المحتوى الرئيسى

م الآخر| "المجتمع والناس والقاضي"

05/13 03:54

افتكروا معايا كده من كام سنه مشهد من فيلم عمارة يعقوبيان للاديب الكبير علاء الاسواني، لما جه طه يقدم ورقه في كليه الشرطه وكان مناسب في كل حاجه ومؤهل لدخول الكليه .. الا انهم شافوا في الملف بتاعه ان ابوه بيشتغل حارس عقار فرفضوه في وقتها؟.

" والدك بيشتغل ايه ياطه، حارس عقار، شكرا ياطه " والمقابله انتهت علي كده وحياته توقفت من المشهد ده، ساعتها محصلتش ضجه ولا اي حد اتكلم عن المشهد او الموقف ده وكان كل اللي شغل راي النقاد انهم اذاي يطلعوا شخصيه زي حاتم الشاذ في الفيلم لانه نموذج غير موجود في المجتمع او تكاد فئه قليله لا تذكر.

بس ده طبعا لاننا مجتمع بيحب شويه الكلام وشويتيين يحب يهرب من الواقع المفروض عليه، بس المره دي حصلت ضجه كبيره اوي علي تصريحات وزير العدل علشان صرح بعباره كده مكنش ينفع تتقال حتي لو صح ان " ابن الزبال لايصح ان يشتغل قاضي.

بس فعلا ده الواقع في مصر وعمر ماهيجي ابدا يوم في مصر يكون قاضي او ظابط او حتي وظيفه دبلوماسيه او غيرها فيهم حد من الفئه دي من المجتمع.

وغلط الوزير الوحيد انه كان علي قدر عالي جدا من الصدق مع النفس والشفافيه جايز ده بسبب طبيعه عمله كقاضي لكن بنفس القدر كان عنده "خطا" اجتماعي شديد جدا انه يصرح بتصريحات زي دي علي مراي ومسمع الكل.

ليه بقي مكنش ينفع يقولها قدام الناس؟، طبعا لاننا مجتمع منافق.

كلنا جرينا عالجمله دي وازاي يقول كده ؟ مفيش ديموقراطيه في البلد ؟ فين العداله الاجتماعيه ؟ البلد مش هاينصلح حالها ؟ تفرقه عنصريه .... ومش عارف مين، لكن كله كلام عالورق، هل احنا فعلا مؤمنين بالكلام ده ؟!

كل الشركات الكبيره والمتوسطه مش حتي معظمها او الشركات الصغيره اللي عايزه تمشي علي نفس نهج الشركات الكبيره علشان تختار موظفينها لازم تملي ابليكشن تاني خانه فيه علي طول هي وظيفه الاب والام , لانها بتدور طبعا علي مستوي تربيه مناسب وبتدور كمان علي المدارس اللي اتعلم فيها كانت حكومه زي عامه الشعب ولا خاصه ؟.

ولا هنروح بعيد ليه ونلف بالموضوع بعيد .. ماهي الجوازات ماشيه من زمان بالطريقه دي انت جاي تناسب مين واهلك شغالين ايه عشان يعرفوا مستواك لايق مع مستواهم ولا لا , ولا اشهر جمله بتتقال في مصر " انت مش عارف انا ابن مين؟ "

أهم أخبار مصر

Comments

عاجل