إحنا اللى خرمنا التعريفة!!

< وزير الداخليه الاسبق حبيب العادلي غادر السجن الي منزله.. حمــد الله ع السلامه يا ثوره!!

< مصر شاركت العالم في حمله «ساعه الأرض» تحت شعار «مش عايزينها تبقي ضلمه»!!

< وزير التربيه والكشكول محب الرافعي هدد باحاله اي مدرس يحمل العصا للتحقيق علي طريقه «العصا لمن عصي»!!

< بعد ازمه زيت الطعام في البطاقة الذكية.. وزير التموين والعيش الحاف خالد حنفي هيرفع طاوله «زيتنا في دقيقنا»!!

< المشاجرات في الجامعات الخاصه بقت بـ «الرصاص» وفي الجامعات الحكوميه بـ «المولوتوف»  بصراحه هوه ده التعليم ولا بلااااش!!

< الجامعه السويسريه تعمل في مصر بدون ترخيص.. اللي نعرفه ان وزارة التعليم العالي عندها ساعه سويسريه.. ساعه تروح وساعه تيجي!!

< منظومه التعليم فى مصر تنحصر في ثلاث وزارات.. تعليم عادي وتعليم عالي وتعليم فني.. والرابعه «تعليم خصوصي» بحبه البركه!!

< ارفعوا ايدكم عن محافظ الاسكندريه «التاتو».. فالرجل يعمل في صمت امريكاني.. وسمع هُس  يا ملواني!!

<  محافظ القاهره جلال السعيد  يعيش في كوكب تاني.. غير العاصمه!!

< الراقصه سما المصري هتعتزل الفن نهائياً في حاله فوزها في البرلمان القادم علي خُطي «يا داخله من باب البرلمان وعلي كل خد عليه خوجه»!!

< وزير المالية هاني قدري الزم الشعب بدفع فاتوره الاصلاحات الاقتصاديه.. وبرضه كده كده الغلابه همّ اللي بيدفعوا فاتوره الفقر!!

< علي راي الدكتور محمد عبد المقصود منسق مشروع تطوير المواقع الاثريه: لحين تطبيق قانون حمايه الاثار «موووت يا حمار»!!

<  الاعلامي «عوكشه اللوكشه» كل تحليلاته عن المشهد المصري علي طريقه «خالف تُعرف.. تجعر تجيب جمهور»!!

< وزاره الكهرباء استوردت 10 ملايين «عداد ذكي».. وبرضه الفواتير هتبقي «مولعه» والنور «مطفي ع السهاري»!!

< بالمناسبه.. فواتير الكهرباء بقت «مولعه» وفواتير الغاز بقت «نار» وانابيب البوتاجاز بقت بـ «ضرب النار» والغلابه مولعين في «محرقه الغلاء»!!

< ع الموسيقي.. اغنيه الغلابه في مصر: «احنا اللي خرمنا التعريفه.. وتعبنا من اكل الفول م السريحه».. واييييييه!!

< درس مبارك لاخوان الارهابيه: «الوطن ليس حفنه من التراب بل ولاء وانتماء».. سامعين يا اخوان الشماريخ والمولوتوف؟!!

< رجل المهام الشاقه اسامه بدير مدير امن القاهره لا تنقص جولاته المفاجئه سوي «سري للغايه»!!

< الاعلامي خالد صلاح رفض الاعتذار عن حواره مع احمد عز القيادي في الحزب المنحل.. معلهش هتنزل المره دي!!

< علي راي الفنانه هاله فاخر: «الرجل مُتاح له ان يخاف في حالتين.. من زوجته ومن امن الدوله»!!

< الفنانه فيفي عبده بلاش تداعب احلام الغلابه بـ «النقاب» علشان تحت «النقاب» عيون جريئه.. وخمسه موووواه!!

< ابراهيم سعيد لاعب المنتخب المصري السابق بيرقص مع النجوم وبيلعب بالفلوس لعب.. وارزاق يا كوووره!!

< بعد تكييف غرف الحجز في اقسام الشرطه.. اصبح المتهـم بـريئاً حتي «يتظبط» تكييفه !!

< المصريون ينفقون 800 مليون جنيه سنوياً علي المنشطات الجنسيه.. ولسه بنشاهد كل ليله كوابيس فيلم «النوم في العسل»!!