المحتوى الرئيسى

أهم 15 حاجة لتكوني متمكنة في حياتك الزوجية

12/31 06:55

كتير حاجات بتشوفي ماما بتعملها باستمرار. لازم تبقي عارفة أساسيات ماما بتعملها عشان متتفاجئيش إنها بحذافيرها بتتطلب منك بعد الجواز.

وليكى معايا أهم 15 حاجة هتعمليهم.

الأكل شيء لا غنى عنه في كل بيت، أصلك مش هتقضي عمرك دليفري أو مطاعم، لأ، الأكل في البيت من التابوهات المقدسة، الأكل ما هو إلا نفّس ومقادير، منها هتطلعي أحلى أكلة.

من وإنتي بنوتة في بيت العيلة زي ما اتعلمتي الذوق في اللبس والألوان والموديلات، اعرفي بيتغسلوا إزاي، فيه هدوم لو اتغسلت في الغسالة هتبوظ، وفيه هدوم هتبهت وممكن تبوظلك هدوم تانية، فيه هدوم فواتح بتتغسل مع بعض وفيه غوامق مع بعض، فيه غسيل كل يوم.

من أساسيات كل مكان في الدنيا، شوفي ماما بتعمل إيه ف البيت، سواء ترويق أو تنضيف، فيه حاجات كل يوم وفيه حاجات موسمية زي البطاطين والسجاجيد والستاير، بينما الكنس والمسح من الأمور الدورية.

النضافة الشخصية صفة رئيسية في كل شخص، عالم البنات بيبتدي من بدري شوية لأن طبيعة البنت إنها بتاخد بالها من نفسها، كمان لو الاهتمام بدأ من الصغر هيستمر معاكي لحد ما تتجوزي.

الزوج قبل جوازه بيبقى مستهتر ومعتمد اعتماد كلي على والدته، هنا لازم تقومي بدور الأم والزوجة، تشوفي مامته بتهتم بيه إزاي، أكله وطريقة لبسه والتفاصيل الصغيرة اللي هتبان معاكي في العشرة، فيه زوج بيحب كل اللي والدته بتعمله، وفيه اللي يحب يجرب معاكي أساليب وفنون الطبخ الحديثة، اتعاملي على قد ما بتقدري، شوفي هو غاوي إيه واعمليهَ.

في بداية الحياة الزوجية هيحصل تهدير كتير في مصروف البيت، ولو بتتعلمي الأكل في أول سنة مثلاً هتبوظي كتير على ما الأكل يظبط، كمان هتلاقي نفسك بتشتري كميات من الخضراوات والفواكه تكفي أكتر من فردين، معلش كله بالممارسة هيتحل وهتلاقي نفسك بعد فترة بتشتري أقل في الكمية.

الأطفال نعمة من عند ربنا، لازم تكرسي ليهم وقتك كله، زي ما الإعلان بيقول "الأمومة مش سهلة، بس مستاهلة"، البيبي الأولاني الموضوع معاه هيبقى تدريب ولعب، إنتي أم لأول مرة وهتبقى كل مشاعرك أولية.

مهمة من مهامك اللي هتجربيها بنفسك من ساعة ما تقرري مع باباه إنكم تدخلوه مرحلة الحضانة، مستمرة إلى ما شاء الله، ساعتها بتتحولي من أم ظريفة لطيفة لميس بتبرق وتزعق لعيالها، وده عشان يطلعوا أحسن منها، إنتي قوية متضعفيش.

من الضروري في الوقت الحالي إن البيت ميرتكزش على مرتب الزوج بس، لأن كل حاجة غالية والمتطلبات للأسف كتير ومتنوعة، فلو فيه فرصة حقيقية أرجوكي متضيعيهاش حتى لو مرتبها قليل، يكفي إنها تكفي احتياجاتك الشخصية ع الأقل، ويبقى كده شيلنا مسؤولية ممكن تكون تقيلة ع الزوج.

من الضروري كل فترة إنك تجددي روتين حياتك، ومفيش أحلى من إنك تروحى لمامتك وإخواتك كل فترة إنتي وزوجك محددينها، منها يشوفوا الولاد ويلعبوا معاهم ومنها تسترجعي يوم من أيام زمان ومنها توحشي جوزك، أما الأصدقاء فهي الحاجة الوحيدة اللي اخترناها في دنيتنا، وعشان كده لو الصداقة حقيقية هتستمر طول العمر، ومش هيهم بتشوفوا بعض كل قد إيه، المهم لما تتقابلوا هترجعوا لروحكم القديمة قبل ما تغيرها الأيام.

إن لبدنك عليك حق، متهمليش في نفسك عشان متندميش بعدين، من وإنتي صغيرة خلي بالك من جسمك وتغيراته اللي هتتغير من سن المراهقة بكل التقلبات اللى فيه لسن الشباب وعنفوانه من حيث النضج، وطبعًا جسمك في شبابك هو نتيجة إهمالك أو اهتمامك، لو مهمل هتحسي كده إن المعالجة مكلفة ماديًا ومرهقة معنويًا، وعشان ده ميحصلش اهتمي بجسمك أرجوكي من وإنتي صغيرة.

ناس كتير بتعيش وتموت وهي متعرفش إنها موهوبة بحاجة معينة، هوايتك هتبان من وإنتي صغيرة. يمكن رسم، يمكن موسيقى، ممكن رياضة، أي موهبة مع اهتمام هتنمو ويمكن تبقى مصدر رزق بعدين ليكي، لو تم تنميتها واستغلالها بطرق سليمة، صدقيني هتنبسطي بيها وهتفرق في حياتك.

زمان كانوا جداتنا وأمهاتنا عندهم ماكينات الخياطة، الجاهز مكانش متوفر زي دلوقتي، النهارده الموضوع اختلف بإنه اختفى أصلاً، بس إنتي لو اتعلمتي الخياطة هتحسي بفرق وبفرح داخلي ملوش مثيل، اتعلّمي حاجة تحبيها ووقت الزنقة تنفعي بيها نفسك، أما لو حبيتي الموضوع ووقعتي في غرامه فأنصحك تتعلمي الشغلانة على أصولها، وهتغوصي فيها جدًا.

جزء الحلويات والمخبوزات غير الطبيخ التقليدي خالص، مع إنهم الاتنين في المطبخ، طبعًا فيه حاجات سهلة خالص بتعمليها من وإنتي في بيت ماما لإخواتك الصغيرين، صدقيني جوزك هيحب يجرب الحاجات دي، زي الكيكة والجيلي والكراميل والمهلبية والكسترد، كله حلو وبسيط في عمايله، فاتعلميهم.

أهم أخبار مرأة

Comments

عاجل