فيديو.. ماذا قال باسم يوسف عن جهاز الكفته مع عصام حجي

قام الإعلامي باسم يوسف ، بنشر حوار له مع الدكتور عصام حجي ، مستشار رئيس الجمهورية السابق، بمناسبة الذكرى الثانية لجهاز «فيروس سي».

قال «باسم»: «النهارده يا جماعة معانا الدكتور عصام حجي في ذكرى مرور سنتين على جهاز الكفته اللي كان المفروض هيساعد ملايين المرضى، ويدخلنا عملة صعبة، ويطلع مصر من عثرتها، دكتور عصام حضرتك كنت قريب من دوائر صنع القرار، حضرتك شفت الجهاز».

ورد عليه «حجي» قائلا: «أيوة شفت الجهاز وفكيته وفتحته ولما تفتح الجهاز بتلاقي فيه أريال، طالع منه سلكين، متوصل بقاعدة بلاستيك، وجوة الجهاز المختصين قالولي إن الجهاز كان فيه حجر مكي بيساعد في لقط الإشارات اللي بتيجي من الفيروسات ومفيهوش أي شيء إلكتروني أو كهربي من داخله، الحجر المكي دا هو بيهدي الجهاز، أو يهدي العيانين».

ووجه له باسم يوسف عتاب ساخر قائلا: «حان الوقت تندم على المصيبة اللي أنت عملتها إنك حرمت مصر من الجهاز ده».

وأضاف باسم: «عايزين نفكر الناس إن الدكتور العظيم جمال شيحة، اللي هو عمل الجهاز ده، بقى عضو مجلس الشعب بالتعيين، مختار يعني، وطبعا الدكتور عبدالعاطي اللي إحنا مش عارفين هو فين لحد دلوقتي، أكيد بيعمل دراسات كونية».

من جانيه قال حجي: «كنت أتمنى الناس والإعلاميين يعتذروا»، فقبله باسم يوسف، وقال له: «والله أنت طيب قوي».

وفي النهاية قال «باسم»: «شكرًا يا جماعة وإحنا آسفين جدا بجد، وهابي كفتة تو إفري وان».