ليالى قريش.. الليلة 105

"ان ابا سفيان رجل يحب الفخر، فاجعل له شيئا" اعتقد مفيش جمله ممكن تفتح بيها الكلام عن أبو سفيان زي دي، ابو سفيان رجل يحب الفخر، برنس الليالي ورمانه الميزان، سيد بني أمية، اللي جه فـ وضع مستقر جدا، وبذل مجهودات كبيره علشان يحافظ علي الاستقرار ده.

الجهود اللي عملها قصي ثم عبد مناف ثم هاشم ثم عبد المطلب، ثم حرب بن أمية ظبطت الوضع الدولي والاقليمي لـ مكه، ايه اللي فاضل؟ نشتغل بقي، وننمي حجم التجاره، ومن بعد "حرب" حجم التجاره تضاعف، علي ايد عتبه وابو سفيان "وابو سفيان اتجوز هند بنت عتبه زي ما شفنا".

حجم التجاره المكيه بـ يبان من ان عدد البطون اللي بقت شغاله فـ التجاره بقي كبير، وظهر رجال اعمال من كافه العائلات، وفرصه الترقي الطبقي بقت متاحه لـ اي تاجر شاطر، كمان بـ تبان من حجم العبيد ونوعياتهم، ومن ظهور طبقات بين الاحرار.

وعلشان الاستقرار، وعجله الانتاج تدور، كان لازم يحصل تطوير في "مؤسسات" الدوله، وده مكنش ينفع والناس مش بـ تعرف تقرا وتكتب، في اوروبا والدول المتقدمه بـ يعرفوا يقروا ويكتبوا "اوروبا والدول المتقدم بـ النسبه لهم وقتها، كانت بلاد فارس وبلاد الروم، والممالك العربيه اللي قامت علي حدودهم".

ابو سفيان اسمه "صخر"، وابو سفيان دي كنيه، علشان كان له عم اسمه سفيان، فـ حرب سمي ابنه صخر، وعمل له الكنيه دي، الناس تناديه "ابو سفيان"، حاجه مالهاش دلاله، بس هـ نفك بيها الاشتباك بين صخر وعمه سفيان.

حرب وسفيان ولاد اميه "ابو سفيان وعمه" اهتموا بـ تنشيط التعليم في مكه وما حولها، خدوا اصول القرايه والكتابه من الحيره والانبار "في العراق"، وبدؤوا يعلموا الولاد، وكان ابو سفيان من اوائل الناس اللي اتعلموا، واللي بدؤوا يعلموا كمان الناس، كان عمر بن الخطاب كان بـ يعرف يقرا ويكتب، واللي علمه ابو سفيان.

مش بس عمر، فيه 17 واحد من اللي استجابوا لـ دعوه الاسلام كانوا بـ يعرفوا يقروا ويكتبوا، وده رقم ضخم جدا، واللي علم اغلبهم ابو سفيان.

مش بس النوع من التعليم، فيه ناس فـ عهد ابو سفيان، بدؤوا يبعتوا ولادهم يتعلموا بره، وكل ده كان مرتبط بـ فكره دفع القبيله لـ قدام ولـ فوق.

استقرار مكه كان يستلزم التصدي طول الوقت لـ محاولات الثوره او الانقلاب، وده نجح فيه عتبه وابو سفيان زي ما شفنا مع عثمان بن الحويرث، وزيد بن عمرو، او محاولات دعم عثمان من قبل القيصر، وعملوا زي السكينه فـ الحلاوه، من غير ما يزعلوا حد، ولا يكسروا كلام حد كبير، علشان كده علاقاتهم بـ الجميع كانت ممتازه، وابو سفيان كان بـ يقابل القيصر شخصيا والنجاشي واي حد كان.

اللي افهمه من سيره ابو سفيان انه كان براجماتيك اخر حاجه، الكوره اجوان، والاهم التلاته بونط، مره الحمزه قتل واحد، "والروايه قريتها في انساب الاشراف لـ البلاذري" الحمزه بن عبد المطلب، يعني ولاد عبد مناف، فـ دي حاجه فـ وشنا "الروايه بـ تقول انه قتله لـ انه ذكر بعض نساء بني عبد مناف بـ سوء، ماشي، مش مهم قتله ليه".

اهل الراجل اللي اتقتل طبعا مكنش ينفع يسكتوا، تدخل ابو سفيان، وقال لهم:

تاني يوم راحوا له، ماشي، هات التلات ديات، قال لهم: لا، الكلام ده كان امبارح، هم ديتين "2 ديه" مفيش غيرهم.

خلاص، هو عرف وسال، وفهم ان الناس دي قليلين، ومش هـ يعرفوا يعملوا حاجه.

تاني يوم رجعوا علشان ياخدوا الديتين، قال لهم: لا، هي ديه واحده، وحصل نفس السيناريو، وتالت يوم قال لهم: ولا ديه واحده، اللي معاكم اعملوه، وما عملوش حاجه.

ولما بدات الدعوه المحمديه لـ الاسلام، كان ابو سفيان عنده خمسين سنه، وعنده زوجات كتير، وعيال كتير، بس اهمهم طبعا كان معاويه.

بس الحياه مكنتش بس بني اميه

ما بني هاشم كان فيه منهم ناس مهمين، وبني مخزوم، وبني اسد، وغيرهم