المحتوى الرئيسى

شريف عازر يكتب: في ذكرى توليه الحكم.. اكتب للسيسي خطاب شكر كأنك مواطن شريف

06/09 10:39

عزيزي الرئيس عبد الفتاح السيسي:

مر عام وفخامتكم في الحكم يا سياده الرئيس, والله العظيم ما حسينا بيه, الوقت الحلو بيعدي بسرعه.. لقد حققت لنا كل ما نحلم به، وصارت مصر ااااد الدنيا في زمن قياسي، وها نحن ننعم في البذخ والامان والاستقرار.

شكرا سياده الرئيس علي انك سيطرت وقضيت علي هؤلاء الذين يطلقون علي انفسهم لقب “النشطاء”، ويتبعون اجندات اجنبيه، وصدعوا رؤوسنا بالكلام عن حقوق الانسان والحريه والديمقراطيه.. نحن ليس لدينا وقت لمثل هذه المهاترات.. حقوق انسان ايه ودلع ماسخ ايه؟ نحن نريد قبضه من حديد لا ترحم هؤلاء ممن يعملون علي اسقاط الدوله وهيبتها.

بس حلوه منك يا ريس انك بتقنع العالم كله اننا دوله تحترم حقوق الانسان, ما هو شكلنا قدام العالم مهم برضه, واي حد من المنظمات اياها حييجي يقولنا عندكوا انتهاكات حننكر، وحنقول عليهم انهم منظمات مغرضه وتشوه صورتنا, مع اننا عارفين كويس اوي انهم صح, ما احنا منتخبينك اصلا عشان تفشخ حقوق الانسان.. صحيح.

اما عن هؤلاء الذين تسول لهم انفسهم انهم ينزلوا مظاهرات، فدول بقي حلال فيهم الدبح.. ايوه يا ريس.. احنا عارفين انك وصلت للحكم بمظاهرات وشرعيتك الاساسيه هي مظاهره 30 يونيو بس.. يعني دول حركتين عملناهم قدام الناس عشان نقلش الاخوان، بس احنا ضد المظاهرات اصلا واللي يتظاهر ياخد علي دماغه ويتضرب بالنار.. ايوه يتضرب بالنار.. بس ما تنساش يا ريس صورتنا قدام العالم, لو حد من المتظاهرين مات من رصاص الداخليه لازم ندافع عن الظابط ويطلع براءه, احنا ما يرضيناش الظلم برضه.

عايز اشكرك شكرنايه كبيره اوي يا ريس علي موضوع تظبيط القانون ده, والنعمه انت برنس واسيادنا راضيين عليك.. يعني قلشت حوار البرلمان واديت لنفسك السلطه التشريعيه والبلد بلدنا والقانون قانوننا يا معلم.. اي حاجه مش عاجبانا في البلد نضرب لها القانون المعتبر اللي ما يخرش الميه, وماحدش بينخور ورانا اصلا.. استااااذ.

بس زعلت منك يا ريس في حوار القانون بتاع ترحيل الاجانب ده.. ده خلي العيال الاخوانيه يهربوا.. بس نرجع ونقول انا واثق فيك وفي حكمتك وعبقريتك.. ما انت طبيب كل الفلاسفه.

يا ريس احلي حوار بقي بيعجبني، هو موضوع الاعدامات ده.. اديله علي ودنه اعدامات يا معلم.. جمله وقطاعي.

يا ريس احنا بننافس ايران علي اعلي معدل اعدام في العالم, وصلنا للعالميه معاك يا ريس.. بس برضه ما تنساش لما تبقي في المحافل الدوليه، اوعي تغلط وتقول لهم اننا بنحب الاعدام والكلام ده.. لا منظرنا برضه.. قول لهم ان دي احكام القضاء، وان القضاء عندنا – عقبال عندكم – مستقل وماحدش بيتدخل في احكامه.. يعني العب علي كله يا ريس.. معلم، والنعمه معلم.

حبيتك اكتر يا ريس لانك راجل عسكري وزيي بتحب اي حاجه عسكريه، خصوصا المحاكمات العسكريه.. دي احسن حاجه اخترعتوها لحد دلوقت، وما شاء الله فخامتك بتتوسع فيها وبتفتكس تعديلات توسع الاختصاص.

الشعب ده عايز يتربي يا باشا ومايجيش غير بالمحاكمات العسكريه اللي مافيهاش ياما ارحميني، مع اننا ضامنين ان القضاء في جيبنا، بس الامر ما يسلمش يكون فيه قاضي كده ولا كده عنده ضمير، ويعيش علينا دور انا القانون والحركات دي.. ما انت فاهم يا باشا.. المحاكمات العسكريه دي بقي مافيهاش الدلع بتاع القضاه المدنيين دول وحنيه قلبهم, اديله ما ترحموش علي طول.

فيه عندك بقي في مصر جماعه طيبين اوي يا خال.. الاخوه الاقباط.. دول بقي مهما تديهم علي دماغهم ولا الهوا, معاك معاك يا ريس. دول بقي كنز يا ريس, يعني لازم تزورهم في الاعياد وتدعي البابا بتاعهم في كل الاحتفالات وموائد رمضان.. شوف يا ريس من طيبه قلبهم, من كام يوم كانوا بيهجروهم من بيوتهم عشان جيرانهم المسلمين مش طايقينهم, شوف مع ان موضوع التهجير ده غير قانوني في الدستور اللي احنا كاتبينه سوا, لكن برضه ولا اعترضوا ولا اي حاجه، لما اتعرض عليهم حلول غير قانونيه، وقعدات صلح.. مش باقولك ناس طيبين اوي يا ريس, امانه ما تنسي تزورهم في العيد يا شيخ.

الله يكون في عونك يا ريس في موضوع مكافحه الارهاب ده.. ده انا نفسي تعبت لك، مع ان الارهاب زاد من ساعه ما فخامتك مسكت الحكم, بس انت بصراحه والحق يقال عامل اللي عليك وزياده.. اصل يعني انت مش معاك عصاه سحريه تقول امشي يا ارهاب فيمشي.. ربنا يقويك يا ريس ويعينك. اكبر شكر ليك يا ريس بقي الشكرنايه الكبيره بتاعه انك حميت مصر من انها تبقي سوريا والعراق، مع اني عارف كويس اوي ان التركيبه الجغرافيه والديمغرافيه في مصر مختلفه تماما ومكانش حيحصل فيها اي انشقاقات, بس برضه ماحدش ضامن يا ريس.. مصر بلد خيرها كتير وعليها العين ومحسوده.. الف شكر يا ريس يعني بجد انت حد جامد.

أهم أخبار مقالات

Comments

عاجل