تعرف على حيل سرقة السيارات الجديدة وكيفيه التغلب عليها

تعرف علي الحيل الجديده لسرقه السيارات وكيفيه التغلب عليها

هاتكلم النهارده علي الحيل والابتكارات الجديده في سرقه السيارات , وبعد كده ندخل في الطرق العاديه والتقليديه للسرقه

1- اول ماتدور موتور العربيه وقبل ما تيجي تتحرك بيها تسمع صوت معدني بيشخلل وبيتحرك علي الارض كان في حاجه مكسوره

الحقيقه ان بيكون السارق رابط قطعه معدنيه او ماسوره في العربيه من الخلف بحيث تتفاجا بيها وتنزل من العربيه تشوف فيه ايه فيدخل مكانك في غمضه عين ويسرق العربيه وهي دايره

الحل: اولاً ماتنزلش من العربيه ابدا تحت اي ظرف وانت سايب المفتاح جواها او وهي دايره, لا تقوللي هاجيب حاجه من كشك الحاجه الساقعه والعربيه قدامي اهي

ولا تقوللي المسافه قريبه وهاقدر الحق اي حاجه، الحرامي بيسرق في لحظه، وماتنساش ان دي مهنته وهو محترف فيها

ثانياً , الاصل في فن قياده السيارات انك تلف لفه كامله حوالين العربيه قبل ماتركب … مش هاتاخد منك ثواني , لكن خلالها هاتكتشف لو حد جرحهالك او اخدت خبطه وهي واقفه …

او لو فيه كاوتش نايم ,

او لو حد عامللك فيها مصيبه علشان يسرقك اول ماتتحرك ,

كمان علشان تتاكد ان مافيش شخص مسكين نايم جنبها ,

او قطه تكون داخله عند الكاوتش تتدفي وتنام في البرد

ثالثاً: لو حسيت بالخطر في حاله نزولك من العربيه استمر في السير بيها لاقرب مكان امن ممكن تنزل تشوف ايه اللي بيحصل (في حاله لو ماعملتش اولاً وثانياً ونسيت , عادي كلنا بننسي)

حيله الورقه اللي علي الزجاج الخلفي

اول ماتيجي تركب العربيه , وتتحرك بيها تلاقي ورقه علي الزجاج الخلفي مانعه للرؤيه … تيجي تنزل من العربيه تشيلها تلاقي الحرامي عمل معاك نفس اللي حصل في الحيله السابقه

الحل: نفس الحلول في الحيله السابقه

وانت ماشي بالعربيه تفاجا ببيضه نيئه اترمت علي الزجاج الامامي او الخلفي … غالباً بتكون معدي تحت

كوبري او فيه منطقه عاليه في الطريق

بالطبع انت هنا مش قدام طفل بيلعب بالحاجات اللي جوه تلاجه اهله … وبالتاكيد مافيش فرخه هاتطير علي ارتفاعات عاليه وكمان تبيض ..وبيضتها تقع فوق الزجاج الامامي لعربيتك !!!

اللي بيحصل هو ان الحرامي بيكون عامل عصابه .. عيل يرمي بيضه من مكان مرتفع علي الزجاج الامامي … تقوم انت تتخض قدام عنصر المفاجاه … وبيكون الحل هو انك تركن علي جنب علشان تمسح اثارها (حل سيئ) وده عز الطلب للحرامي اللي هايفاجئك علشان يسرق العربيه … او انك تشغل مياه المساحات علشان تمسحها وانت ماشي (حل اسوا ) … لان ساعتها الزجاج كله هايتحول الي بياض بيض ني والرؤيه هاتنعدم

الحل: استمر في القياده لحد اقرب مكان امن , وشيل اثار البيضه باستخدام فوطه جافه الاول بعد كده صابون علي طول … بس الاهم من كده انك تكون بعيد عن المكان ده تماماً وبعيد عن اي عربيه بدات تتبعك من مكان “قصف العربيه بالبيضه” !!!

4- حيله “التانك بيخر يا كابتن”

وانت ماشي في امان الله تلاقي واد راكب عجله او موتوسيكل يقوللك “الحق التانك بيخر يا كابتن” , طبعاً انت تتفزع وتحس ان فيه مصيبه حصلت … تقوم نازل جري تشوف فيه ايه … وده عز الطلب بالنسبه للحرامي لانك بقيت لقطه بالنسباله والعربيه دايره وانت براها

الحل: سيبك من الواد العبيط ده (مع اخذك في الاعتبار ان 20% ممكن يكون كلامه صح) … استمر في القياده …حتي لو التانك بيخر هاينزل قد ايه ؟؟ وهل فعلاً ظهرلك علي مؤشر البنزين انه بينقص بسرعه ؟؟ … في كلتا الحالتين استمر في القياده من غير اي نزول من السياره تماماً … وابقي ادخل محطه بنزين شوف الحكايه , ده لو كان بيخر فعلاً

5- حيله الطفل الرضيع اللي علي جنب

ماشي في حالك تلاقي عربيه طفل … او طفل رضيع … او عيل صغير بيعيط جوه سبت او كاريكوت او اي حاجه ممكن يتشال فيها عيل … تركن علي جنب (خصوصاً قلب البنات بيبقي حنين) يكون ده عز الطلب بالنسبه للحرامي

الحل: سيب اهل المنطقه هما اللي يتصرفوا … الحالات دي لو كانت صحيحه بتكون حالات انسانيه ولها مساءله قانونيه وافضل شئ يكون تحت ولايه امر حد في نفس المنطقه اللي هو مفقود فيها , ده لو كان فعلاً طفل مفقود او لقيط , اما في معظم الحالات بتكون مجرد فخ علشان الايقاع بالضحايا

وانت ماشي عادي بتلاقي واحد اترمي علي الارض وعمال يصرخ , انت ياعم خبطتني , مش تفتح , انتوا ماعندكوش قلب ولا رحمه , هو اكمني غلبان يعني ماليش ضهر ولا تمن في البلد دي …. الخ الخ

انت طبعاً بتكون سرحان , لانه بينقي ضحاياه من الناس السرحانه سواء في موبايل بيتكلم فيه او في البنت اللطيفه اللي قاعده جنبه او اشياء اخري كتير … بس انت كذلك متاكد انك ماخبطتهوش (ساعات هو بيروح يخبط نفسه في العربيه علشان تسمع صوت خبطه وتتخض) … طالما انت قدام ربنا واثق من نفسك انك ماخبطتش حد , (ماتعيشيليش بقي جو انا ماخبطتهوش وهو غرقان في دمه متكوم علي الارض وازاز عربيتك مكسور , احنا بنتكلم علي واحد بيتلكك علشان يفتعل معاك خناقه وينزلك من العربيه) , خد بعضك وامشي من سكات من غير قلق , وخليك بارد بشكل مستفز علي غير العاده علشان مايحاولش يغضبك وينزلك من عربيتك تضربه … ولو حصل بقي ونزلت من عربيتك (نسيت وكلنا بننسي) …قول له تعال علي القسم اعمللي محضر … ساعتها هايفلفص منك وابو رجل مسلوخه ده اللي كان مرمي علي الارض دلوقتي هاتشوفه طلع يجري ولا زعيم السنافر !!

واقف في اشاره , جالك شحات , وانت ماديتهوش حاجه , او اديتله مثلاً نص جنيه … هايقعد يبرطم ويقول كلام هرتله , وبعدين يتف عليك او علي العربيه (بيتعمد انها تكون علي وشك , اسف لو كلامي ده قرف بعض الناس لكن ده بيحصل)

الحل: تعال علي نفسك ونضف نفسك واحذر كل الحذر انك تنزل وراه تعمل اي حاجه …اوع ينزلك من عربيتك خصوصاً انك هاتكون في قمه الغضب وهاتسيب مفاتيح عربيتك في الكونتاكت … (ماينفعش هنا ننسي بالنسبه للناس اللي نسيت في الكام حيله اللي فاتوا) , وحافظ علي زجاج عربيتك مغلق قدر الامكان

8- الموتوسيكل اللي بيخبط في الشنطه

ماشي لا ليك ولا عليك … وفجاه تسمع طاخ بوم تش … موتوسيكل خبط عربيتك من ورا , هاتلاقي الواد اللي راكب الموتوسيكل زي ماهو مش هايقع ولا هايتعور , وكمان هاتلاقي ان وراه حد عمال يزعق ويتخانق , اوع تنزل وتسيب عربيتك وكمان مفاتيحك , نصيحتي ليك ماتنزلش خالص

ليه ؟ اول حاجه خبطه الموتوسيكل من ورا بتكون مؤثره في الاكصدام وده امره سهل .. تاني حاجه المضرور بجد هو اللي كان راكب موتوسيكل … تالت حاجه انت لو نزلت من عربيتك بيكون الموضوع عباره عن عصابه والمره دي مش بيتسحبوا …المره دي بيكون بالاكراه وعربيه تانيه قدامك بينزل منها ناس يتصرفوا معاك…رابع حاجه ماحدش هايخبطك من ورا ويكون هو الصح , القاعده المروريه بتقول بغض النظر عن طريقه التوقف المفاجئ واسبابه , القادم من الخلف هو المخطئ في حاله التصادم , يعني مايقعدش يبرطم يقوللك انت اللي وقفت مره واحده يا كابتشن والكلام الاهبل ده …

الحل: خد بعضك وامشي من غير كلام كتير , عيش الجو المصري بتاع الحمدلله جات سليمه واللي ييجي في الريش بقشيش وحمدالله علي سلامتك وتتعوض ان شاء الله , اكصدام العربيه حتي لو راح بالكامل “وده احتمال مستبعد” ارخص بكتير من تمن العربيه بحالها او الفديه بتاعتها لو هما خاطفينها مؤقتاً

ملحوظه : الحيله دي ممكن تتنفذ بعربيه قديمه , خصوصاً لادا القديمه او فيات 1300 او بيجو 504 … حاجه كده ماتتاثرش بالخبطات وتصليحها كلها علي بعضها بتلاته جنيه … هاتكون في مكان مش محتمل السرعه علشان تتخبط من ورا …خلي المنطق يشتغل

9- البنوته اللي مستنيه الاوتوبيس في حته مقطوعه

تيجي كده ماشي في طريق فاضي وفجاه , في حته مافيهاش مساكن ولا بيوت ولا شركات وتلاقي اللي واقفه كده لحالها , قال يعني مستنيه تاكسي او مواصله في المكان القاحل ده … طبعاً قلبك الحنين وشهامتك يبداوا ينقحوا عليك (قال يعني) .. وتركن علي جنب و “تترجاها” انك توصلها

الباقي معروف … هاتترجاها انها تاخد العربيه بس وتسيبك سليم !!

الحل: ماتركبش حد ماتعرفهوش , وخصوصاً في اوقات الليل او الاماكن الغير مسكونه , او في مكان مش منطقي تواجد حد قدامه يقف يستني مواصله

وماتقولليش ماهو شكله نضيف وابن ناس (كل الناس ولاد ناس, التعبير ده مش صح اصلاً من الاول) … او (هي بنت والوقفه كده خطر عليها) , لانها هاتكون خطر عليك انت نفسك بعد كده !!

ملحوظه: الحيله دي مش لسرقه السيارات فقط , دي مستعمله لتهريب المخدرات من الكمائن عن طريق شنطه البنوته اللطيفه اللي راكبه عربيتك دي !

10- الحقوني شاب اتحرش بيا

تلاقي واحده راكبه عربيه نص كم , وهي اصلاً ست او بنت نص كم … وفجاه تلاقيها عماله تسبل عيونها , وتديك كلاكسات , وتلاغيك … وطبعاً جينات الخيانه تبدا تشتغل جواك وتلعب الخمر براسك الاغبر … اول ماتيجي تتجاوب معاها هاتنزلك من عربيتك , وغيرك هايركبها تحت تهديد السلاح !!

وساعات يكون رد فعلها لما تبدا تتجاوب معاها انها تستغيث بالـ “ماره” اللي مش بيكونوا فعلاً ماره , بيكونوا جزء من العصابه في المكان الموعود , يتلموا عليك يرنوك علقه علشان عاكست سيده بريئه ماشيه في حالها , اه ياخلبوص !! …وتفوق من العلقه دي علي عربيتك ومحفظتك وموبايلك رايحين … بصراحه في الموقف ده انت تستاهل , علشان كده مش هاحط حل للحيله دي !!

ندخل بقي في الطرق التقليديه للسرقه اثناء تحرك العربيه

الطريقه الرئيسيه بتكون في مكان شبه هادي , فيه مطب والطريق مش عريض قوي…عربيه تظهرلك في المرايه , بتقرب منك بسرعه عند مكان المطب وانت بتهدي , تقفل عليك من قدام علي الشمال (لازم يكون علي الشمال) … ينزل منها اربع جتت طول بعرض معاهم اسلحه اليه (بتكون بالفعل متعمره مش لعب اطفال) … واحد منهم يفتح باب العربيه ينزلك , او يشاور عليك بالسلاح ويهددك لو كنت قافل السنترلوك علشان تفتحه , معظمنا شاف الفيديو الحزين بتاع سرقه عربيه علي طريق كورنيش شبرا , وفوجئ بسلبيه الناس اللي كانوا معديين

الحل: في الطريق اللي انت ماشي عليها خلي عينك علي الـ 3 مرايات , احفظ الناس اللي ماشيه حواليك وماتسيبش عربيه مشبوهه تجيلك من الشمال ابدا

خصوصاً لو قربت علي مطب , تجاوزها وتجاوز المطب بسرعه وتخلص منهم…

لو حصل وقفلوا عليك ماتتوقفش وادخل في وش عربيتهم (غالباً بتكون كيا سيراتو …ادخل ولا يهمك دي عربيه ورق) وانطلق بعيداً باقصي سرعه ,

ماتنزلش من عربيتك مهما كان التمن طول مانت قادر تتحرك بيها ,

اما للاسف لو فعلاً حصل ووقفوك وماكانش فيه مخرج بالعربيه ,

قدامك حل من اتنين :

يا تدافع عن مالك او اهلك لو راكبين معاك العربيه حتي لو هايقتلوك ,

وزي ما النبي عليه الصلاه والسلام قال من قتل دون ماله فهو شهيد . ومن قتل دون دينه فهو شهيد . ومن قتل دون دمه فهو شهيد ، ومن قتل دون اهله فهو شهيد

الراوي: سعيد بن زيد المحدث:الترمذي – المصدر: سنن الترمذي – الصفحه او الرقم: 1421

, او الحل التاني انك تنصرف من سكات وتديهم العربيه …

ساعتها هاينفعك جداً جهاز التحكم عن بعد وتتبع السياره (لو كنت مركبه) …ونصيحتي تستعمله بعد ربع ساعه , مايكونوش قريبين منك علشان ينتقموا منك لو وقفت العربيه عن بعد وانت لسه في متناول ايديهم

اما عن ازاي بيعرفوا يتصلوا بالضحايا يساوموهم علي عربياتهم ,

فللاسف هما بيعرفوا رقم تليفونك من المحضر اللي بلغت بيه عن سرقه عربيتك او رقم اي كارت ليك جوه العربيه !! ..