ليالى قريش.. الليلة 88

اكيد اكيد في مرحله ما من مراحل التعليم، ابتدائي/ اعدادي/ ثانوي، ويمكن جامعه، صادفك سؤال من نوعيه: اكتب ما تعرفه عن مسيلمة الكذاب.

واكيد برضه، الاجابه النموذجيه كانت انه شخص متخلف مدعي كذاب، ارتدّ عن الدين الاسلامي بعد وفاه النبي، وادّعي كذبا انه نبي، وبـ ييجي له وحي، بس الكلام بتاعه كان عبيط، والحمد لله المسلمين انتصروا عليه.

ولو كنت يعني مذاكر شويه اكتر، هـ تقول ان اللي انتصر عليه هو سيف الله المسلول خالد بن الوليد، في عهد الخليفه الراشد ابو بكر الصديق، وان اللي قتله هو الوحشي، اللي كان قتل الحمزه عم النبي في اُحُد، وبعدين اسلم، وقاتل مع المسلمين لـ حد ما كفّر عن قتله لـ واحد من خير الناس، بـ قتله واحد من شر الناس.

لو كانت دي اجاباتك فـ انت ناجح بـ اذن الله، بس الواحد برضه عنده اسئله تانيه تخصّ مدعي النبوه الكذاب ده:

هل هو اسمه كده "مسيلمه الكذاب"؟ يعني هل ابوه كان اسمه الكذاب، ولما خلفه سماه مسيلمه؟

هو اصلا منين؟ وكان عايش فين؟ ومات فين؟

ازاي واحد بـ يقول كلام عبيط زي ده، يقدر يخوض حروب ضد الجيش الاسلامي، اللي ما قدرتش مكه بـ جلاله قدرها تقف قدامه؟

هو امتي اسلم علشان يبقي ارتدّ، وتبقي الحروب ضدّه "حروب الرده"؟

ابو بكر اتوفي بعد النبي بـ سنتين، لحق مسيلمه يرتدّ ويدّعي النبوّه ويجمّع حواليه كل البشر دول، ويخوض المعارك دي في الفتره البسيطه دي؟

ايه علاقته بـ سجاح (مش سجاج) اللي دايما بـ ييجي اسمها عرضا، وما بـ يجيش في الامتحانات؟ ومين سجاح دي اصلًا؟

الاسئله دي وغيرها كتير، تخلي الواحد يدور شويتين حوالين الشخصيه الغريبه دي، وكان المفتاح مع استاذنا جواد علي في موسوعته الخالده: "المفصل في تاريخ العرب قبل الاسلام"، ومن المفتاح ناس كتير اشتغلت، وعلي بركه الله هـ نتكلم عن مسيلمه الكذاب، مع ملاحظه اننا بـ نتكلم في الفتره قبل الدعوه المحمديه الي الاسلام في مكه، وتحديدا عن تيار الموحدين في الجزيره العربيه.

هو ما اسموش مسيلمه، بغض البصر عن لقب "الكذاب"، نحت الاسم بـ الصيغه التحقيريه دي كان عاده عند العرب، وما زالت حتي الان، ناخد اسم خصمنا، ونعمل عليه قلشه، اما بـ تحريف الاسم، واما باشتقاق معني وحش معني، او عكسه، زي الزمالكاويه: بـ يسموا الاهلي "الجهلي"، والاهلاويه بـ يقولوا: "الزبالك".

انظر حولك هـ تلاقي الموضوع ده منتشر انتشار التنين، وزمان المسلمين الاوائل اطلقوا علي "ابو الحكم" اسم "ابو جهل"، وطلحه سموه "طليحه"، و"عبهله العنسي" سموه "الاسود العنسي"، وهكذا دواليب.

فـ "مسيلمه" سخريه من الاسم الاصلي، اللي كان ايه بقي؟

الاستنتاج السائد هو انه لما نفكّ التصغير، اللي اتعمل علشان التحقير، نلاقي ان اسمه الاصلي مسلمه، وهو مسلمه بن حبيب، وحبيب هو ابوه، ويقال جده، وفيه ناس بـ تقول: مسلمه بن ثمامه بن حبيب، او مسلمه بن ثمامه بن كثير بن حبيب.

الموضوع ده عامل كده زي ما كان النبي احيانا يقولوا عليه: ابن عبد المطلب، مع ان عبد المطلب جده، والنبي نفسه يوم غزوه حنين، وقف وقال:

فـ هو اذن مسلمه بن حبيب الحنفي.

بس ده الاستنتاج السائد، فيه استنتاج تاني، والاستنتاج التاني بـ يتبني عليه حاجات، والحاجات بـ تجيب حاجات.