10 هدايا غير تقليدية للأم بعد الولادة

دايمًا ميلاد بيبي جديد في أي بيت أو عيلة أو مجموعة صحاب بيكون حدث مهم جدًا زي ما بيستاهل الانتظار، بييجي وراه تفكير في الهدايا المناسبة للاحتفال بالحدث المهم ده. 

في المناسبة دي فيه مجموعة من الهدايا التقليدية، زي النقطة بالفلوس، والهدايا الدهب، وهدوم البيبي أو البطاطين أو حتى الألعاب الصغيرة. 

من موقعي كواحدة لسه خارجة طازة من تجربة ولادة فكرت أقولكم على مجموعة من الهدايا المختلفة، واللي غالبًا هتكون مفيدة جدًا للأم الجديدة. وأيوه بقول الأم الجديدة، لأنها عادة بتتنسي في الهدايا اللي بتكون معظمها موجهة للمولود الجديد، وناسيين يا جماعة إن الست اللي حملت وولدت دي محتاجة هدايا كتير جدًا والله عشان ترفع من معنوياتها وتحسّن شوية من حالتها النفسية اللي اتبهدلت معاها طول الشهور دي.

1- الأكل ثم الأكل ثم الأكل

بعد الولادة الأم بتكون محتاجة جدًا للغذاء، مهم طبعًا إنها تاخد الفرخة المسلوقة مكان العيل اللي نزل عشان تصلب طولها، لكن بيبقى نفسها والله تاكل أكل متنوع وحلو، وأكيد أكيد معندهاش أي قدرة أو صحة أو وقت إنها تقوم تطبخه، فإيه المانع إن الواحدة تدخل على صاحبتها الوالدة بصينية مكرونة بشاميل، أو لازانيا بالسبانخ، أو فراخ محشية رز، أو صينية بطاطس بيوريه، أو طاجن رز بالكبد والقوانص، أو قالب كوسة بالبشاميل.. بأكدلكم إن دي حاجات بتفرح جدًا، مش بس في الأيام الأولى بعد الولادة، لا كمان لمدة شهور، لأن العناية بالبيبي الصغير مش بتسيب وقت ولا طاقة لدخول المطبخ والتفنين فيه. ومفيش مانع كمان لو صاحبتك وعارفة وجبتها المفضلة من مطعم معين تاخديها معاكي، أو تروحي تدفعي تمن أوردر يوصلها ع الغدا، وفكرة كويسة كمان لو ودتيلها الأكل جاهز ع السوا عشان تشيله ف الفريزر وتطلع منه وقت ما تحب.

متتخيليش قد إيه أي أم ممكن تقدّر حد ياخد منها البيبي برة أوضتها ويسيبها تنام ساعتين اتنين بس على بعض. البيبي الجديد بيكون عنده احتياجات على مدار الساعة، ومعظم حديثي الولادة بيكون صعب جدًا التنبؤ بمواعيد نومهم، ممكن يناموا 10 دقايق وتطلب معاهم رضاعة، وممكن يناموا نص ساعة ويصحوا عايزين يتكرعوا، الموضوع بيبقى مرهق جدًا للأم اللي كانت متعودة تنام 8 ساعات حلوين على بعض ودلوقتي مش عارفة تقفل الساعة من غير ما تصحى، ولو نامت بتنام بعين واحدة، خايفة البيبي يشرق أو يرجّع على نفسه أو حتى خايفة تنام بجد فيغدر بيها ويصحى، أحلى وقت بالنسبة لي في الشهر الأول بعد الولادة، لما كانت أختي بتاخد النونو وتقفل عليّ الباب عشان أنام.. أنام بجد.

3- ميعاد في مركز التجميل 

معظم الستات في فترة الحمل بيمروا بصراع أفكار كتير تخص صورة الجسم ومشاعر متناقضة ناحية جسمهم اللي بيتغير، ده بيستمر لمدة مش قليلة بعد الولادة كمان، زيادة في الوزن ومناطق غامقة وعلامات تمدد والهدوم القديمة بتاخد فترة على ما ينفع تتلبس تاني وممكن متنفعش أبدا، بتكون الأم نفسها تاخد دش محترم، وتسرح شعرها، وتبص في المراية فتشوف نفسها جميلة زي ما كانت متعودة، لكن كل ده في الغالب مبتلحقش تعمله، وساعات كتير ممكن تفضل طول اليوم بالبيجاما اللي ريحتها تكريع البيبي وقشطه، عشان كده هيرفع معنويات الأم أوي إن يجيلها ميعاد في مركز تجميل هدية، تعمل شعرها، وضوافرها، وممكن كمان حمام مغربي أو body wrapping، ويا سلام لو نص ساعة مساج بقى! الحاجات دي هتفرق كتير في نفسيتها وهترجعها تحس إنها عايشة بجد.

وما أدراك ما تنظيف الشقة! عادة بيكون بيت الأم الجديدة بيستقبل الضيوف لوقت طويل، كمان بيكون نفسها في الوقت الفاضي تعمل حاجة غير إنها تنضف الشقة، زي إنها تستحمى مثلاً أو تشرب الشاي وهو لسه سخن، عشان كده لو إنتي صاحبتها قوليلها إنها ممكن تقعد تتستت وإنتي هتنضفيلها المطبخ والحمام، أو هتروقي غرفة المعيشة، ممكن تاخدي ف إيدك نوع الورد اللي هي بتحبه وتحطيه في الفازة، أو تاخدي نوع بخور حلو أو معطر للجو، فتحس إنها عايشة في شقة حلوة زي الناس، ده هيخفف جدًا من إحساسها إنها عاجزة ومش قادرة تسيطر على الوضع.

وقت طويل جدًا من حياة الأم الجديدة في الشهور الأولى بتقضيه في الرضاعة، أو شايلة البيبي عشان يتكرّع، أو عشان تنيمه ف حضنها، الوقت ده من طوله ومن الملل اللي بتحس بيه الأم ممكن تقعد تزيد وتعيد في عد صوابع رجليها، فلو ميزانية الهدية تسمح بشراء كيندل أو تابلت أو موبيل هتكون حاجة عظيمة، لأنها هتسمحلها بالقراءة أو اللعب أو الوجود على شبكات التواصل الاجتماعي عشان تتابع الكوكب بيحصل فيه إيه وهي في عزلتها المؤقتة.

إذا افترضنا جدلاً يعني إن الست بعد ما بتولد بيرجع جسمها زي قبل الحمل وقدرت تلبس هدومها القديمة، فمش شرط أبدًا تكون الهدوم دي مناسبة للرضاعة، ده مأزق أمهات كتير بيقعوا فيه بعد الولادة بأسابيع قليلة، وبيلاقوا نفسهم مضطرين يبدلوا بين بيجامتين اتنين، أو يفضلوا لازقين في نفس التيشيرت لأنه سهل في الرضاعة، والحقيقة إن الأم زي البيبي بتحتاج تغيّر هدومها كتير، لأنه بيترجّع عليها حضرتك بمعدلات خيالية، وفي نفس الوقت معندهاش برضو الوقت ولا الفلوس ولا الطاقة، عشان تنزل تشتري لنفسها حاجات جديدة تلبسها وهي فرحانة وحاسة إنها حلوة.

بيفضلوا يقولوا للأم الجديدة كُلي كويس عشان تتغذي، أو عشان تغذي النونو، لكن فيه سبب تاني مهم للأكل، وهو إن الرضاعة في أحيان كتير بتجوّع جدًا، وبتيجي الأم بين الوجبات تبقى حاسة إنها ممكن تاكل دراع أي حد جنبها. فممكن تدخلوا عليها بعلبة كب كيك كبيرة، أو كوكيز أو قراقيش وبقسماط، أو أاي نوع من المخبوزات بتحبها، وممكن كمان شوية مكسرات متنوعة، وتقدروا تختاروا أصناف صحية زي الفاكهة والفشار والكورن فليكس أو حتى الفول الحراتي.

8- هارد عليه أفلام ومسلسلات أو كتب

لأنه زي ما قلتلكم أول 3 شهور بتكون الأمهات غالبًا متفرغات تمامًا للنونو الجديد، يعني مفيش شغل، وخروج نادر، وقعدة طويلة في مكافحة المغص والغازات والجوع والبكاء غير المبرر، فلو خدتيلها هارد عليه أفلام ومسلسلات متنوعة على ذوقها، هتكوني بتسلّي وقتها لمدة طويلة جدًا، ولو كانت من محبات القراءة، يبقى إيه المانع تاخدي ع الهارد كمية محترمة من الكتب الـpdf اللي هتخليها تعرف تقرأ وهي إيديها الاتنين مشغولين.

فكريها إنها لسه أنثى، ولسه ست، لأنها احتمال كبير تنسى نفسها. ممكن حمام كريم أو زيت للشعر، منظف للبشرة، صنفرة، لوشن بريحة مميزة، شاور جل خطير، برفانات ومكياج ومانيكير.. كلها حاجات هي مش هتفكر تجيبها لنفسها في الفترة دي، لكن هي فعلاً هتتبسط، لأن نفسها تحس بشبابها برضو!

10- قعدة بنات من بتاعة زمان