55 قاعدة للتعامل المريح بين البنت والولد.. للشباب: أكل مراتك صحى ومفيد المشكلة إنك اتعودت على أكل مامتك.. اعرف حبيبتك عايزه إيه من غير ما تقول.. للفتيات: الراجل صاحب الريموت الأول والأخير

رغم حاجه كل منهما للاخر، واستحاله الحياه بدون احدهما، فان الصراع بين الولاد والبنات لا يتوقف، والمعركه هذه المره دارت رحاها علي صفحات الفيس بوك، فقد قام كل فريق برصد اشهر قواعد البنات والولاد، حيث قام الولاد بابراز المظاهر السلبيه ونقاط الضعف عند البنت المصريه.

وكانت اول قاعده هي البنت دايمًا صح وانت غلط.. مش فاهم ليه لسه فيه رجاله بتقاوح في الموضوع ده مع ان فعلاً وفي اغلب الحالات (٢٪) البنت بتطلع صح وفي الحالات النادره (٩٨٪) اللي الراجل بيطلع فيها صح بتكون لانه السبب في ان البنت غلطت وفي الاخر برضه لازم يروح يعتذر علي ده.

اما القاعده 2:اياك تسال اي بنت مالك؟ لو لقيتها قاعده متضايقه.. البنات بصفه عامه بيحبوا يقعدوا متضايقين وغالبًا ده ليه علاقه بالجينات والهندسه الوراثيه.. لو قررت تبقي فدائي ورحت سالتها هاتديك الرد العبقري (مفيش) وانت ممكن تكون بالغباء الكافي وتصدقه.. في الحاله دي هاتلاقيها ماشيه تدندن (فيه حاجات تتحس ومتتقلش) وهتلاقي نفسك بتكرر السؤال تاني وتالت ومليون مره لحد ما تبهرك بالرد التاني وهو: شوف انت عملت ايه وانت تعرف !.

اما رقم 3 كانت:اي اكل بتعمله مراتك هو الصحي والمفيد والطريقه الصح لعمل الاكل ده .. المشكله انك انت اللي خدت علي اكل مامتك مع انه (ميتاكلش بصراحه) .!

4 كانت: اي بنت في الدنيا مبتحبش تشتري لبس منتشر وفيه ناس كتيره بتلبسه عشان تتميز عن الباقيين.. وده معناه انك – لو لا قدر الله – فكرت تشتريلها لبس هديه روح اشتري درع روماني عتيق او زي خفاش بس يكون بينك .

ورقم 5: اياك تقعد ساكت قدام بنت والا هتسالك بتفكر فيه ايه .. هن ومهما حاولت مش قادرين يصدقوا ان الرجاله اغبي من انهم يفكروا في اي حاجه ذات قيمه وهيفترضن فورًا انك بتفكر في واحده تانيه ومخبي عنها بس باين عليك علي فكره وهي عارفه وساكته بمزاجه .

اما رقم 6:البنت بتفهم في الديكور وانت لا عشان دي حاجات بناتي وانت اصلاً كنت عايش في كهف ولو سابتك انت تختار الديكور هاتعيشوا في مقلب زباله. !

وكانت القاعده الـ 7: البنت عايزاك تعرف هي عايزه ايه ومن غير ما تقوله.. ولو مجبتوش يبقي انت يا غبي يا بخيل .!

وكانت القاعده الـ8: البنت بتقعد وقت طويل في الحمام لاسباب ملهاش اي علاقه بالحاجات اللي بتدخلك انت الحمام علشانها.. غالبًا هن بيدخلن.. يقفلن علي انفسهن .. ويبدان حياه جديده من داخل الحمام.

اما الـ9: شعر البنت مهم جدًا ولازم تلاحظه وتاخد بالك من اي تسريحه جديده عملتها حتي لو كان مجرد انه متنعكش .. المهم تاخد بالك وتتبهر واياك تقول رايك بامانه عشان انت اصلاً شعرك وحش ومبتفهمش في الموضه.

وقالوا عن القاعده الـ10 البنت بتتكلم عشان ربنا خلق لها لسان مش اكتر.. الفروق التلاته بين الراجل والبنت لما بيتكلموا هو ان الراجل لما بيتكلم بيبقي عنده حاجه يقولها.. لما بيتكلم بيقول الحاجه دي فعلاً .. لما بيقول اللي هو عايزه بيسكت .!

اما القاعده الـ 11:البنت مبتتخنش اطلاقًا ووزنهن عمره ما بيزيد مهما اكلن.. الجاذبيه الارضيه هي اللي بتضطهدهن .!

وكانت القاعده الـ 12 البنت لما بتمشي بتتحرك بخطوات بطيئه ولو عايز واحده تمشي بخطوه سريعه قولها ان فيه تخفيضات علي اول الشارع !.

وكانت القاعده الـ 13:البنت عندها اسماء تانيه للحاجات غير المتداوله بين سائر البشر .. يعني الكلب اسمه بوبي .. القميص اسمه شيميز .. والهديه اللي انت جبتها في عيد ميلادها اسمها العك اللي انت جبته!.

وعن القاعده الـ 14:عيد ميلاد البنت هو مناسبه قوميه وطنيه لازم تاخدلها اجازه وتبدا تحضرلها من قبلها بعشر شهور علي الاقل ولازم تكون الهديه قيمه غاليه بتقول انك بتحبها وعارف بالضبط هي نفسها في ايه، وذوقك هو نفس ذوقها .. من الاخر كده ليله عيد ميلادها ارمي نفسك قدام عربيه عشان تخلع .!

15:البنت لما بتضحك علي اي حاجه بتقولها بيبقي عشان لقت افيه هتقوله عليك لما تقابل صاحباتها بعد ما تسيبك .!

16:البنت متقدرش تشيل اي حاجه الا اذا كانت هتحدفها عليك .!

17:البنت علي طول زهقانه حتي لو خدتها في جوله حول العالم وخضت معاها مغامرات مخضهاش ادهم صبري في حياته.

18 :البنت بتتعامل مع الطقم الصيني علي انه اثار نادره لا يصح استخدامها الا للطوارئ .. انت كمان لازم تتعامل مع النيش علي انه مقبره فرعونيه لو دنستها هتجيلك لعنه الفراعنه .!

19 :البنت مبتعرفش تسوق ومش ذنبها اطلاقًا انك كنت ماشي في الشارع او بتحاول تجري من عربيتها وملحقتش .!

20:من حق اي بنت تقول علي اي ممثل انه قمور قوي في حين انه لازم يتطبق عليك الحد لو شفت مونيكا بيلوتشي ومقمتش جبت اللي بطنك امتعاضًا وقرفًا .!

اما القاعده الـ21:علاقه البنت بالتليفون هي نفس علاقتك بالكوره .. متحاولش تفهمها ولا تواجهها ولا حتي تتكلم فيها عشان متزعلش. !

22:انت مبتقابلش صحابك الا صدفه ودي غلطه بيقع فيها ناس كتير .. اصل لو عندك وقت تقابل صحابك يبقي ليه مقعدتش معاها .!

كما شدد الولاد في القاعده الـ23 لو قابلت صحابك والبنت سالتك (هاه واتكلمتوا في ايه؟) اديها رد يخليها تسكت .. قولها مثلاً: كنا بناقش نظريه نيتشه عن الجنس الاري في ظل المعطيات اللي ميشيل فوكو اتكلم عنها في كتابه الاخير واللي دار رادوغا ترجمته عن الروسي .. تيجي اقرالك منه ٣ فصول ؟!.

وكانت الـ 24 هي:اي حلم بتحلمه اي بنت له دلاله ودايمًا التفسير حاجه من اتنين .. يا انت ماشي مع واحده تانيه .. يا واحده تانيه ماشيه معاك .!

اما عن القاعده الـ25:البنت دايمًا شايله بلاوي جواها وساكته ومستحمله .. ايه هي البلاوي دي؟ .. الله اعلم .!

وكانت الـ26:البنت لما بتضايق يتضحك ولما بتفرح بتعيط ولما بتقعد في البيت بتبقي عايزه تخرج ولما بتخرج بتبقي عايزه تروح ولما بتحس ان جالها برد بتعمل كل اللي ربنا يقدرها عليه عشان تعديك .!

27: انت بتستحمي بصابونه لكن البنت لا .. البنت عندها ٩٢٣٤٣ مستحضر تجميل لو حاولت انت تجربهم هتبوش او هتتحول لضفدعه !.

وقالوا عن القاعده الـ28:البنت لما تقولك استناني خمس دقايق يبقي انت عبيط عشان مجبتش معاك حاجه تنام بيها !.

وعن الـ29:البنت تحب الراجل اللي يحكمها .. عشان تجيبه وتمشيه علي العجين بعدها .. هو ده التحدي .!

وكانت الـ30:البنت لما تجيب سيرتك من وراك تاكد انك انت ونص عيلتك بتاخدوا حسنات ببلاش .!

واختتموا قواعدهم ضد البنات باخر قاعده وهي:البنات فعلاً اذكي مننا .. بدليل اننا منقدرش نعيش من غيرهم .!

ولم تقف بنات مصر مكتوفات الايدي امام هذا الكلام وقمن برصد القواعد الخاصه بالرجال، ردا علي "قواعد البنات الاربعون" التي تناولت جوانب حياتهن بشكل ساخر جاءت كالتالي:

القاعده الاولي:مين قالك ان الراجل بيحب التحكم، ابسلوتلي نوت، هو بس مفكرك عروسه بزراير يتك عليها تنور يضغط عي بطنها تنور علي شعرها تكهرب علي اديها تلعبط، معلش عنده نقص من وهو صغير اهله مش بيوده السيرك.

و2::الراجل بطبيعته رغاي، بس زي ما تقولي بعد سن المراهقه بيطلعله فقافيق في بوقه بتخليه قليل الكلام والسمع بعيد عنك بعد كدا.

وكانت رقم 3: مين قالك ان الراجل قليل الادب، اوف كورس نوت، دا حمل وديع هو بس اللي خلي ام وديع تحمل اصلا.

4-عادي يبص علي واحده، ويكون مركز ولما تاخدي بالك يعمل انه سرحان.

وشددت الفتيات علي اهم قاعده وهي الـ5 وهي: لو شعرك لونه اسود وعملتيه اخضر فسفوري مش هياخد باله وده عادي هيركز بس مع اللي بره واي تغيير يحصل في صحبتك او جارتك.

6: الراجل بطبعه كائن اجتماعي متفتح، وكل فتحه وفتحه صعب تلاقيه من غير واحده، اه دي اختي دي صحبتي دي بنت عمه خالت اخو بابا زملتي وبنت ابن اخت خاله ماما.

كانت رقم 7: سياسي محنك معه خبره سنتين من الفرجه علي بوستات الفيس وخصوصا بوستات سوسو الحيرانه وليلي السهرانه، ايش فاهمك انتي يا جاهله، هو الصح طبعًا ومعاه علامه الجوده.

اما رقم 8:صاحب الريموت الاول والاخير، زي ما هو صاحب البيت كدا زي ما بردو الاكل اللي بيحبه هو اللي يتعمل واللي بتحبه دا تاكليه عند "امك" عشان مبيحبش ريحه القلقاس ولا الملوخيه ولا الباميه ولا البسله ولا الفسيخ ولا الرنجه.

وكانت القاعده الـ9: صريح لدرجه تميل للبجاحه، لو مكنتش البجاحه نفسها تمر السنين مع بعض وفجاه يزيد الاهمال والوايتنج، اه انا بحبك بس ماما مش موافقه، بابا رافض، اخويا بيسنن، تيتا ماتت وتعبانه علي الاخر، عندي الكبد وخايف اعديكي، انتي تستاهلي حد احسن مني.

اما القاعدهالـ 10:هو دايما الصح حتي لو هو غلطان، ايوه يا ستي ايوه، هو كدا انتي زعلانه بردو انتي اللي تصالحيه، انتي اللي عيانه بردو انتي اللي خدي بالك منه، انتي اللي مخنوقه بردو انتي اللي تفتحي الكلام وتهوديه علي اد عقله، وانتي اللي تقوليله: قولي كلمه حلوه بقي عشان تصالحي بيها نفسك.

وعن القاعده الـ11 قالوا:وماجستير في غسيل المخ، درجه اولي تلاقيه مزعلك ومطلع عنيكي وشاخط فيكي وقافل السكه في وشك ومطلوب اول ما يقول بحبك تنسي كل حاجه.

12:لما يقولك في عز الخناقه متعليش صوتك انا بقولك اهووووووو انا راجل وانتي بنت رغم انه هو الغلطان يقلب الترابيزه عليكي في مينت، متزعليششششش، اولا الزعيق بيدل علي انه عنده مشكله في ودانه في بيعلي صوته عشان يسمع نفسه، انا راجل وانتي بنت عنده فوبيا العظمه نستحمله معلش مريض يا بنتي، ليس علي المريض حرج.

وكانت القاعده الـ13: بيتعب اي والله بيتعب بيروح الشغل محسسني انه بيشتغل في وكاله ناسا المهم و يرجع ينام ويتفرج علي التليفزيون وينزل لصحابه ! انما انتي تافهه مواركيش حاجه مهمه اصلا، اعمالك في نظره تتوقف علي قاعده في البيت معززه مكرمه بتتكلمي في التليفون وتلعبي في ضوافرك وتعملي شوبنج علي اساس ان البيت دا تومتيكي توماتيكي.

وكانت القاعده رقم 14: لو جاله شويه برد يالهوووووووي يحسسك انه بيودع وخدي بالك من العيال يا بتعه وسكتي الواد و البت دول حرام يا عالم تعبان و عادي يعديكي ويخف هو ويقولك بطلي دلع دول شويه برد.. قومي هاتلي اشرب وحضري العشا واكويلي القميص البنفسجي وخدي بالك من كسره البنطلون البني بسرعه بقي جعااااااااااااااااااااان انتي لسه مقومتيش!.

وكانت القاعده الـ 15:الرجل يحب الفرفشه هو مالو هو ومال ضهرك وجعك وركبك ناقحه عليكي والاسعار نار ولا متخانقه مع مامتك ولا متخانقه معه هو شخصيا هو مالوووووو اضحكي فكي وشك عشان لو مفكتيش وشك هيروح لغيرك يفُك.

وعن رقم 16:عنده حساسيه من كل الطلبات وخاصه كلمه عاوزين المصروف تلاقي وشه قلب شارب وجيبه كرمش والضغط ارتفع ! ناقص يقولك قلبي قلبي ولو طالبه 100 جنيه يرسو علي 15 جنيها وربع.

وقالوا عن رقم 17:لا يوجود في قاموسه كلمه معرفش تلاقيه فتاي في كل حاجه ميقولكيش معرفش الا لما يبقي قرفان منك بيقولهالك علي سبيل التعذيب كانه معه سر نمله الارض.

18:بيفتكر ان زنك علي الفرح ده عشان تغيظي اصحابك وتحطي صور علي الفيس بوك وتلبسي فستان ابيض مش قادر يستوعب انك بتحبيه ونفسك تكوني معاه بقيت العمر.

19:فاكر نفسه توم كروز ف بيعاملك علي انك مفروض تكوني مارلين مونرو .

وكانت القاعده الـ20:الراجل طفل كبير مسافه ما يملك الشيء يزهده فتلاقي النوع الذكر من دول بيعاملك علي انك عربيه بلاستك في فاترينه مسافه ما يشتريها يلعب بيها يكسرها يدور علي حاجه جديده.

21 :بيدخل الحمام بالساعه مصطحبا معه يا موبيله يا جورنانه بيعامل الحمام علي انه فقره ترفيهه لكي يتواصل مع التكنولوجيا المستقبليهه