ليالى قريش.. الليلة 130

هـ تلاقي كتير من الصحابه، كل واحد بـ يعتبر نفسه تالت واحد اسلم، او رابع واحد اسلم، او بـ الكتير سادس واحد اسلم، يعني مثلا سعد بن ابي وقاص بـ يعتبر نفسه تالت واحد اسلم، وابو ذر الغفاري بـ يعتبر نفسه رابع واحد، وعمرو بن عبسة كمان بـ يعتبر ، ابن مسعود

مفيش حد منهم بـ يقول كلام مش حقيقي، محدش بـ يكدب في تقديري، بس ده مش مظبوط، هو بس كل واحد بـ يقول اللي يعرفه، لـ ان الدعوه مكنتش معلنه، فـ كل واحد بـ يقول اللي يعرفه، يعني عمرو بن عبسه مثلا، لما النبي دعاه، هو سال النبي بـ وضوح عن عدد اتباعه، فـ النبي قال له: "معي حر وعبد"، يعني معايا واحد حر وواحد عبد، فـ الراجل اعتبر نفسه رابع واحد اتبع الدعوه، لكن ده مش مظبوط، بس النبي اكيد مكنش هـ يقول له: معايا فلان وعلان وترتكان.

لكن سير الامر بـ يقول ان الدعوه بدات في الاول علي كتاف ابو بكر، وهـ نلاقي في سيره ابن هشام مثلا، باب مخصص للي اسلموا بـ دعوه ابو بكر، فـ خلينا نشوف اوائل المسلمين واحد واحد:

عثمان بن عفان، صديق ابو بكر وقتها، واللي سيرته مليانه اسئله مالهاش اجابات بـ النسبه لي.

الاول: هو عثمان، بن عفان، بن ابي العاص، بن اميه، بن عبد شمس، بن عبد مناف، بن قصي بن كلاب، واحنا عارفين الباقي. وامه هي اروي، بنت كريز، بن ربيعه، بن حبيب، بن عبد شمس، بن عبد مناف، بن قصي بن كلاب، وكلنا عارفين الباقي.

تمام، بس امه كمان هي حفيده عبد المطلب، جد النبي، حفيدته مباشره من ناحيه الام، بنت بنته. يعني عبد المطلب خلف اولاد ذكور منهم عبد الله ابو النبي، وخلف بنات منهم واحده اسمها البيضاء (وفيه روايه ان البيضاء كانت توام مع عبد الله) والبيضاء اتجوزت كريز بن ربيعه، فـ خلفت بنت اسمها اروي، واروي خلفت عثمان بن عفان.

يعني، من جهه الاب، عثمان من بني أمية، وهي دي الجهه المهمه، ومن جهه الام هو بين عبد شمس وبني هاشم، بس جهه الام مش مؤثره عموما في مكه. المؤثر هي جهه الاب.

لكن عثمان له حاله خاصه شويه.

ابو عثمان (عفان بن ابي العاص) مات بدري، وما خلفش من مراته غير عثمان وبنت اسمها امنه بنت عفان. فـ ام عثمان، اروي بنت كريز، اتجوزت واحد تاني، اتكلمنا عنه قبل كده بـ شويه تفاصيل، هو عقبه بن ابي معيط، وعقبه هو اللي اتربي عثمان في كنفه، ودي ليها تاثيرات كبيره بعدين. عقبه خلف من اروي تلات ولاد وبنت، كانوا اخوات عثمان من الام: الوليد وخالد وعماره، والبنت ام كلثوم.

لما نحاول نفكر في الوضع الاجتماعي لـ عثمان قبل الاسلام، هـ نلاقي حاجات مالهاش اجابات، زي مثلا: ايه كان حجم عثمان كـ تاجر؟ هل فعلا كان من "كبار تجار" مكه؟ اصل حكايه كبار التجار دي شكلها مجانيه، اي حد بـ يتاجر يبقي من كبار التجار، زي دلوقتي، زي دلوقتي لو حد بـ يلعب في خمسه سته مليون، ممكن اهله يقولوا عليه رجل اعمال.

انما فيه حاجات بـ تقول لنا ان عثمان كان "يحطب في حبل" عقبه واولاده، ويحطب في حبلهم تعبير عربي معناه ملحق بيهم، وبـ يلعب في فلوسهم، اللي يدعم ده اخت عثمان الشقيقه، امنه بنت عفان، كانت بـ تشتغل ايه؟

ماشطه (كوافيره)، وهي مهنه بسيطه، شريفه وهايله، بس بسيطه اجتماعيا، ولما جت تتجوز، اتجوزت الحكم بن كيسان، والحكم كان مولي من موالي بني مخزوم، اللي هو مش عبد، بس يعني شغال عندهم، فـ ماشطه تتجوز مولي من الموالي لا يوحي ابدا بـ قدرات ماليه ولا اجتماعيه.