حوار| فريق أقصى الوسط: نرفض قيود شركات الإنتاج

"اقصي الوسط"، مشروع غنائي مستقل، يتكون من عمرو عز "الموسيقي والمنتج"، وتقي مكاوي "غناء وتاليف". اشتهر "اقصي الوسط" في البدايه باغنيه "انتي"، التي حققت نسبه استماع عاليه علي شبكات التواصل الاجتماعي، ما جعلهم يستمروا في صناعه العديد من الاغاني الـ Fusion، وكان لديهم العديد من الحفلات في الفتره الاخيره. وكان لـ"دوت مصر"، هذا الحوار بعد حفلتهم الاخيره في Cairo Jazz Club. 

احكوا لنا بدايتكم كانت ازاي؟

تقول تقي "احنا صحاب من قبل ما نبدا مشروع اقصي الوسط، عمرو بدا سنه 2005، وكان بيلعب اكثر من نوع موسيقي، وهو اللي علم نفسه".

وتضيف "اما انا بدات اغني من 2010، وكنت بلعب سيمفونيك ميتال، وكان عندنا خلفيات موسيقيه مشتركه، وبعدين بدانا نفكر ان احنا عايزين نلعب مزيكا مع بعض من 2012، بس خدنا وقت طويل عشان نقرر هنلعب نوع ايه من المزيكا، عشان كنا عايزين نقدم حاجه مختلفه".

اسم اقصي الوسط بيرمز لايه؟

يقول عمرو "اسم اقصي الوسط، يعني اكتر حاجه في النص، يعني مش سلبي مش ايجابي، مش خير مش شر، مش اسود مش ابيض، هو الوسط اللي في اختيارات كتير".

اغانيكم بتعتمد علي الـ fusion.. ليه اختارتم النوعيه دي تحديدا؟

يقول عمرو "عشان مش حابين نقيد نفسنا، بنلعب المزيكا اللي حاسينها، واذواقنا المختلفه ساعدتنا اننا نبقي مطلعيين علي حاجات اكتر في المزيكا، وده كان سبب ان احنا لحد دلوقتي مش قادرين نحدد احنا بنلعب genre ايه، بس احنا اقرب لـexperimental، لان احنا علي طول بنجرب حاجات جديده".

ليه اغانيكم لها اكثر من توزيع موسيقي علي شبكه الانترنت؟

يقول عمرو "موجوده بنسختين، وقريب هتبقي بثلاثه واربعه، احنا بنحب نلعب مزيكا حتي في الحفلات كل مره بننزل بتوزيعات مختلفه، وبنجرب حاجات جديده مش بنحب نتقيد بقالب معين."

احكوا لنا عن تجربه مشاركتم في الفيلم السينمائي القصير "ضي"؟

تقول تقي "بيتر عزيز، مخرج الفيلم، اختارني لدور ضي، واخدت عليه جائزه احسن ممثله، وده كان بمثابه باب جديد لفرص وتجارب جديده، بس كانت تجربه مثمره، وخدنا خبره في مجال جديد، عمرو كمان عنده مشروعه الخاص بيعمل soundtracks، لافلام ومسرحيات".

ليه الموسيقي المستقله مش واخده حقها زي الاغاني التجاريه؟ هل العيب في عدم وجود شركات الانتاج، ولا الجمهور مش متعود علي الاغاني المختلفه؟

يقول عمرو "هو مش عيب، بالعكس، احنا شايفيين انها ميزه عشان مفيش حد بيقولنا نعمل ايه او ما نعملش في صناعه الاغاني، احنا بنعمل اللي شايفينه مناسب من غير تدخل من شركه انتاج، عشان بيكون هدفها انها تبيع اكتر او بيتطلب مثلا ان احنا نتبع الاسلوب الدارج في اللي الناس بتسمعه، ومعظم اللي بيلعبوا مزيكا مستقله بيلعبوا اللي بيحبوه، ولو محظوظين كفايه الناس بتحبهم كمان."

وتضيف تقي "احنا كمستقليين بنحاول نبقي حذرين في اختيارتنا عشان ما نبقاش بنقدم حاجه مبتذله او نبقي مع الموجه وخلاص، فبنحاول نعمل شويه توازن في الاغاني اللي بنعملها، ودلوقتي معظم جيلنا بقي متفتح اكتر، ومتقبل انواع كتيره من الفن، وبيخلي عندنا مساحه نعمل اللي بنحبه."

احكوا لنا عن اجواء واصداء حفلتكم الاخيره في Cairo Jazz Club؟

يقول عمرو "كانت تجربه لطيفه فعلا، هو مش الجو اللي احنا كاقصي الوسط متعودين عليه، بس احنا اتبسطنا واخدنا خبره من المكان، ودي لوحدها كفايه، واهم حاجه بالنسبه لنا، بس الجو العام كان حلو، واكيد نحب اننا نلعب مزيكا هناك تاني."

في اخبار عن البوم او اغاني جديده؟