‫تجربتي مع اوبر Uber : مش هركب تاكسي تاني !

واقف نص ساعه بتدور علي تاكسي في عز الحر، وبعد ما شويه رفضوا وغيرهم  طلبوا ضعف الاجره الطبيعيه اخيرا واحد وقفلك، عربيه متهالكه و التكييف مش شغال ولا االعداد . السواق رغاي وبيدخن طول الطريق وعمال يشتم في الرايج والجي، او لو انتي بنت عمال يستظرف ويعاكس ، بعد ما وصلت بتديله فلوسه مش عاجبه وبيتخانق علي 5 جنيه زياده واحتمال يشتمك وانت ماشي لو مخدش الرقم الي علي كيفه. دا اصلا لو كان نزلك مكان مانت عايز مقالكش معلش انزل هنا عشان انا مش داخل يمين.

تجربه سواق التاكسي ممكن تبقي مخيفه

Uber اوبر شركه بدات لما ترافيس كالانيك (مؤسس Uber) اتعرض لتجربه شبه الي فوق دي وقرر انه يحاول يشوفلها حل. كالانيتش قرر يعيد تصميم تجربه ركوب التاكسي من اولها خالص، ويشيل منها كل المشاكل الي خلت تجربه التاكسي سيئه كدا.

اوبر ، سائقك الخاص !

Uber اوبر  قررت تغير اللعبه تماما ، بدل ما تاجر تاكسي عشان يوصلك ، Uber اوبر هتخليك تركب عربيه خاصه ، هم بيتفقوا مع اصحاب عربيات عشان يشتغلوا لحساب Uber ويكونوا اسطول عربيات خاصه في خدمتك !

بتقف في الشارع ساعه تستني تاكسي؟ : باستخدام البرنامج هتدوس علي زرار في تليفونك هتجيلك العربيه خلال دقايق!

التاكسيات دايما مبهدله ومتهالكه ؟ : Uber اوبر مبتقبلش عندها غير عربيات نضيفه و من تجربتي معاهم ، العربيات في منتهي الشياكه والنضافه ومن قبل ماتركب التكييف شغال.

دي بالظبط العربيه الي ركبتها في اول تجربه

طوله اللسان والتحرش بالبنات والسخافه ومعلش انزل هنا عشان مش داخل يمين وكل المشاكل المتعلقه بالتعامل مع سواق تاكسي ؟

السواق بيبقي متسجل عندهم، لما بتطلب عربيه بيطلع قدامك رقم العربيه ونوعها و اسم السواق وصورته (بالمناسبه مش كلهم رجاله في ستات كمان :)) وتقييمه، لما بتخلص مشوارك،البرنامج بيطلب منك بتحط تقييمك للسواق و تعليقك، متوسط التقييم بيطلع قدامك وتقدر تبص علي التعليقات، فالسواق بيهتم جدا يقدملك تجربه كويسه عشان تقيمه كويس لان Uber اوبر هتشيله لو تقييمه قل عن مستوي معين، فالموضوع امن من اي وسيله تانيه خاصه للبنات .

الخناقه علي الفلوس والفكه ومشكله العداد؟

روبرت دي نيرو في Taxi driver

Uber اوبر قررت تلغي المشكله دي خالص، وانت بتسجل بياخدوا بيانات بطاقه الائتمان بتاعتك ، ولما بتطلب العربيه بتحدد مكانك ونازل فين والبرنامج بتاعهم بيتابع المشوار للاخر مع السواق و البرنامج بيحسب التكلفه اوتوماتيك (التعريفه موجوده اونلاين) وبيخصمها من حساب الائتمان وخلاص، كانك راكب ليموزين بتوصل بتنزل وتمشي مبتكلمش السواق اصلا

Uber اوبر دخل القاهره من فتره قريبه ولسه في البدايات، قررت اجربه واشوف هل التجربه بجوده الكلام النظري ؟، وكمان عشان اجاوب علي السؤإل آلاهم علي الاطلاق والي بيتردد دايما لما بتيجي سيره Uber اوبر :

هل Uber  اغلي كتير من التاكسي ؟ مهو اكيد مش هيبقي عربيه خاصه ونضيفه و تعامل كويس وبطاقات ائتمان وكانك راكب ليموزين ومتبقاش اغلي كتير من التاكسي؟

A photo posted by Nour El Din (@z3r0hack3r) on Sep 14, 2015 at 12:23am PDT

جربت Uber اوبر حتي الان في مشوارين من مكرم عبيد لحسن صبري في الزمالك مره ذهاب ومره عوده وجمعت ردود فعل من اصدقاء اعرفهم بيستخدموا الخدمه ودي كانت نتايج التجربه :

– العربيه : واحده كانت اوبترا سوده جديده ، والتانيه نيسان صني جديده برده والاتنين في قمه النضافه جوا وبره، العربيتين اول ما ركبتهم كان التكييف شغال اصلا.

السواق: في الاولي شاب صغير في اوائل التلاتينات كدا ، بيشتغل تفاريح ساعتين 3 الصبح وبيحب السواقه، شاب لطيف جدا اتكلمنا شويه صغيرين وكنا بنتريق علي Google Maps الي مصر اننا نمشي من تحت الكوبري ومنطلعش اكتوبر.وفضلت ساكت بقيه السكه، رغم انه مدخن بس مطلعش سيجاره طول الطريق عشان التكييف ، واسلوبه في التعامل كان شيك جدا. ولما وصلنا كنا تهنا شويه وعديت العماره الي عايزها واكتشفنا انها ورا شويه فقلتله خلاص هنزل انا اتمشي الحته دي، قال لي لا ليه تمشي؟  واضطر يطلع ويلف لفه طويله عشان ينزلني مكان مانا عايز وسط ذهولي طبعا من حسن المعامله الي مش معتاده لما بتركب تاكسي.

في التجربه التانيه كان راجل كبير شويه، من اسلوبه عندي انطباع انه اشتغل سواق قبل كدا، customer oriented اوي وكنت حاسس اني رئيس مجلس اداره طالع من الشركه وعربيه الشغل مستنياه، وقال لي اتفضل ورا اريحلك وقعدت ورا فعلا.

الاتنين اعتذرولي كتير عشان اتاخروا دقيقتين عشان الزحمه وكدا!.

التكلفه ؟ : سالت اصدقائي الي ركبوا المشوار دا عن التاكسي بياخد كام والرقم الي اتقال لي من 30 ل 40 حسب الزحمه.

Uber اوبر في الرحله الاولي خدوا 34.5 وفي التانيه 31

يعني زي التاكسي او ارخص (التكييف شغال خلي بالك).

طيب هل دا معناه ان كل حاجه كويسه؟

لا ، فيه شويه حاجات محتاج تعرفها عن Uber اوبر ، بشكل شخصي مش بعتبرها عيوب ، بشوفها توابع طبيعيه لانهم لسه في القاهره جديد ، بس انت كمستخدم لازم تعرف الكلام دا..

السعر ساعات بيكون الضعف !

Uber اوبر لسه جديده، والعربيات بتاعتهم مش كتيره، فاحيانا بيعملوا حاجه اسمها 2X او 1.5X ويخلوا السعر مضروب في 2 او 1.5 عشان يشجعوا السواقين يشتغلوا في المنطقه دي.

دا بيكون باين ليك في البرنامج وبيعرفك انه السعر زياده، وبيكون لفتره معينه، ليك تختار توافق تركب بالسعر دا ولا تقوله يعرفك لما السعر يرجع طبيعي .

في الرحله الاولي الحقيقه دافع 34.5 في 2 يعني 69 جنيه في مشوار ياخد 34.5 بسبب موضوع الضعف دا.

لان العربيات قليله، مش دايما المكان الي انت فيه هتلاقي عربيه Uber اوبر قريبه، عشان كدا ركبت من مكرم عبيد مع اني ساكن ابعد شويه لكن طلعت لمكرم عشان الاقي عربيات قريبه تبعهم لاني ملقتش عند بيتنا.

مش كلنا عندنا بطاقات ائتمان بس ليها حل، طلع كارت انترنت من اي بنك ( برشحلك credit agricole اجراءاتهم سهله) بينفع عادي.

وعندهم مشاكل في بطاقات الائتمان عامه، لما اشتركت في الاول البرنامج مكنش راضي يقبل الكارت و لما قبله كنت لما اطلب عربيه يقول لي الكارت مش شغال والمشكله متحلتش غير لما بعتت لخدمه العملاء بتاعتهم.

تعريفه Uber اوبر مش بعيده عن التاكسي اوي، نظريا اغلي سنه لكن التجربه العلميه اثبتت ان دا مش حقيقي، لكن Uber اوبر ليها حد ادني في التكلفه وهو 8 جنيه، فلازم مشوارك يكون اكتر من كدا يا اما برده هياخد ال8 جنيه، فUber اوبر مش صالح اوي للمشاوير القصيره.

برده فيه تكلفه علي الغاء طلبك، لو طلبت عربيه وبعدين رجعت في كلامك بيخصم 8 جنيه لان السواق بيكون اتحركلك مخصوص وخسر مشوار، بس في نفس الوقت لو لغيت خلال ال5 دقايق الاولي بعد الطلب بيتغلي ببلاش عادي.

ازاي تشترك في الخدمه ؟

واجهه البرنامج، الزرار الي في النص دا بعمل كل حاجه تقريبا

وبعدين تضيف اسم الشارع الي رايحه وتدوس علي نفس الزرار تاني. .. بس خلاص!

Uber اوبر تجربه ممتازه !، بديل رائع للتاكسي وبيحل اغلب مشاكله خاصه للبنات الي بتعاني من سخافه سواقين التاكسي وصعوبه الوقفه في الشارع في انتظاره، ولي صديقات بنات كتير مبيستخدموش غيره دلوقتي ومبسوطين جدا.

الموضوع يستحق التجربه بشده، وعيوبه بسيطه حتي الان واظنها مع الوقت وانتشاره هتتعالج وهيبقي منافس حقيقي للتاكسي.