المحتوى الرئيسى

حكاية العمر كله

10/23 16:37

بالساعات كان كلامنا.. مكنش بيخلص الكلام.. كان الكلام كما الشلال دايما هادر.. حتي صمتنا كان كلام.. لا.. كان صخب.. صمتنا كان صخب،

كان دوشه، مكنش مجرد كلام.

وتمر السنين، والكلام يبقي بيت.. والصمت يبقي ولاد وبامبرز وصينيه بطاطس.

وتمر السنين ويقل الكلام ويزيد الصخب.. يبقي دمعه ويبقي فرحه.. عمليه لوز وحفله تخرج.

وتمر السنين ويزيد الصخب ويقل الكلام.. يبقي غلطه واعتذار.. يبقي قعده ع المارينا وصرخه فرح لما السناره تطلع بالكليماري بيرقص.

كان كلامنا وصمتنا دايما حكايه، وهايكون حكايا.. الف ليله وليله نحكيها لولادنا.. عن اول دقه قلب واول مسكه ايد، واول انبهار بصوت وليد.. احساس غريب، ال ايه بقيت انت اب وبقيت انا ام.. الحق.. بيقولوا علينا عيله.. اب وام ووليد. دا احنا لسه في الطفوله.. ازاي هانربي وليد؟!!!

اهو الوليد بقي فرحه كبرت وبنستني منه الوليد.

احكي كمان للولاد عن اول دمعه واول خوف واول رعب ع الحلم يروح، مره في حادثه، او في غرفه عمليات مقفوله علي حته من القلب نايم علي بنش الطبيب.

كل حدوته تبتدي بكلمه "اول".. كل حاجه مع بعض كانت اول واول واول.. كنت ليا اول كل حاجه، وكنت ليك.

لما بتزعلني كنت وما زلت باستغرب !!!! هو ينفع حته منك توجعك متعمده؟!!!

و لما تيجي عشان تصالح بوقاحه المستغرب ازاي تصدقي اني ممكن ازعلك، هو ينفع حته منك تزعلك متعمده؟؟!!!

يا صاحبي الانتيم وحلم السنين الطويله اللي فاتت، واللي مش فاكره كنت ايه قبلها، ولا انت فاكر.

هو احنا كنا فعلا قبلها؟!!!!

بيقولوا كنا.. واحنا نضحك ونقول ما كنا.

يا قصه العمر اللي اتحولت اربع قصص، بنتين وولد وقصه المبتدا والمنتهي.. يا اول الحكايه بلا منتهي.

حدوتي انا.. يمكن مانيش جولييت ولا ليلي ولا عبله عنتره. ولا انت فارس فوق حصانك ولا انت اوسم رجال زمانك.. بس انت بطل قصتي، وانت الوسيم المشتهي والمبتغي.

أهم أخبار مقالات

Comments

عاجل