بالفيديو والصور.. هاشتاج 'ديزنى بالمصرى' يشعل تويتر وهنيدى يؤازر العرب فى إعادة دبلجة الكارتون

مغردو "تويتر" ينادون بعودة الدوبلاج المصرى لأفلام ديزنى الكارتونية

محمد هنيدى يدعم الحملة ويغرد :

"لما عملنا نسخة الأسد الملك وحققت نجاح ديزني بعتت لينا شكر خاص"

ارتباط اذهان الكبار والصغار بأشهر الجمل الكارتونية المدبلجة بالمصرى

العرب يؤيدون استخدام اللهجة المصرية فى دوبلاج الكارتون لبساطتها وسهولة فهمها للجميع

اعرب مغردو موقع التواصل الإجتماعى "تويتر" من المحيط إلى الخليج عن حبهم للغة المصرية التى تستخدم فى الدوبلاج على أفلام ديزنى الكارتونية الشهيرة والتى أوضحوا أنها تعطى مذاقا مميزا للكارتون وتجعل الأطفال ينجذبون بشدة إلى متابعة كارتونهم المفضل بتركيز واضح وذلك فى هاشتاج دشنوه وأطلقوا عليه "#ديزني_بالمصري" للمطالبة بعودة الدوبلاج المصرى لأفلام ديزنى والتى دعمها الفنان الكوميدى "محمد هنيدى" الذى اشتهر بدوبلاجه لكثير من الأفلام الكارتونية مثل "تيمون فى الأسد الملك"، و "مارد وشوشنى فى شركة المرعبين المحدودة"، و"سوبر هنيدى".

واحتل الهاشتاج مركزا متقدما فى التريند المصرى عبر "تويتر" فضلا عن تأييد العرب جميعا للغة المصرية فى الدوبلاج لسهولة كلماتها وألفاظها ومرحها.

واستعان الرواد فى الهاشتاج بسلسلة من الجمل الشهيرة التى ارتبطت بأذهان الكبار والصغار، والتى كان من أبرزها :

لما الدنيا تديك ضهرها....ادي ضهرك للدنيا

تيمون عمركش فكرت ايه النجوم الملعلطه ف السما دى.. بومبا انا مبفكرش بس ممكن يكون دبان دبان منور لازق ف السجاده الزرقا اللى فوق.

هاكونا متاتا حكمة نغمها لذيذ، هكونا متاتا.. انسى الماضي اللي يغيظ.

اديله في مشمه، اديله على حنطور عينه.

دودة معتبرة ملظلظة بس تملى التانك.

كان نفسي أتنطط من الفرحة بس ضهري بيوجعني.

ياختي كميلة.. ماهووش ملك بس برضه أخلاق.

أنا مش بحذّر ولا بفزّر.

مخاطر أنا بضحك فوش المخاطر هاها.

عمو سكر.. أنا لما هبقى ملك إنت هتبقى إيه هتبقى طيشة.

متهيألى جاتلى فكره احنا نستخدم معالق الشوربه ونحفر نفق بره البلد ونطلقها فى الخلا.

هتعزمني علي العشا فين الليلادي، حجزت في مكان غالي اوي اسمه كوابيس، كوابييس لكن دة الحجز هناك مستحيل، مش لكورتي البعبع.

ششششششش سامع الصوت ده دي رياح التغيير.. سامع ده سامع رياح العبط أما عبيط.

رجع البنت دي يا إما علينا العوض.

طوس في البشطة.. بوص في الشنطة.

أنا مش مصدق نفسي، أنا طلعت في التليفزيون.

بالذمة دا شكل واحد منفي دا.. المفروض يسموني المنفي الحبوب.. أو المنفي السعيد.

الموضوع ده ميتكررش.. أنا حطاك في دماغي وبراقبك وهراقبك.

وديتها فين يا محول يا ابو عين واحده؟..اول هام اسمها اعور، لما تحب تهزأني هزأني صح.

إنتوا أغبية حفارين في الطين اتخلقتوا علشان تخدمونا إحنا الجراد.

النمل مش خدامين عند الجراد.

أيوة يا زعيم دول فسفس.

الحكاية مش أكل الحكاية تأديب النمل ده.

الاكل الحلو تدوقه زى المزيكا .. وتشمه زى الالوان، الخيرات متلتلة حواليك مطلوب منك بس تستطعمها.

بعد ما جبتك بيتي ووثقت فيك.. سرقت البيض.

عنوان موسيقي الطبخ للجميع .. واللي ألطف منه إن جوستوه شكله مصدّق.

لا لا لا ده شيء مرعب مش معقول.. ده كده هيبوّظ الشوربة ومفيش حد شايفه.

لو ركّزت على اللي ضاع منك عمرك ما هتشوف اللي بيستناك.. شوف رزقك الدنيا واسعة.

ماتمشيش ، انا ماحدش فضل معايا كتير زيك كدة.

أنا لما بشوفك وببصلك بحس بأمان.. أرجوك مش عاوز الشعور ده يضيع مني.. مش عاوزه أنسى.

عوم واتمختر عوم واتمختر عوم عوم عوم .. عوم واتمختر.

أنا برانا في نهر الأمزون.

الحوض نضيف الحوض نضيف.. ملعون الفلتر ده.. ضاعت خطة الهروب.

كان في ودعة قابلت خيار بحر قالها لو خيروني مش هلاقي أودع منك.

بابا لازم نقول للسمك يعوم لتحت..سمعتوا ابني قال ايه : كلو يعوم لتحت..عوموا لتحت عوموا لتحت.

مشهد مؤثر.. تعرفو من زمان اوي ماحستش بالحالة دي, من ساعة ما طاج المسقعة انحشر في زوري.

عارف إنت بتكلم بالقطارة إنت تحفة

إيه العمل دلوقتي يا إيللي.

النادي ده للأبطال مش لأي عيل لابس نضارة.

مساء الورود أنا اسمي رامز من مغامرين الكشافة بالكتيبة 41 بالفرقة العاشرة.

مكتوب على علبتي 7 سنين فما فوق، تيجي تلعب فيا البنت أم رياله دي.

أنا أنا الصديق اللي بحق وحقيق قلبي صافي.

كما كتب الفنان محمد هنيدى عبر حسابه الشخصى بموقع التواصل الإجتماعى "تويتر" : "شاركوني على هاشتاج #ديزني_بالمصري بأكتر اقتباسات وجمل فاكرينها من أفلام ديزني دعما للحملة اللي تم اطلاقها امس..شاركوا بالجمل اللي فاكرها بالمصري، الافلام اللي عمرك ماهتنساها والشخصيات".