أحمد عبد ربه للسيسي: "لو مبتحبش التنظير اجتمع مع مهندسين كباري بدل المثقفين"

وجه أحمد عبد ربه أستاذ العلوم السياسية بجامعة القاهرة رسالة للرئيس عبد الفتاح السيسي على خلفيه لقائه بالمثقفين مفادها: “لو مبتحبش التنظير اجتمع مع مهندسين كباري".

وقال في تدوينة عبر حسابه على موقع التواصل الاجتماعي "فيس بوك": "إيمانًا من العبد لله بأهمية نشر الروح الإيجابية في ربوع الوطن، ولآن خير الكلام ما قل ودل، فأحب اختم تعليقاتي علي لقاء السيسي بالمثقفين في ٤نقاط".

وتابع: "التنظير مش حاجة وحشة، بالعكس التنظير مرحلة راقية من العلم والمعرفة (استغفر الله)، التنظير هو عبارة عن طرح غير بسيط (معقد) لمشاكل الواقع وسمات الظاهرة محل الدراسة أملاً في ضبطها والتوقع بسلوكها المستقبلي".

وتابع: "أعظم دول العالم قامت على وليعاذ بالله تنظيرات وعلي منظرين، وبالتالي فالتنظير بهذا المعني مش موجود تقريبًا في مصر إلا في أماكن نادرة ولدي قلة قليلة من الأشخاص، فياريتنا أصلاً طايلنه يعني".

وأضاف: "لما الرئيس يدعو "المثقفين" للحوار، وبعدين يقول لهم "انتوا بتميلوا للتنظير" فهو كدة غالبًا غلط في العنوان، عزيزي رئيس الجمهورية، المثقف مهمته (استغفر الله) إنه ينظر، لو حضرتك مبتحبش التنظير ابعت جيب مهندسين الكباري والإنشاءات اجتمع معاهم مش المثقفين".

وواصل: "عزيزي "المثقف" لامؤاحذة، لما حضرتك تروح تقابل الرئيس وبعدين ترجع تتريق علي زملاءك وزميلاتك لأنهم بينظروا وضيعوا عليك الوقت، فانت غالبًا تايه أصلاً ومش فاهم دورك في الحياة، انصحك تسيب الثقافة وتلتحق بالسباكة أو النجارة أو أي مهنة تانية شريفة ومحترمة وعملية".

وذكر: "عزيزي المواطن الشريف، لازم تفهم أن "التنظير" اللي مش عاجبك ده، حتي الآن ساتر بيوت كتير وحافظ ناس كتير من السجن والبهدلة ووجع القلب، لأن سلو البلد والسلطة هو أن اللي بينظر ده شخص "نخبوي" مفيش منه ضرر فممكن يتغلس عليه كدة علي خفيف من وقت للتاني في الرايحة والجاية، لكن تأكد أن أول ما المنظر ده هيقرر ينزل الأرض ويقرب من الواقع بحسب نصيحة الرئيس هيلبس قضية تمويل أجنبي أو قلب نظام الحكم".