ليالى قريش.. 148

لما دعا النبي لـ الدين الجديد سرا، كان مصعب بن عمير عنده 14 سنه، ولما اعلنت الدعوه كان وصل 17، وهو اسلم في الوقت ده تقريبا، ممكن قبلها بـ شويه او بعدها بـ شويه.

هو مصعب، بن عمير، بن، هاشم، بن عبد مناف، بن عبد الدار، بن قصي "وكلنا عارفين الباقي"، وعلشان فيه هاشم وفيه عبد مناف، فـ فيه ناس بـ تتلخبط وتحسبه في بني هاشم، انما هو مش من هاشم خالص، هو من ولاد عبد الدار لو احنا فاكرينه.

مصعب كان شاب مرفه، وقريب النضر بن الحارث، وابوه وامه معاهم فلوس، وبـ الطبع مكنش ممكن يتعرض لـ التعذيب او الاضطهاد، هو كان خايف امه تزعل منه، وتحبسه فـ البيت، وهو ده اللي حصل فعلا، لما قفشه قريبه عثمان بن طلحة "اللي كان معاه مفتاح الكعبه".

عثمان شاف مصعب بـ يصلي، فـ راح قال لـ امه، فـ حبسته في البيت، وعملت اضراب عن الطعام، علشان يرجع عن اللي في دماغه، وفضل مصعب محبوس شويتين لـ حد ما هاجر لـ الحبشه، فـ خليها لما نيجي لـ هجره الحبشه، علشان ده موضوع كبير.

انما اسلام مصعب كان مهم، لـ انه كان تقريبا الوحيد اللي قبل الدعوه من بني عبد الدار "حمله اللواء" وهو الوحيد من اللي عندهم حيثيه، وفي غزوه بدر مثلا، كان عدد اللي حضروها من بني عبد الدار اتنين، مصعب وواحد تاني اسمه سويبط بن سعد.

سويبط كان عديم الاهميه لـ درجه ان الناس بـ تغلط في اسمه، ومختلفين هو هاجر الحبشه ولا لا، وكل ذكره في باب الفكاهه، لـ انه كان بـ يحب المقالب والهزار، وعموما هو من افرع عبد الدار القويه، اللي هم بـ الاساس ولاد عبد مناف بن عبد الدار.

تنوع المسلمين الاوائل كان مهم جدا بـ النسبه لـ الدعوه، ومن الواضح حرص النبي علي هذا التنوع، وده شاهد تاني علي ان تصوير الدعوه بـ اعتبارها ثوره هاشميه ضد بني أمية هو تصوير غير دقيق.

يعني لو احنا عدينا مثلا مقاتلي بدر، اللي هم اوائل المسلمين، هـ نلاقي ان اللي شهدوا بدر من المهاجرين حاجه وتمانين شخص، معروفين بـ الاسم، نقدر نعد منهم علي الاقل 37 واحد من الموالي والاحلاف، مش من عائلات اصليه، يعني ما يقرب من نص الكتله الاساسيه لـ الجسم الاسلامي.

نقدر نقول ان الدعوه لـ الاسلام في بدايتها كانت موجهه الي عموم البشر، وتستهدف بـ وضوح تجاوز الاعتبارات القبليه، بس علشان تتجاوز هذه الاعتبارات لازم تذاكرها كويس، وتراعيها، علشان تقدر تستفيد من تناقضاتها علي الاقل.

معركه الاسلام الاولي مكنتش ضد سادات قريش، قد ما كانت ضد التركيبه القبليه المترسخه حتي في نفوس من قبلوا الدعوه، وهـ نلاحظ انه كان فيه فرق شاسع بين فهم النبي نفسه لـ الموضوع ده، وفهم الصحابه، يعني هو يجوز بنات عمه وقرايبه لـ الموالي، لكن الصحابه ما يرضوش.

من هنا نقدر نفهم الخطاب الاسلامي في مكه، اللي بـ يهاجم بـ ضراوه تكنيز الاموال والاعتماد علي الحسب والجاه، في مقابل خطاب المدينه بعد ما استتب الامر، اللي هو "خياركم في الجاهليه، خياركم في الاسلام".

وكمان نقدر نفهم ان واحد من رفض سادات مكه لـ دعوه الاسلام انه يؤلب علينا عبيدنا، لـ درجه انهم كانوا بـ يطلبوا من النبي، انه لو مصر علي الدعوه يطرد عنه الاوباش والموالي، وانه كان هـ يعمل كده في اطار تفاهمات، لولا نهاه القران عن كده.

المهم، قبل ما نسيب مصعب دلوقتي، هـ نعرف ان مصعب كان من اوائل الناس اللي اتجوزت جوازات اسلاميه خالصه، لما اتجوز حمنه بنت جحش "واحده من ولاد جحش الخمسه الموحدين قبل الاسلام".