مدير شركة يفصل موظف بعد إضافته على "فيس بوك": مش هينفع تكمل معانا لأنك ضد الدولة وريسها واحمد ربنا إني مسلمتكش

قال عبد الرحمن زيدان، احد الشباب، ان مديره رفضه من الشغل بعد اضافته لقائمه الاصدقاء في "فيس بوك"، بسبب اهتماماته السياسيه.

وكتب زيدان في حسابه علي "فيس بوك"، اليوم الخميس: "مديري قالي ابقي اكتبلي ميلك في ورقه عشان ابقي اعملك اد، فعملت كده اول امبارح، فالنهارده روحت الشغل لاقيت وشه مقلوب وبتاع ومدتش اهتمام ودخلت علي مكتبي، جالي المكتب وقالي انت مش هينفع تكمل معانا قولتله ليه؟ قالي بسبب انك ضد الدوله وريسها، قولتله حضرتك بتهزر صح ؟ وضحكت جدا قالي لا بكلم بجد، قالي ان هنا مبيشتغلش غير اللي ملهومش في السياسه واللي ليهم بس مع "استقرار البلد وبيحبوا بلدهم".

واضاف : "المدير قال لي احنا مش عايزين الشركه تقفل يا زيزو، انا هكتفي بفصلك وقول الحمدلله اني معملتش حاجه غير الفصل غيري كان عملها قولتله ايه هتسلمني بالمره؟ قالي والله غيري فعلاً كان عملها بس انا عشان والله حبيتك هدعيلك بالهدايا، قولتله انا مش هرغي معاك كتير بس عمري ماشوفت شغل فيه كده بس اعرف ان الظلم وحش واخرته وحشه وانت هتحس به قريب من الناس اللي بتقول اني ضدهم وهتفتكرني وسبته ومشيت".