نص التحقيقات فى "تخابر مرسى مع قطر".. المضيف محمد الكيلانى: أحمد على مسئول "منصة رابعة" طلب منى نقل مستندات مهربة من الرئاسة إلى قطر.. ويؤكد: الحقيبة حوت تقارير مرفوعة من الجيش والمخابرات لـ"مرسى"

تواصل "اليوم السابع" نشر نص تحقيقات نيابه أمن الدولة العليا، برئاسه المستشار تامر الفرجاني، المحامي العام الاول للنيابه مع المتهمين في القضيه المعروفه اعلاميًا بـ"التخابر مع قطر" المتهم فيها الرئيس المعزول محمد مرسى و10 اخرين.

وفي حلقه اليوم ننشر نص التحقيقات مع المتهم محمد عادل حامد الكيلاني، "مضيف جوي"، والذي اعترف بمشاركته في اعتصام رابعه وتقديم مبالغ للمتهم احمد علي عفيفي لشراء مستلزمات واطعمه للمعتصمين، وانه وافق علي طلب احمد علي بنقل حقائب المستندات المهربه من رئاسه الجمهوريه، وتحتوي علي ملفات تتعلق بالامن القومي.

وفي بدايه التحقيقات مع المتهم سـالته النيابه: ما اسمك؟

فاجاب: محمد عادل حامد الكيلاني 42 سنه مضيف جوي بشركه مصر للطيران.

ج: في البدايه عايز اقول اني من مواليد مصر الجديده وتربيت وسط اسره ميسوره وتخرجت في كليه الاداب قسم فلسفه جامعه عين شمس، وعملت بدايه من 1996 مضيفا بشركه مصر للطيران، وتزوجت وربنا رزقني باولاد وبنات وطول حياتي منتظم في شغلي لحد ما وصلت امين صندوق وعضو مجلس اداره رابطه الضيافه الجويه المصريه، وده منصب بالانتخاب ومن خلال المنصب اتفاوض مع شركه مصر للطيران ووزير الطيران علي حقوق العاملين في الضيافه ولوائحهم الماليه والاداريه، اضافه لتفاوضي مع اي شركه او مؤسسه تقدم خدمات لاعضاء الصندوق من المضيفين زي خدمات العقارات والاراضي باسعار مخفضه، اضافه للخدمات الصحيه والمعيشيه بصفه عامه، وديه كانت كل اهتماماتي قبل ثوره يناير اللي بعدها زي معظم المصريين ابتديت اهتم بالسياسه عن طريق متابعه الاخبار والاحداث في البلد وابتدي يتشكل عندي راي مؤيد الي حد كبير لجماعه الاخوان، لاني كنت شايف فيهم امكانيه تقديم وتطبيق النموذج التركي واديت صوتي في المرحلتين للدكتور محمد مرسي، وبعدها فضلت متابع اداءه واداء جماعه الاخوان، وكنت شايف زي كل الناس ان فيه مشاكل في فتره حكمهم كان راي انهم كجماعه وكفصيل سياسي لازم ياخدوا فرصتهم كامله زي ما الدستور والقانون بيقولوا، وعلشان كده وقت احداث 30/6/2013 شاركت في اعتصام رابعه، وكنت بتردد عليه كتير في الايام اللي مش بيكون عندي فيها رحلات.

وخلال الاعتصام سالت عبر المنصه عن اللي مسئول عن افطار الصائمين فقالولي انه احمد علي عفيفي مسئول المنصه ايضًا وقدرت اوصل ليه لانه كان معروفًا جدًا في الاعتصام، وقلت له اني عايز اشارك في وجبات الافطار فقال لي اني ممكن اديله اي مبلغ يقدر يساعد بيه وفعلًا اديت له 700 جنيه وخدت رقم تليفونه وابتديت اقابله كتير في الاعتصام، وكنا بنتكلم مع بعض في كل حاجه، وقال لي انه عضو في مجلس امناء الثوره اللي يتراسه صفوت حجازي وعلاقته قويه جدًا بقيادات الاخوان وان اولاد الدكتور البلتاجي واولاد حسن مالك اصحابه، وان والده اصلًا قيادي كبير في الاخوان وفضلت علاقتي مستمره معاه، وبعد فض اعتصام رابعه بفتره بسيطه عرفت منه انه مش قاعد في بيته وبياجر شقق مفروشه علشان يسكن فيها بعيدًا عن الملاحقات الامنيه علي اعتبار انه كان معروفا كمسئول في اعتصام رابعه وقابلته في شقه في الدور الاول فوق الارضي باحدي عمارات الصف الثاني قدام جامعه 6 اكتوبر وتكلمنا عن احواله لانها كانت صعبه جدًا وفي مره قال لي ان الشقه دي هي ثالث شقه يقعد فيها في 6 اكتوبر، وكان ماجر قبلها شقتين لكن الامن عرف مكانهم معرفش من مين وانه كل فتره بيغير محل اقامته بسبب الملاحقات، وبمرور الوقت علاقتي باحمد علي عفيفي كانت بتقوي لدرجه انه في مره وقت حظر التجوال كان موجودا في مدينه نصر، حيث بيتي اللي انا اتجوزت فيه بعد لما سبت بيت اهلي في مصر الجديده، وطلب مني انه يبات عندي بسبب الحظر وفعلًا جالي وبيته في البيت وتاني يوم رجع الشقه اللي في اكتوبر وفضلنا علي تواصل وكنت كل فتره باروح له اقعد معاه في قهوه في 6 اكتوبر مش متذكر اسمها لكن هي معروفه جدًا، وكنت باشوف معاه ناس كتير كلهم معاهم لاب توبات وقاعدين شغالين عليها وهو فهمني انهم بيجمعوا صور مظاهرات الاخوان وتعديات الشرطه، وبيعملوا حلقات صغيره لجمع اراء الناس ويبعتوها لقناه الجزيره وساعتها عرفني علي بنت اسمها هبه غريب، شغاله معاهم في جمع الصور والفيديوهات لارسالها للجزيره كانت شغلها في جريده مؤيده للانقلاب وكانت هبه كل ما تودي لرئيس التحرير صور مظاهرات للاخوان او انتهاكات للشرطه يرفض عرضها، ومن فتره احمد علي خطب هبه وعزمني علي حفله كانوا عاملينها في بيت اهلها، لكن مقدرتش اروح لاني عندي شغل، وبصفه عامه هبه غريب هي الوحيده اللي يعتبر عرفتها من الناس اللي كانوا بيشتغلوا مع احمد في ارسال الفيديوهات لقناه الجزيره، اما باقي المجموعه فانا اعرفهم كاشكال لاني لما كنت باقعد مع احمد علي هما كانوا مشغولين في شغلهم، خصوصًا ان احمد قال لي انهم طول النهار بيصوروا في اماكن مختلفه وبيجيوا ع القهوه ديه بالليل يمنتجوا الصور والفيديوهات ويبعتوها عن طريق الانترنت لاداره قناه الجزيره، ومن حوالي شهرين او اكثر بحاجه بسيطه احمد علي كلمني علي الموبايل وانا في البيت حوالي الساعه 5 تقريبًا، وطلب مني اني اْعدي علي واحد في حلوان مع المعادي واخبره علشان حيجيب حاجه من حلوان، وبعد كده نقابل احمد علي في اكتوبر وفعلًا وافقت وطلعت علي المعادي وبعدها كان احمد علي اداني رقم الراجل اللي هقابله في المعادي، وقال لي ان اسمه علاء عمر ونزلت من بيتنا وقتها حوالي الساعه 8 تقريبًا وركبت عربيتي وطلعت علي المعادي بعد لما كلمت علاء ونسقت معاه الميعاد، والمكان اللي هنتقابل فيه واتفقنا اننا هنتقابل عند مدخل مدينه صقر قريش علي اوتوستراد المعادي تحت كوبري المشاه بعد ساعه من مكالمتنا واتجهت الي هناك لكن علاء اتاخر ساعتين وجت معاه واحده اسمها اسماء، وقال انه تاخر عشان راح حلوان وجاب اسماء بالشنطه اللي احمد علي عايزها ووقتها عرفت ان الحاجه اللي احمد كان عايزني اوصلها له هي الشنطه دي.. بعد كده علي القهوه وقابلنا احمد وكان معاه الناس اللي بيرسلوا الفيديوهات للجزيره واحمد ركب معايا العربيه انا وعلاء واسماء وطلعنا علي بيت واحد ساكن في اكتوبر لكن مش متذكر اسم المنطقه لان احمد هو اللي كان بيوصف لي الطريق ولما وصلنا احنا الاربعه البيت احمد علي عرفني علي صاحبه خالد حمدي وطلعنا انا وخالد بلديات من الغربيه فقلق مني جامد لان ابن عمي كان بينزل الانتخابات تبع الحزب الوطني، واخذ احمد علي ودخلوا الاوضه واحمد طمنه، وقاله انه مؤيد لشرعيه مرسي، وساعتها فيه واحد كمان جالنا علي شقه خالد مش متذكر اسمه لكن متذكر شكله كويس هو طويل وعريض وبشرته قمحيه وشعره خفيف وسنه تقريبًا اربعين او خمسه واربعين وهنا فتحنا الشنطه واتفرجنا علي المستندات اللي فيها وساعتها انا مكنتش مهتم ايه اللي فيها لاني كنت تعبان جدًا وعايز اروح وشوفت شويه ورق عن القوات المسلحه وخطابات من رئاسه الجمهوريه وملفات تانيه كتير وبعد كده احمد علي قال لي انه عايزني اخلي الشنطه دي معايا لانه ممكن يتمسك في اي لحظه والمستندات تتمسك معاه فانا قلت له اني موافق، وهو قال لي ان الوقت تاخر وخطر جدًا تمشي بالشنطه فتعالي ريح في البيت عنده في اكتوبر وخد معاك علاء ووصل اسماء لبيت صاحبتها في اكتوبر، عقبال ما هو يخلص قعدته مع خالد والراجل اللي كان معاهم وفعلًا نزلت وصلت اسماء في طريقي وطلعت انا وعلاء علي شقه احمد علي وريحت شويه في الاوضه وعلاء فضل صاحي وبعد حوالي ساعتين تقريبًا احمد علي كلمني، وقال لي اروح اجيبه من عند خالد لانه مش هيقدر يركب تاكسي بالشنطه، وفعلًا روحت جبته ومعايا علاء لان انا مكنتش حفظت طريق البيت وكان علاء عارفه كويس وبعد لما جبنا احمد بالشنطه قال لي ابات معاه علشان مروحش ومعايا الشنطه في الوقت المتاخر وفعلًا نمت عنده انا وعلاء وعرفت من كلامي مع علاء انه فلسطيني ومعاه جواز سفر اردني ومسموح له بدخول دول كتير جدًا من غير تاشيرات وعرفت كمان انه بيشتغل صحفي مع قناه الجزيره وبيسافر قطر كتير وانه تقريبًا بيدرس في الاسكندريه، وانه من المنتمين لجماعه الاخوان ولما سالته عن اسماء اللي كانت معانا في العربيه قال لي انها شغاله صحفيه في شبكه رصد، وتاني يوم الصبح ع الساعه 7 تقريبًا اخدت الشنطه وطلعت علي بيتي في مدينه نصر وسبت الشنطه في العربيه بعد لما ركنتها في الجراج اللي في بدروم العماره وقفلت شنطه العربيه بالمفتاح وفضلت الشنطه علي الوضع ده حوالي خمسه ايام او اقل تقريبًا وكان احمد علي بيكلمني يطمن علي الشنطه لحد ما جه اخدها بعد الخمس ايام دول تقريبًا وفضلت الشنطه معاه حوالي اسبوع تقريبًا وبعدها جالي البيت بنفس التاكسي "هيونداي فيرنا " وعرفت ان السواق اسمه فتحي واداني الشنطه تاني وطلع قعد معايا شويه وقال لي اننا هنقعد قعده نرتب فيها شويه حاجات بخصوص المستندات اللي في الشنطه وهيكون معانا علاء لان المستندات اللي فيها مهمه جدًا وخارجه من مكتب رئيس الجمهوريه نفسه، لكن هو مقليش مين اللي قدر يخرجها وبعد ما نزل الفضول اخدني اكتر اني اعرف ايه الموجود في الشنطه بالظبط وفتحتها لقيت ملفات عن كل حاجه في مصر تقريبًا وتقارير من الجيش ومن المخابرات تسلم للسيد الرئيس نفسه، ومنها ثلاثه تقارير من المخابرات ومن الجيش ومن الرقابه الاداريه ووقتها ادركت اهميه الشنطه دي فعلًا وصدقت كلام احمد علي عن خطوره المستندات اللي فيها وسبتها في غرفه ونبهت علي مراتي ان الولاد ميقربوش منها خالص ونزلت روحت شغلي وبيت فيه ليله بعدها رجعت البيت واخدت الشنطه وودتها في بيت تاني بتاعي انا واخواتي وارثينه من والدتي وعاملينه مخزن وعنوانه 63 جسر السويس مدينه نصر، وبعد حوالي يومين احمد عفيفي كلمني علشان نتقابل في القهوه بتاعه 6 اكتوبر فرحت له بعد صلاه العشاء، وكان معاه علاء وابتدي احمد يقولي انه محتاجني بحكم شغلي في اني اسفر الشنطه دي لقطر مباشره او لقطر عن طريق تركيا، وقال لي ان علاء يقدر ينسق في قطر او تركيا مع ناس تستلم الشنطه دي ويسلموا المستندات اللي فيها لمسئولين قطريين بيشتغلوا في الجزيره علشان يستعملوا المستندات في فضح الانقلاب العسكري فانا قلت له انا ممكن نبعت صور الملفات دي عن طريق الايميل او الانترنت بشكل سهل جدًا، فقال لي ان المسئولين في قطر عايزين اصول الملفات، لكن هو مكنش بيحدد لي مين المسئولين بالضبط.

وفي نفس القعده دي احمد علي سالني عن طريقه يقدر بيها علاء لما يسافر قطر ينقله دولارات فانا قلت له ممكن يفتح حساب باسمه في اي بنك وعلاء يبعت له الفلوس علي الحساب ده، ولكن هو قال لي ان الموضوع ده هيكون صعب لانه لو فتح حساب باسمه الحساب هيتراقب فانا قلت له ممكن يفتح حساب باسمه في اي بنك بره مصر زي بنوك امريكا وانجلترا او سويسرا مثلاِ ويسحب من هناك فلوس بالعمله المصري لكن هو رفض وقال لي ان الفلوس بعمله الدولار تحديدًا لكن انا معرفتش ايه الحكمه من كده فهو استبعد موضوع الفلوس من كلامنا خالص وافقت معاه علي اني هاسفر المستندات اللي في الشنطه لقطر مباشره، وقلت له انه لما يرتب كل حاجه يبلغني علشان اظبط جدول رحلاتي واحدد فيه يوم لرحله متجهه لقطر فقال لي ان علاء هيسافر قطر خلال اليومين الجايين وهيرتب كل حاجه ويبلغني وفعلًا علاء سافر واحمد علي عفيفي كلمني بعدها بحوالي اربعه ايام وطلب يقابلني علي نفس القهوه في 6 اكتوبر فانا روحت له علي الساعه 8 بالليل تقريبًا، وكان معايا واحد زميلي مضيف اسمه تامر واتقابلنا مع احمد علي وهو اصلًا كان عارف تامر، لان تامر برده مؤيد للشرعيه، وكان بينزل معانا مظاهرات فاتكلمنا علي موضوع الشنطه قدامه عادي وكان ساعتها احمد علي عفيفي بيكلم علاء علي النت من علي التابلت بتاعه لانه كان ساعتها في قطر ووقتها احمد علي قال: ان علاء تكلم مع الشيخ حامد بن جاسم رئيس قناه الجزيره واتقابلوا مع ظابط مخابرات قطري واتفقوا ان علاء والظابط ده هيستقبلوني في السوق الحره بمطار الدوحه علشان اسلمهم المستندات وسالني ساعتها احمد علي عفيفي امتي اقدر اسافر الدوحه فقلت له هظبط الموضوع في جدول رحلات الشغل عندي وابلغك فقال لي ايه اكتر مبلغ ممكن تدخل بيه مصر وانت راجع من قطر قلت له اقصي حاجه زي ما القانون بيقول هي عشره الاف دولار، قال لي ان علاء هيديني المبلغ ده وانا في قطر واوصلهوله وهيديني جزء من الفلوس، وانا قلت له اني موافق اجيب له الفلوس لكن مش عايز اي حاجه منها واذا كانت هنقل المستندات دي فانا هنقلها علشان اساعد في نقل الحقائق وكل الناس تعرفها والكلام ده كله تامر كان سامعه ويشهد عليه.

وبعد كده رجعت بيتي بعد لما وصلت تامر بيتهم جنبي في مدينه نصر في شارع مصطفي النحاس المنطقه الثامنه وروحت تاني يوم شغلي عادي جدًا وبعدها بيومين احمد جالي البيت وقال لي اني احاول اظبط موضوع الرحله بتاعه قطر في اقرب وقت ممكن فانا قلت له اني ظبطتها خلاص تاني يوم ما اتقابلت معاه تقريبًا، لكن انا مش بتذكر تاريخ الرحله بتاعه قطر دي كانت امتي بالظبط وكل اللي فاكره انه كملني قبل ميعادها بيوم وقال لي ان الموضوع هيتاجل شويه عقبال ما الامور في قطر تترتب اكثر فانا كده كده كنت بدلت الرحله بتاعتي الاصليه وسافرت فعلًا علي الرحله المتجهه للدوحه في قطر ورجعت مصر في نفس اليوم وطول الفتره دي الشنطه كانت في الشقه التانيه اللي في مدينه نصر ومقابلتش احمد بعد كده غير مره واحده جالي فيها يزورني في البيت ويطمن علي الشنطه بس كانت صورته اتهزت قدامي خصوصًا بعد ما سالته امتي هتاخد فلوس قصاد المستندات دي فرد ان العمليه اصبحت مجرد بيزنس مع اني كنت متعاطف معاه جدًا لاني كنت شايف قد ايه بيحارب علشان قضيه مؤمن بيها لدرجه ان هو فعلًا قرر تغيير شكله تمامًا وعمل عمليه في بطنه علشان يخس جامد، وقال لي دي مخصوص علشان شكله ميتعرفش من الشرطه، كما صبغ شعره وطوله ومشفتش احمد ولا كلمته من ساعه المقابله دي الا قبل القبض عليا بعشره ايام وهوه اللي كلمني في التليفون وقال لي انه هيحتاج يسفر فلاشه الي قطر فانا مشغلتش بالي وقلت له طيب وبعدها قبضت الشرطه عليا وسلمتها الشنطه بالمستندات، وهي دي كل تفاصيل اللي حصل معايا لحد ما جيت النيابه.

س: هل لك ان تقرر لنا مضمون المستندات محتوي الحقيبه؟

ج: مستندات مختلفه واللي عرفته من احمد علي عفيفي انها خارجه من مكتب رئاسه الجمهوريه وقت حكم الدكتور محمد مرسي لما الاخوان حسوا انهم هينتهوا قبل احداث 30/6/2013 بتوقيت قليل واللي شوفته من المستندات ديه علي ما اتذكر تقارير مرفوعه من الجيش والمخابرات واجهزه الدوله المختلفه للرئيس محمد مرسي زي مثلا تقارير عن تسليح الجيش الاسرائيلي وعن امور متعلقه بالجيش المصري، ومن ابرز الحاجات اللي انا شوفتها واحمد علي وضحهالي ملف كبير الكلام اللي فيه مش بيتقرئ غير لما يتحط عليه بلاستكه شفافه معينه موجوده جوا الدوسيه ده وديه تقريبًا ابرز الحاجات اللي انا متذكرها حاليًا.

س- ماهو مضمون تلك المستندات؟

ج- هي مستندات اصليه مرفوعه من كل جهات الدوله زي المخابرات العامه والجيش والرقابه الاداريه والامن الوطني لرئيس الجمهوريه محمد مرسي، بالاضافه الي خطابات من سفارات مختلفه وسيديهات وفلاشات كمبيوتر.

س- ما هو ابرز ما لفت انتباهك بمحتوي المستندات؟

ج- اول حاجه شدتني تقرير المخابرات كانت عاملاه عن تسليح الجيش الاسرائيلي وقد ايه هو تسليح قوي جدا بالنسبه للمعدات وخصوصا الغواصات الالماني اللي عندهم والتقنيه العاليه اللي فيها بالرغم من قله عدد الجنود في اسرائيل بالاضافه الي سلاح الجو عندهم قوي جدا وامكانياته القتاليه عاليه جدااا.. وتاني ابرز حاجه شدتني هو ملف من القوات المسلحه مرفق فيه بلاستكه شفافه والكلام اللي جواه مش بيتقري غير لما البلاستكه تتحط عليه.. وثالث حاجه خطه كانت معموله لتامين الرئيس محمد مرسي وعائلته في احداث 30 يونيو وكان مضمونها خطه هروب له من قصر الاتحاديه لقصر القبه وبعدها مقر للحرس الجمهوري فالقاهره، وبعدها قصر راس التين في الاسكندريه ودي اكتر حاجه انا فاكرها.

س: ما علاقتك بالهاتف المحمول المعروض امامك الان وما بداخله من شريحه؟

ج: بتاعي هوه وشريحه فودافون وفيه كمان شريحه اتصالات.

س: ما علاقتك بالحقيبه المعروضه امامك الان وما تحويه من مستندات؟

ج: دي الحقيبه اللي كانت عندي في البيت اللي في الحي السويسري بمدينه نصر وفعلًا هي دي المستندات اللي كانت جواها، بالاضافه لمستندات تانيه متعلقه بالجيش الاسرائيلي والجيش المصري مش موجوده حاليًا في الشنطه ومعرفش هي راحت فين.

س: انت متهم بالانضمام الي جماعه اسست علي خلاف احكام القانون الغرض منها تعطيل العمل بالدستور والقوانين والاضرار بالوحده الوطنيه والسلام الاجتماعي والاعتداء علي الحقوق الشخصيه والحريات العامه للمواطنين وكان الارهاب من وسائلها في تحقيق تلك الاغراض المتقدمه؟

ج: انا عمري ما انضميت لاي جماعه او حزب.

س: كما انك متهم بالتخابر مع من يعملون لمصلحه دوله اجنبيه اضرارًا بالمصالح القوميه للبلاد؟

ج: اللي حصل انا قلته في التحقيق بالظبط.

س: كما انك متهم بالحصول علي مبالغ ماليه ممن يعملون لمصلحه دوله اجنبيه للاضرار بالمصالح القوميه للبلاد؟

ج: عمري ما اخدت فلوس من حد.

س: كما انك متهم بتسليم اسرار الدفاع العسكري الخاصه بمصر لمن يعملون لصالح دوله اجنبيه؟