ليالى قريش.. الليلة 107

مخزوم هو ابن عم قصي بن كلاب، وولاد مخزوم كان ليهم نصيب من الشرف في قريش، من ايام قصي وانت جي، ومنهم جده النبي، ام عبد الله بن عبد المطلب (ابو النبي) وكان ليهم الناحيه العسكريه وتجهيز الجيوش، وبعد وفاه عبد المطلب، بني مخزوم بقالهم دور اكبر في السلطه، خصوصًا ان ظهر منهم اتنين من اكبر سادات قريش واكثرهم تاثيرًا، الوليد بن المغيره وابو الحكم عمرو بن هشام بن المغيره، المعروف في الادبيات الاسلاميه بـ اسم "أبو جهل".

الوليد اسطوره الاساطير، ابوه المغيره المخزومي، وفيه حكايه منتشره انه كان ابن زنا، وابوه الحقه بيه وهو عنده 18 سنه، بس ده كلام مشكوك فيه، مش احنا اللي بـ نشك، ده خلاف كبير بين اصحاب المنهج السلفي في قراءه التاريخ، مالناش فيه هنا، لكن الاغلب عندهم ان الحكايه دي ملفقه، وهو ده ما نتصوره كمان، صعب واحد بـ وضعيه الوليد يبقي كان فيه شك فـ نسبه.

الوليد كان ملياردير مكه، عنده قوافل ما ينفعش تدخل مكه من باب واحد، لازم تتوزع ع الابواب كلها علشان تدخل سوا، له استثمارات في الطائف زي عتبه بن ربيعه، بس واضح ان استثماراته كانت اكبر، لـ ان بـ تتوصف بـ صفات بلاغيه فخيمه، من نوعيه ان مزارعه كان "تثمر شتاء وصيفا".

والفلوس مش كل حاجه علشان الشرف، من كل النواحي مكنش الوليد ناقصه حاجه، عيال ذكور؟ كان عنده منهم كتير، لـ درجه ان ساحه داره ما كانتش تخلو من احدهم ابدا (واحد من ولاده خالد بن الوليد)، ومكنش بس عنده ولاد، ده كان دايما يتفشخر بيهم وبـ عددهم وبـ انهم من افاضل الناس واكابر القوم.

كانت قريش مدياله القاب مش معروف عددها، مسميينه "ريحانه قريش" ومسميينه "الوحيد" ومسميينه "العدل"، والصفتين دول مالهمش علاقه بـ انه وحيد ابوه، ولا انه عادل، انما ليهم علاقه بـ ان قريش كلها تكسي الكعبه سنه، وهو لـ وحده يكسيها سنه.

وخدمته لـ الكعبه كانت مثار الحكايات، يعني لما اتصدعت الكعبه، هو اللي اشتري الخشب اللي اتبنت بيها من حطام سفينه غرقت، ودي حاجه في منتهي الصعوبه، تروح تعس علي سفينه غرقانه في البحر، وتشتري اخشابها، وانت فـ قلب الصحرا دي مش موضوع سهل.

وهو اللي اتبرع بـ روحه، وضرب اول فاس في هدم الكعبه، علشان يعيد بناءها، متحمل خطوره اصابته بـ لعنتها، في وقت الكل خافوا، لـ ان دي كانت الطريقه الوحيده لـ الحفاظ علي الكعبه وتجديدها.

ولما بدؤوا التجديد، كان حريص جدًا علي انه محدش يساهم في بنائها بـ فلوس "حرام"، طبعا بـ مقاييس قريش لـ الحرام وقتها، زي الفلوس اللي جايه من الدعاره او ما اشبه، لازم يتاكد من طهاره اموال المتبرع.

اضافه لـ كده الوليد كان له تشريعات اخد بيها الناس من بعده، زي تحريم السرقه، وتحديد عقوبه السارق بـ قطع اليد، وحسب ابو الهلال العسكري في كتاب الاوائل، الوليد هو اول من قطع اليد في السرقه، وقريش كلها تبعته بعد كده.

كمان الوليد حرم علي نفسه الخمره، وقال انها "تُذهب العقل"، هو طبعا مكنش يقدر يحرمها في مكه كلها، اما لـ افتقاده السلطه الكافيه، هو في النهايه مش رئيس مكه، واما لـ ان تجاره الخمر كانت من التجارات الرائجه وقتها، فـ مش هـ نخسر فلوسنا، اللي عايز يشرب هو حر، علي ايه حال شرب الخمره مكنش حاجه لطيفه في مكه، حاجه كده زي دلوقتي في مصر، فيه بارات، وفيه ناس بـ تشرب، بس اجتماعيا ماهيش حاجه مقبوله.

لـ هذا، لـ كل هذا، الوليد كان حاجه مهمه في مكه، وبني مخزوم ارتفعوا بيه، ولما بدات الدعوه المحمديه، كان الراجل كبر، في بعض التقديرات معدي التمانين، وان كنت اظن اقل من كده شويه، بس كان كبير، كبير سن، وكبير مقام.

والوليد كان عم ابو الحكم