أشرف أبو الخير يكتب: ويسألونك عن عمان (5)

بقلم – أشرف أبو الخير:

أرخت عمان جدائلها* .. أو لماذا تُعشَق عمان!! 

بالعامية المصرية، فهي للقلب أقرب.

دي تقدر تقول عليها رسالة لكتير من أصدقائي ومعارفي إللى مندهشين من سلسلة المقالات دي، وإن يعني الأردن دي كلها على بعضها كدة تطلع إيه يعني عشان تتكلم عنها كدة ؟؟!!

شوف، مبدئياً مش هقدر أكلمك عن الأردن من شرقها لغربها ومن شمالها لجنوبها في مقال واحد، فخلينا نتكلم عن عمان واللايف ستايل بتاعها، بس أرجوك شيل من دماغك فكرة إن الشعب الأردني عايش في صحرا ولسة بيركب جمال، الوضع أرقى بمراحل من التصور دة.

عمان مدينة كبيرة فعلا، أصغر من القاهرة صحيح، لكنها مش صغيرة، ومقسومة جغرافيا/ مجتمعيا لجزأين أساسيين .. (عمان الشرقية – عمان الغربية) ... الشرقية هي الأفقر والأزحم والمليانة بالفقرا والغلابة.. والغربية هي العكس، الأحياء الراقية والمتوسطة، المليانة بالناس المتعلمين والعربيات النضيفة (أوي) والمباني الشيك وهكذا.

الأحياء الراقية زي أحياء (خلدا – عبدون – دابوق – دير غبار) هي بطبيعة الحال أغلى المناطق في عمان في كل حاجة (السكن – الخدمات – الخروجات... الخ) .. وأنا عارف إن الأسماء مضحكة، لكن عايزك تفكر في أثر كلمات زي إمبابة والموسكي والمغربلين على أي شخص من خارج مصر... وعلى ذكر الأسعار، فـ سواء كنت في عمان الشرقية أو الغربية، فالأسعار هنا أغلى حبتين تلاتة عن مصر، هنا مثلا كارت الشحن اللي بـ 5 دنانير ( 60 جنيه مصري تقريبا) سعره الرسمي سبعة ونص دينار يعني (90 جنيه مصري).. وهكذا.

عمان بلد نموذجية للهدوء والاستقرار وإعادة إكتشاف النفس (ودي مش فلسفة)، وفرصة كبيرة عشان علاقتك بربك وبنفسك وبكل اللي تعرفهم تتطور وتكون أكثر هدوءا ونضجاً.. هنا مش بتتخانق على ركنة عربية ولا أجرة تاكسي ... مش بتشم دخان.. بتشوف غالبا شوارع منظمة إلى حد كبير، وبيوت ومباني بلون موحد تقريبا .. أقصد إن الراحة النفسية متوفرة، وقدرتك على الانجاز أكبر.. ودايما عندك كواليتي تايم تقدر تقضيه في بيتك بشكل مريح على عكس مصر.

في غير أوقات الزحمة جدا (ساعة الصبح بتاعة الذهاب للشغل- والرجوع منه) .. أفخم مشوار في عمان بياخد 20 دقيقة، يعني لما تنزل من بيتك 9 فتبقى متأكد إنك هتبقى على مكتبك بعد تلت ساعة لما يكون فيه عفريت ... وبالتالي تنظيم الحياة هنا سهل جدا، وعادي إنك تاخد مواعيد الساعة سبعة (وربع) أو حد يقولك قدامي(8) دقايق وأكون عندك.. وهكذا.

أماكن الخروج (على عكس المتوقع) كتيييييرة جدا، متنوعة وأسعارها متفاوتة... هتلاقي أماكن في عمان القديمة شوية واماكن في عمان الحديثة جدا والفخمة جدا ... كله متاح من القهوة البلدي لبارات الفنادق الفايف ستارز. 

البلد في المجمل بتنام بدري، وبسبب البرد (في معظم شهور السنة) هتكون معظم البلد في البيوت بعد الشغل، وقليل لما هتلاقي حد بيسهر لبعد 12 ... وبالتالي هتلاقي نفسك بتصحى بدري وبتنام بدري، قادر تقرا و تلعب رياضة و تزور ناس و تخرج وهكذا.

الجو البارد مش حاجة لطيفة (بسبب طبيعة البلد الجبلية، منطقة سكني على سبيل المثال ارتفاعها أكتر من ألف متر فوق سطح البحر)، لكن دة مش بيستمر للأبد، و لنفس سبب الطبيعة الجبلية، فعندك من نص مايو لأواخر سبتمبر بتلاقي درجات الحرارة اتعدلت والجو بقى مريح للأعصاب، يكفيك تعرف إنهم بيقابلوا درجة حرارة 43 – 45 دي يوم واللا اتنين في السنة.. وبيعتبروها جحيم ... تخيل يا أخي!!

مينفعش تفوت الأكل هنا.. حاجة بديعة فعلا، طريقة الطبخ نفسها مختلفة، والمطبخ متنوع جدا ... هييييييييح.

الكنافة النابلسية (بنوعيها الخشنة والناعمة)، واحدة من أروع الاختراعات على الكوكب .. لو ربنا كتب لك زيارة للأردن متضيعش على نفسك التجربة الفخمة دي.. وسيبك من البلاستيك اللي في مصر دة وبيقولوا عليه كنافة نابلسية، أرجوك.

وانت هنا هتسمع دايما عن خروج في شارع الرينبو (كافيهات كتير – ممشى – محلات أكل وعصاير ... الخ) ... ودايما هتلاقي الناس بتحب تروحه، وهو فعلا شارع لطيف ... استمتع فيه بتجربتك الخاصة.

هنا في حفلات فنية وندوات ثقافية ونوادي كتاب (عادي يعني إنت مش في صحرا)

تذكرة الطيارة من القاهرة لعمان بتكون في حدود 230 دينار، وما قد يتسبب في رفع الضغط إنك تقدر تنزل شرم الشيخ من هنا بـ 150 دينار (إقامة وطيران) في أوتيل 5 نجوم لمدة 4 ليالي ..... كمان السفر لتركيا وقبرص و و و ... أرخص من مصر بكتيييير. 

إحساس عظيم، إن عيالك مش هيشموا دخان ولا هيسمعوا دوشة ... إحساس عظيييييم.

التاكسي بيشغل العداد ... وفي أوبر، و كريم ، وإيزي تاكسي كمان.. متقلقش

الشعب هنا وقور ومحترم... احذر انك تشتم حد بأمه لأن فيها حق عرب وممكن توصل للقتل (فعلا).. وخطوطهم الحمرا معروفة.. الشرف / الدين/ العنصرية النسبية بين الأصول المختلفة في الشعب، وهي الحقيقة بتخف مع الوقت.. وأتمنى إنها تختفي للأبد بإذن الله.

جمد قلبك وتعالى عمان ... هتنبسط

• أرخت عمان جدائلها هي أغنية للعظيمة "نجاة الصغيرة" – ويمكن الاستماع إليها من هنا : https://www.youtube.com/watch?v=2kmiKmD1zp0

ويسألونك عن عَمَان.. في البدء كانت الهجرة (1)