المحتوى الرئيسى

ليالى قريش.. الليلة 118

08/26 10:10

كان فيه واحده ست اسمها سعدي، متجوزه في بني كلب "قبيله في الشمال"، وجوزها هو حارثه الكلبي، خرجت من بيتها رايحه تزور قبيلتها، هجم عليهم قطاع طريق، وخدوا الفلوس، وخدوها سبيه، وخدوا ولادها يبيعوهم في سوق العبيد، وكان من ولادها طفل اسمه زيد، زيد بن حارثه.

في السوق، كان غالبا سوق عكاظ، اشتري الطفل زيد ده راجل من مكه اسمه "حكيم بن حزام"، اشتراه ضمن مجموعه من الاطفال العبيد، وكان تمن الطفل ده 400 درهم "حاجه زي 400 جنيه بـ اسعار دلوقتي" ورجع حكيم بـ الاولاد هـ يستخدمهم كـ عبيد في تصريف اموره.

حكيم اسمه بـ الكامل حكيم بن حزام بن خويلد، وعمته هي خديجة بنت خويلد، اللي بقالنا فتره في بيتها بـ نستعرض الاطفال اللي كانوا في كفالتها، فـ حكيم قال لـ عمته: انا اشتريت شويه اطفال من السوق، اختاري لك منهم واحد خديه هديه.

بصت خديجه عليهم، واختارت زيد بن حارثه، وبـ التالي انتقلت ملكيه الطفل اللي ما كملش عشر سنين لـ السيده الشريفه، اللي كانت علي وشك الزواج من زوجها الاخير محمد بن عبد الله بن عبد المطلب، فـ لما اتجوزت النبي حبت تدي له هديه، فـ ادته غلام هديه.

النبي خد الطفل، وقرر يربيه تربيه الولد مش العبد، وتعامل معاه بـ رفق وحنو، فـ الولد تعلق بـ سيده الجديد، ويقال انه اعتقه "حرره" ساعتها، ويقال بعدها بـ شويه، بس المهم انه كان بـ يعامله زي علي بن ابي طالب والزبير بن العوام وكل اللي كانوا في كنفه.

روحي يا ايام، تعالي يا ايام، ومكه دي زي ما احنا عارفين سنتر كبير لـ الحج والتجاره وكثير من الامور، فـ تقريبا كل الناس بـ تزورها، فـ اهل الولد تعرفوا عليه، او عرفوا انه في الحته دي مملوك لـ حفيد عبد المطلب بن هاشم.

فيه اختلاف فـ الروايات ازاي عرفوا ان الولد هنا، واشعار ودموع ومواقف مؤثره، بس المهم انهم عرفوا طريقه، فـ راح حارثه الكلبي خد حد من قرايبه وطلعوا علي مكه، وسالوا علي محمد بن عبد الله، ووصلوا له، وقالوا له: انتو احفاد هاشم، وجيران ربنا "علي اساس اهل الكعبه" فـ احنا قاصدينك في معروف، نشتري منك ابننا اللي عندكم "وده يخلينا نرجح انه مكنش لسه اعتقه لـ حد اللحظه دي".

النبي سال عن اسم الطفل، فـ قالوا له: "زيد بن حارثه"، فـ طلب هو منهم انه يجيب الولد ويخيروه، يقعد معاه ولا يسافر معاهم، ولو هـ يسافر ياخدوه ويمشوا. جه الولد، تعرف الناس دول؟ ايوه ده ابويا فلان وده عمي فلان. فـ سالوه، فـ هو اختار البقاء مع سيده اللي رباه وعلمه وعامله زي اولاده.

يا ابني فيه حد يفضل العبوديه علي الحريه؟

ايوه، انا، انا شفت من الراجل ده اللي مش ممكن اشوفه عند اي حد تاني.

تاثر النبي جدا، وطلع علي ساحه فيها جمع من الناس:

"يا معشر قريش، اشهدكم ان هذا ابني؛ يرثني وارثه"

دي كانت طريقه التبني وقتها، انك تعلن وسط الناس ان الطفل ده ابنك، يحمل اسمك، فـ يبقي له حقوقه الكامله عليك، بـ ما فيها الميراث.

من اللحظه دي الطفل ده بقي اسمه رسميا: "زيد بن محمد"، ورجع حارثه بلدهم سايب ابنه وهو ما بقاش ابنه، بعد ما اطمن عليه انه مش عبد عند الناس.

زيد هـ يكبر والنبي هـ يجوزه، اكتر من مره، وكل مره محتاجه كلام كتير، خصوصا التانيه، اللي خلت زيد يبقي الوحيد من صحابه النبي اللي اسمه هـ ييجي في القران صراحه، بس الكلام ده كله كان بعد الدعوه، فـ خلينا نسيب كل حاجه لـ وقتها.

أهم أخبار مقالات

Comments

عاجل