حوار| فتحي سلامة: "الجاز" موسيقى نشأت مع هجرة "العبيد" إلى أمريكا

في اليوم العالمي للجاز تحدثنا مع المؤلف والموزع الموسيقي فتحي سلامه، الحاصل علي جائزه "الجرامي" الدوليه، حول هويه هذا النوع من الفن ونشاته، فكان لقاؤنا معه كالتالي:

ممكن حضرتك تكلمنا شويه عن الجاز نشاته؟

هو فن امريكي، وامريكا تكونت اصلا من اللي كانوا يسموا بـ "العبيد" اللي جم من افريقيا، والمهاجرين اللي جم من اوروبا من جنسيات مختلفه، و لغايه عام 1863، كان العبيد "النيجرز" موجودين، والرئيس الأمريكي اصدر قانونا بالغاء الرق والعبوديه، وكان العبيد وقتها بيقدموا موسيقتهم الخاصه اللي توارثوها من اهاليهم كل يوم حد "يوم اجازتهم"، في ميدان اسمه ميدان "كونجو" وفي الحقول، وتلي الامر تكوينهم لفرق باسم "مارشينج باندز" زي فرق الجيش، اللي كانت مرتبطه بنوع رقص معين للسمر، وبدا النوع ده من الفن يقنن، وتنتشر الفرق، وبيعتبر  "جيلي رول مورتن" تاريخيا هو بدايه الجاز عام 1905 تقريبا.

هل في مراحل معينه مر بها الجاز؟

طبعا، مراحل كتير وانواع مختلفه مع مرور الوقت، والاول منها كان اسمه "راك تايم" زي "سكوت جوكلين"، وهي موسيقي مرتبطه بـ البيانو، وكانت البدايه حفلات في البيوت بيقدمها بيانيست لوحده، ومع تطور الامر ظهرت انواع تانيه في العشرينات، وبقي في "سوينج" في التلاتينات، والـ "بي بوب" اللي اشترك فيها شارل باركر وباب باول، وناس تانيه كتير، لغايه الخمسينات خاصه 1950 كان الجاز مرتبط بالرقص، لكن الموسيقيين كانوا مش حابين ده، ومحتاجين ان الموسيقي تتسمع اكتر، فظهر الـ cool school.

فاصبحت الموسيقي اكتر تعقيدا، وبقي في تواصل بين موسيقي الجاز والكلاسيك، وفي الستينات ظهر نوع تاني اكثر تعقيدا، وفي السبيعنات ظهر الـ "فيوجن" وهو مخلوط شويه بالجاز، وما زال في تطور.

ايه بيميز موسيقي الجاز عن غيرها؟

موسيقي الجاز مفتوحه جدا، ومرتبطه بحضارات كتير لان امريكا فيها ناس كتير من حضارات مختلفه فكل واحد جاب موسيقاه وثقافته معاه، لدرجه ان "لويس ارمسترونج" في تسجيلات له في الخمسينات كان بيتسخدم حاجه يقال انها "صاجات"، اضافه الي ان بيميز الجاز ان محدش يقدر يلعبها الا اذا كان دارس موسيقي كويس، وعنده قدر كبير من الخبره.

استمع الي موسيقي فتحي سلامه

انا محب لانواع كتيره من الموسيقي نظرا لنشاتي، ولعبت انواع كتيره منها الشرقي المصري، الروك، الفيوجن، واتعلمت في امريكا مع ناس فاهمين في النوع ده من الموسيقي، لكن انا بلعب "فيوجن" بمعني ان كل اللي اتعملته من معلومات عن الجاز بستعملها في الموسيقي الشرقي.

هل في فرق بتقدم موسيقى الجاز في مصر؟

من اوائل الفرق اللي عاصرتها فرقتنا انا ويحيي خليل في 1970، واحنا مش اول ناس تعمل ده، لان ببساطه لو بصينا علي الافلام المصريه القديمه، محمد فوزي كان له محاولات، وحتي اسماعيل ياسين في بعض المونولوجات موجود فيها حاجه مش شرط تكون بالظبط جاز، وحاليا في فرق بتحاول تقدم النوع ده من الموسيقي، لكن فرق الشباب اغلبها بعيده عن الجاز ومرتبطه اكتر بالموسيقى الريفيه الامريكيه Country music.