محمد عطية عن بيان قتلى "ريجيني": مؤيدو السيسي لن يعترفوا بفشله
ذكر الفنان محمد عطية أن مؤيدو الرئيس عبد الفتاح السيسي لن يعترفوا بفشله في إشارة إلى بيان وزارة الداخلية الذي أعلنت فيه عثورها على متعلقات وأوراق الطالب الإيطالي جوليو ريجيني بحوزة التشكيل العصابي التي قامت بتصفيته أمس.
وقال في تدوينة عبر حسابه على موقع التواصل الاجتماعي "فيس بوك": “على فكرة يا جماعة احنا عمالين نتريق على بيان وزارة الداخلية الخاص بمقتل الشاب الإيطالي ريجيني، بس هل تعلم إن المؤيد مصدق؟، وصدق كل المحاولات السابقة اللى قام بيها إعلام النظام تجاه هذه القضية".
وتابع: "يعني صدق إنه كان مثلي الجنس واتقتل بسبب مثليته، وصدق الشاهد الزور اللي طلع في الإعلام وصدق إن ريجيني آخر مكالمة ليه كانت مع واحد إخواني، ده غير إنه صدق بلاوي كتير قبل كده، زى مثلاً إن السياح المكسيكيين كان عندهم أغراض غير السياحة".
وواصل: "وإن تفريعة القناة هتجيب ١٠٠ مليار وجهاز الكفتة والمليون وحدة سكنية والمؤتمر الاقتصادي، ياراجل ده كان بيدافع عن أمناء الشرطة في واقعة أطباء المطرية، دي عينة من الوقائع اللى حصلت فعلاً، بس انت عارف بقى إنه كمان بيصدق حاجات وهمية زى مثلاً إن الجيش اكتشف مخزن للسلاح عن طريق تتبع أرنب بري (أقسم بالله شفت بوست معمول له شير عند صفحة أحد الأصدقاء بالقصة دي)”.
وذكر: "المؤيد يا عزيزي عامل لايك لصفحة المخابرات المصرية ومليون توقيع لسحب الجنسية من البرادعي وعشاق منقذ مصر، وبيعمل شير لبوستاتهم وبيدخل يعلق بتحيا مصر ٣ مرات في البوستات ولو هو عاقل شوية ومش في الحتة دي هتلاقيه من اللي قاعدين مستنين أي فشل فى أي بقعة في الكون في مجال واحد عشان يقارنه بدولة فاشلة من الألف للياء فى كل المجالات ودون أن يكمل المقارنة مثلاً بإيه اللي بيحصل في المسئول عن الفشل عندنا وعندهم، والإجراءات الاستثنائية بتكون لمدة قد إيه عندهم وعندنا والحجج المتبعة للقمع وكبت الحريات هنا واللي مافيش منها هناك زي واقعة بلجيكا الأخيرة".
وأردف: "ولما يتزنق ومايكونش فيه حاجة خالص عارف يدافع بيها، يفضل يعمل لشير لحاجات ليها علاقة بعمليات بيقوم بيها الجيش معتقد في قرارة نفسه إن ده رد قوي على فشل السيسي في كل المجالات، من الآخر المؤيد مسلم دماغه ومش هيعترف بفشل السيسي وهيفضل يبرر كده وهيختلف أسلوب تبريره للفشل على حسب مستواه الفكري، وهيفضل عامل زي الطالب اللي بيسقط في كل المواد وكل شوية يقولك ما أحمد اللي طلع الأول على الفصل ناقص درجتين أهو في الحساب، يعني مش أنا بس اللي فاشل، هي دي دماغه وهتفضل كده".
Comments