‫‫التصوير الفوتوغرافي 101 : العنصر الأهم في تحديد جودة الكاميرا (لأ مش الميجا بيكسل!)

‫زي ما وعدناكم في الحلقه الاولي عن اهم 5 مبادئ للتصوير الفوتوغرافي للمبتدئين ، اننا هنكمل ونحاول نخلق سلسله تحت عنوان “التصوير الفوتوغرافى 101″ لقواعد واساسيات التصوير والكاميرات بشكل عام. وحلقه النهارده عن العنصر الاهم في تحديد جوده الكاميرا والصوره بشكل عام ، وهيكلمنا عنه محمد حلمي ، مصور ومهتم بالفوتوغرافيا والسينماتوجرافي بشكل عام وصاحب صفحه Visuals علي الفيسبوك (اللينك بتاعها هتلاقيه في نهايه المقال).

“لما الميجابيكسل مش هو اهم حاجه…ايه بقي المهم اللي بياثر علي جوده الصوره؟”

خلينا في الاول نتفق علي كام حاجه:

“The most important part of a camera is the 12 inches behind it”

وطبعا انسل قصده هنا دماغ حضرتك اللي ورا الكاميرا .

“جوده التصوير”  هنا اقصد بيها خلو الصوره من العيوب التقنيه زي الSoftness والNoise

في ناس بتقول انه المعدات مهمه جدا وناس بتقول عكس كده تماماً، ده مش موضوعنا الرئيسي بس ببساطه انا مع الراي اللي بيقول ان لكل ظرف تصوير معدات كُفء تقدر تصور، ومادمت مش بتصور في حالات خاصه – تصوير رياضي او حركه سريعه او من مسافه بعيده او Astrophotography مثلا – فالمعدات اللي ممكن تادي الغرض وهو : “الصوره اللي توصل المعني”  بسيطه!.

الكاميرات اللي موجوده حالياً اكتر من الحلم!.

الناس زمان كانت بتصور من غير Autofocus وماكانوش بيشوفوا الصوره اللي صوروها الا بعد ما تتحمّض، الصور ايامنا دي تقريبا ببلاش زمان كان الواحد محدد بفيلم تمنه كذا وتحميض تمنه كذا قبل ما يشوف صوره اصلاً!.

نرجع للموضوع اصلا…ايه بقي اللي يقول ان الكاميرا دي احسن من غيرها مادام الميجابيكسل ده مجرد ابعاد الصوره مش جودتها؟

العوامل كتير بس حاجه مهمه منهم وهي الي هنتكلم عنها النهارده وهي :

السينسور هو مكان استقبال الصوره من المشهد اللي قصادك، وهو الباب اللي بتعدي منه وتبقي اشارات كهربا وDigital data وتتسجل، هو بديل الفيلم في الكاميرات القديمه

حجم السينسور،ونوعه،وكفائه معالجه البيانات اللي بيقراها،عناصر مهمه جداً في تحديد جوده الصوره!

ليه بقي الموبايل في الغالب بيصور صور وحشه جداً لو قارنته بكاميرا كبيره مع ان الموبايل ممكن يكون 16 ميجابيكسل والكاميرا تبقي 8 ميجا بس مثلا؟

الموضوع كله ان الكاميرا الديجيتال غالباً فيها سينسور حجمه اكبر بكتيييييييير من حجم السينسور اللي في الموبايل وده عامل مهم جداً!.

ايه بقي موضوع حجم السينسور وتاثيره ؟

الصوره اللي علي اليمين من تحت دي صوره للcamera module في الموبايل…اللي تحت دي مسطره وواضح الحجم وممكن تتخيلوا قد ايه

فوقيها صوره لسينسور موبايل عادي -علي اليمين فوق العمله- ومقارنه لحجمه مع سينسور موبايل نوكيا pureview -علي الشمال فوق العمله- اللي عمل ضجه اغلبنا سمع عنها عشان الكاميرا بتاعته كانت حلوه قوي مقارنه باي موبايل تاني…سبب رئيسي في ده انه كان حجم السينسور فيها اكبر من اي كاميرا موبايل تاني وقتها.(-العمله في حجم الجنيه المعدن بتاعنا تقريبا فممكن تتخيلوا الحجم برضه)

الصوره الكبيره اللي علي الشمال بقي دي مقارنه بين احجام السينسور لكاميرات من اجهزه مختلفه كاميرات وموبايلات -مافيش موبايلات من الفئه المتوسطه -زي اللي متوضح عند المسطره- عشان حجم السينسور في الغالب اصغر من انه يظهر بوضوح-

سينسور موبايل النوكيا pureview هو المسطيل الاصفر، نوكيا بعد كده صغرت الحجم شويه وفي بعض موديلات Lumia استخدمت الحجم اللي متوضح باللون الاخضر الفاتح.

اصغر 3 احجام دول احجام مشهوره قوي ومستخدمه كتير في اغلب موديلات الكاميرات الCompact اللي حجمها صغير ومش بيتغيرلها عدسات…وكمان الكاميرات اللي من فئه Bridge او Super-zoom اللي بيسموها في السوق المصري Semi-professional ودي تسميه خادعه للاسف!.

عشان كده سهل تلاقي موبايل بيصور زي الكاميرات دي لانه حجم السينسور بينهم متشابه.

الكاميرات الDSLR غالباً بتستخدم السينسور الAPS-C -تاني اكبر حجم في الصوره هنا-، والكاميرات اللي من فئه المحترفين بتستخدم الحجم الFull frame او يسمي 35mm وده كان حجم فريم الصوره الفعلي في الكاميرات الفيلم القديمه.

ليه بقي بقي حجم السينسور بيفرق في جوده الصوره؟

عشان السينسور ده عليه pixels فعلا وهي اجزاء حساسه للضوء فالصوره الديجيتال ماهي الا نقل للpixels من السينسور الفعلي اللي فوق ده

للملف اللي بيتخزن علي الذاكره في الكاميرا -اللي هو ملف ابعاده من طول وعرض بيقاس بالميجابيكسل- 

فلما يبقي حجم السينسور الفعلي كبير هيلقط الضوء بشكل اكتر فاعليه.

عشان كده لما تلاقي كاميرا DSLR فيها سينسور 8 ميجابيكسل مثلا وموبايل فيها كاميرا 8 ميجابيكسل

مطلوب من السينسور الكبير اللي في الكاميرا انه يطلع صوره بحجم ما السينسور الصغير مطلوب منه نفس الكلام

ولو عملنا حسبه بسيطه :

حجم البيكسل في الصوره النهائيه     /   حجم البيكسل الفعلي علي السينسور

نسبه التكبير دي كل ما تقل كل ما يقل احتمال ان الصوره يبقي فيها مشاكل زي الNoise او اللي بيقال عليها النغمشه “نقط ملونه في الصوره بتظهر خصوصا في الاضاءه الضعيفه” او الSoftness “الصوره تبقي تفاصيلها باهته ومشوهه”

كل اللي التكنولوجيا بتعمله هو محاوله تقليل المشاكل اللي بتحصل من نسبه التكبير دي باستخدام معالجات علي بيانات الصوره.

وعشان كده برضه هتلاقي ملاحظه غريبه…الكاميرات الديجيتال القديمه اللي كانت فيها سينسور بيطلع صور 3 او 4 ميجا بيكسل مثلا هتلاقي منها كاميرات بتصور بجوده احسن من كاميرات 12 او 16 ميجابيكسل من الموجوده حالياً! -مش كل الموديلات كده بس موجود وفي كاميرات قديمه غاليه حتي لو مستعمله للسبب ده- بس العيب فيها انه كانت التكنولوجيا قديمه شويه في باقي اجزاء الكاميرا زي الشاشه وسرعه معالجه الصوره فممكن تلاقي الكاميرا بتاخد 5 ثواني او كتير لحد ما تفتح وزيهم ما بين كل صوره وصوره!

حاجات مهمه كمان في السينسور غير حجمه هي جوده صناعته والمعالج الموجود معاه…شركات زي Sony و Fuji مشهورين بجوده عاليه في تصنيع السينسور ومعلومه كمان مش كتير عارفها انهم كمان بيعملوا سينسور لكاميرات شركات تاني زي سوني ما عملت سينسور لكاميرات كتير Nikon مثلا.