن من وظايف المخ ونخليها يشتغل بشكل احسن ونحافظ على المخ سليم فترة اطول.