على عهدة مالك عدلي.. "الشهيد الحي" يفيق من غيبوبته بعد 5 سنوات

أعلن الناشط السياسي مالك عدلي أن معوض عادل أحد مصابي أحداث محمد محمود الأولى، أفاق من الغيبوبة التي تعرض لها عام 2011.

وقال في تدوينة عبر حسابه على موقع التواصل الاجتماعي "فيس بوك": “أنا هكتب كلمتين أرجو محدش يعتبرهم مزايدة ولا إساءة وأرجو محدش يعلق عندي عليهم بس هما للأسف كلمتين لو مقلتهمش هطق".

وتابع: "النهارده بترتيب ربنا وجدعنة Azza Ahmed Zaki Hassan الست الأصيلة الكريمة الجدعة قدرت أزور واحد من أسيادنا وتيجان رؤوسنا معوض عادل الملقب بالشهيد الحي اللي اتصاب برصاصة في المخ في أحداث محمد محمود ومن يومها وهوا في غيبوبة".

وأضاف: "وبعد الدولة ما رفضت علاجه باعتباره مصاب ثورة واترفعت قضية كسبها أهل معوض اتنقل معوض للعلاج في مستشفي متخصصة في الحالات اللي زي حالته في انجلترا، معوض في مستشفى تبعد عن لندن حوالي ساعة ونص بالعربية، رحت وأنا مش عارف إيه ممكن أحس بيه أو يحصللي بس دا عيل من عيالنا ولازم هشوفه يعني هشوفه".

وواصل: "مستشفي بسيطة معوض فيها في غرفة بسيطة علي جهاز تنفس صناعي وأجهزة تانية، شاب زي القمر تكوينه الجسماني يشي بإنه صاحب جسم قوي، أبيضاني وشعره ناعم وعينيه بنية نايم علي سرير أبيض مبيتحركش بس بيشوف وبيسمع والنهارده الممرضة حكت لأخوه إنه ضحك لما حاولت تهزر معاه وساعات بيحس لما حد يلمسه".

وذكر: "معوض في غيبوبة من نوفمبر 2011 وبره دنيانا خالص، عزة ومصطفي وعلي كانوا كرماء وسابوني ادخلله لوحدي، يا ربي معوض بيبصلي ونايم قدامي .. هقولله ايه؟ ازيك يا معوض أنا اسمي مالك واحد يعرفك وبيحبك وجاي من مصر يطمن عليك، شد حيلك يا بطل..فيه ناس كتير بيسلموا عليك ..معوض مركز معايا بعينيه..ابتديت اقولله أسامي علي بالي دايما بيسألوا عنه .. شد حيلك يا معوض احنا كلنا مستنيينك تقوملنا بالسلامة علشان نكمل اللي بدأناه سوا".

وأردف: "بعد الجملة دي تاه كل الكلام من لساني وسرحت ف عينيه ..يا ربي اقولله ايه؟ إننا تحت ايدين عالم مبهدليننا؟ وإن مفيش حاجة اتغيرت وإن رقدته دي ببلاش؟ احكيله عاللي حصل وبيحصللنا وفينا؟ مقدرتش انطق.. بست دماغه تاني وإيديه ورجليه وخرجت الدنيا مغيمة في وشي ومش شايف، اللي صدمني كمان إني عرفت إن محدش بيزور معوض غير عدد قليل جدًا من الناس في حين إني أعرف ناس كتير ليهم رجل علي هناك وناس أصلاً عايشة هناك ومنهم كتير ظروفهم تسمح وكلهم بيتغنوا بالثورة والشهداء والمصابين بس محدش فكر يزوره ولا يطمن عليه ويشوفه ويشوف عينيه ويفتكر احنا كنا فين وبقينا فين".

واستطرد: "بالذمة احنا نستاهل أي توفيق؟ أنا غضبان قوي وزعلان من كل حد يقدر يروح يزور معوض ومراحش وكل حد نسي معوض وكل حد فاكره ومبيدعيلوش وكل حد نسي معوض نايم علي سرير بقاله حوالي خمس سنين ليه.. وغضبان من نفسي ومن الدنيا كلها.. العيال دي تستاهل مننا كده؟ يا رب اشفي معوض وفرح قلب امه وأخوه الجدع مصطفي وقلوبنا ووفقنا يبقي فيه حاجة حلوة نقدر نقولها لمعوض لما يقوملنا بالسلامة".