ما هو الذكاء الاصطناعى Artificial Intelligence ؟

عشان فيه ناس كتير من اللي مش متخصصين و كمان من المتخصصين فاهمين الموضوع غلط .. الذكاء الصناعي هو ببساطه اننا بنخلي الكمبيوتر يفكر لوحده او ياخد قرار لوحده و الاكتر من كده انه يتعلم لوحده وده مش حلم او خيال علمي ده واقع موجود بالفعل و بيتطور كل يوم و اكتر مثإل ألالعاب اللي بتلعبوها كل يوم.

يعني مثلا نمسك لعبه PES او FIFA اللاعب اللي بيلعب في الفريق اللي قدامك متوقع انه متبرمج باللي بنسميه ال traditional Programming ؟ ان احنا بنديله كل امر المفروض يعمله ؟ بمعني لو راح يمين روحله يمين لو راح شمال روحله شمال لو جري اجري لو وقف اتزحلق و هكذا ..... ؟

الشركات لو هتعمل اللعبه كده هتقعد شغاله فيها اقل واجب بال 6 و ال 7 سنين والفكره ان برنامج اللاعب بيدخل علي training simulation الاول و بحددله goal انه مثلا يشوط الفاول و يجيبها في الجون وهو يتصرف انا مش بحددله الخطوات اللي هيمشي عليها هو يتصرف بطرق و الجوريزمات معينه خاصه بمجال ال Machine Learning المهم يحقق الهدف اللي انا طلبته منه باعلي دقه ممكنه بعد ما برنامج اللاعب يوصل لاعلي دقه بيدخلوه بقي في البرنامج الاساسي بتاع اللعبه و هكذا بقي قس علي ذلك كل برامج الذكاء الصناعي.

فيه هنا بقي سؤالين مهمين :

امتي ممكن نقيس مدي الذكاء لاي برنامج ؟ فيه حاجه اسمها Turing Test ابتكره واحد من اهم علماء ال Computer Science و هو Alan Turing ده عباره عن ايه ؟ انت عملت برنامج انت بتقول ان البرنامج ده خبير في نقطه معينه او مجال معين بيجيبوا البرنامج ده و علي الناحيه التانيه واحد بشري خبير في نفس المجال و الاتنين محجوبين ورا ستار و بييجي واحد خبير في ال Turing Test و يبتدي من خلال برنامج chat يسال ده سؤال و ده سؤال لو الخبير قدر يحدد ان اللي بيكلمه ده برنامج مش خبير بشري حقيقي يبقي البرنامج ده فشل في الاختبار.

السؤال التاني بقي و الاهم هل معني كده ان الكمبيوتر ذكي فعلا ؟ عشان نوصف المشكله دي نبتدي نتعرف علي ال Chinese Room Experiment الفيلسوف الامريكي John Searle طرح التجربه الفكريه دي عشان يتعرض لموضوع هل الكمبيوتر ليه وعي و عقل و لا لا.

التجربه دي عباره عن ايه؟

انت اكيد ما بتعرفش صيني صح؟ ما اعتقدش ان عندي حد في ال friends بيعرف صيني تخيل بقي انا جبتك و حبستك في اوضه و قفلت عليك من بره الاوضه دي كل اللي فيها عباره عن كتاب كتاب فيه شويه تعليمات لو مشيت عليها و نفذتها بالحرف هتقدر تترجم اي رساله من الصيني للانجليزي و ساعتها هتقدر تفهمها و لما تحب ترد عليها هتقدر من خلال نفس كتيب التعليمات انك تترجم الرد بتاعك من انجليزي لصيني دلوقتي جه واحد صيني واقف بره الاوضه و عاوز يسالك سؤال هيكتب سؤاله علي ورقه و يمررهالك من تحت عقب الباب هتاخد الورقه طبعا انت مش فاهم اي حاجه هتستخدم الكتيب عشان تترجمها و تفهمها و ترد عليها و هكذا و الرد هتبعتهوله من تحت الباب برضه.

الفكره بقي الراجل الصيني ما يعرفش اي حاجه من اللي بتحصل في الاوضه هيبقي ايه انطباعه عنك ؟ اكيد هيفهم ان الراجل اللي في الاوضه صيني زيه من جوده الرد و خلوه من الاخطاء اللغويه صح؟ بس هل ده معناه انك بتفهم صيني ؟

هي نفس الفكره انت كشخص بتستخدم برامج الذكاء الصناعي ما تعرفش اي حاجه عن اللي بتحصل جوه هيتهيالك ان الكمبيوتر ذكي جدا انه بيعرف يعمل الحاجات دي كلها لوحده من غير ما يتبرمج عليها بس الحقيقه انك لو عرفت التفاصيل اللي بتحصل جوه هتعرف ان الكمبيوتر ما بيفهمش اي حاجه من دي هو بي simulate ال human mind انما مش بيشتغل زيه فيه دلوقتي اتجاه انهم يعملوا simulation لل feelings بتاعه الانسان عشان الكمبيوتر يحس بس ده اللي هيبان للي ما يعرفش حاجه انما اللي في المجال و فاهم ايه اللي بيحصل هيفهم ان ده مجرد simulation.

انا بصراحه مش مع هوكينج في خوفه لا هو و لا ايلون ماسك هو الفكره انهم خايفين ان الذكاء الإصطناعي يتجاوز الذكاء البشري هو انا معاهم ان ده ممكن يحصل في يوم من الايام بس مش معاهم في خوفهم هما خايفين لكذا سبب.

اول حاجه خايفين ان ده يتسبب في القضاء علي البشريه زي ما بنشوف في الافلام وأنا مش معاهم في الخوف ده لان ده يتطلب ان الكمبيوتر يكون ليه Consciousness او وعي و ده مش موجود غير عندنا.

تاني حاجه انه ممكن يتسبب في القضاء علي وظائف و عماله الكمبيوتر هيحل محلها انا برضه ضد ده لو هتلاحظ ده الخوف الازلي من الميكنه اول ما الماكينات اتعملت الناس خافت تخسر وظايفها و مع ذلك طلعت وظايف جديده مكانها و سبنا المكن يعمل القديمه بدقه اعلي مننا و لما الكمبيوتر طلع ظهر نفس الخوف تاني و مع ذلك الحياه ماشيه زي الفل.

انا معاهم ان الذكاء الصناعي هيحل محل البشر في بعض الوظائف بس الحياه هتستمر زي ما هي و هيظهرلنا وظايف جديده مكانها ... من الاخر انا مش معاهم في الخوف.