ليالى قريش.. الليلة 99

قبل الدعوه المحمديه الي الاسلام بخمس سنين، وفيه ناس بيقولوا اكتر شويه، حصلت حاجه خلت مكه كلها تقف علي رجل، وهي تصدع الكعبه نتيجه السيول، واصبح واضح ان البناء مش هيصمد كتير، ولازم يتهد ويتبني من جديد.

بس مين اللي هيهد الكعبه؟

حكايه ابرهه والفيل، كان فات عليها اكتر من تلاتين سنه، وخلال السنين دي كلها معجزه العقاب الالهي لمن اراد هدم الكعبة بتتغني ع الربابه، لحد ما بقت "حقيقه علميه" بالنسبه لاهل مكه، ويمكن للعرب كلهم.

الوليد بن المغيرة، ابو خالد بن الوليد، قرر يخوض هو المغامره، قال لهم: انا اللي هابدا، ولو فيه حاجه اصابتني، يبقي خلاص، قدري، ولو مفيش، يبقي نكمل.

طبعا ما حصلش حاجه، ومكه فسرت ده بانهم عايزين الاصلاح، مش الهدم فعلا، وده حقيقه، فكملوا هدم الكعبه، ثم بدؤوا يبنوها تاني، وربنا وفقهم، والعمليه تمت بنجاح.

الملاحظ انه فعمليه البناء، التوازن القبلي كان علي راس الاولويات، يعني كل بطن من بطون مكه الكبار تولي مسؤوليه من المسؤوليات، وكان فيه مراعاه لتوزيع المسؤوليات دي، يعني كان فيه واحد من نجد كان عايز يشارك فـ البناء، فقالوا له: خلي عنك، محدش هيبنيها من بره قريش.

كان واضح ان عمليه زي دي، هتدي "شرعيه" لاي حد يعمل اي حاجه، ربما علشان كده من الاحداث النادره قبل الدعوه، اللي فيه اهتمام بروايه كل تفصيله فيها، ومين عمل ايه فين؟

الحكايه دي من الحكايات اللي دلاله بالنسبه لي في توزيع السلطه علي سادات مكه، وعدم انفراد حد بيها، علي نحو مطلق، وختام القصه بيوضح ده قوي.

وصلوا فـ الاخر لوضع الحجر الاسود مكانه، فكل بطن من البطون كان عايز هو اللي يعمل الموضوع ده، لان ده التاج، واللي هيحط التاج هيبقي هو الملك والرئيس، فبدؤوا يتنازعوا، والموضوع كان هيوصل للسيف.

قبل ما نقول الحل، اللي اكيد حضرتك عارفه، نحب نقول ان رصد اسماء البطون المتنازعه بيكشف لنا كتير عن تركيبه مكه فـ الوقت ده، يعني كان المتنازعين اربعه، والروايات بتوصفهم: كل ربع من ارباع قريش، فكان عندنا ربعين لولاد قصي، وربع لولاد مخزوم، وربع لولاد سهم.

ولاد قصي عارفينهم، ولاد مخزوم دول اللي كانوا مسؤولين عن "وزاره الدفاع" في قريش، ومتولين رسميا تنظيم الشؤون العسكريه، بالتعاون مع بني عبد الدار، اللي لازم يشيل حد منهم الرايه، ولذلك، ما تستغربش لما تعرف ان بني مخزوم طلع منهم خالد بن الوليد.

ولاد سهم كانوا متولين ما يمكن تسميته وزاره التخطيط، يعني مهامهم تنظيميه اداريه، وبيخططوا امور الخزانه، والقضاء وتنظيم المظالم، ودول طلع منهم مثلا عمرو بن العاص.

فاللي نفهمه ان القبائل دي هي اللي فـ ايدها السلطه الفعليه، وان المهمه دي هي الابرز.

نرجع لولاد قصي، اللي كان ليهم ربعين، واحد لولاد عبد مناف، وواحد لولاد عبد العزي، والمفروض ان ولاد عبد مناف دول المركز، دول اللي منهم بني هاشم وبني أمية مع بعض، غير افخاذ تانيه مهمه، فده الربع الاهم والاكبر.

ازاي كل ربع من ارباع قريش كانوا بيتنازعوا؟