أحمد عفيفي يكتب: «حبيبي» ... العادلي!!!

قسما بالله احنا بقينا مسخره .. لسه قايم دلوقتي من جلسه نقاش حاميه مع زمايلي في الجريده هنا في الكويت وكلهم مصريين .. بسبب اللي قاله حبيب العادلي امبارح .. وكان السؤال : تفتكر حياخد براءه من قتل المتظاهرين؟ .. والاجابه من الجميع بما فيهم انا : طبعا .. براءه واعتذار كمان .. فعلٌق زميل : والله الراجل ده فعلا مظلوم .. وعلّق اخر : امبارح حبيب العادلي كان عالي اوي والقاضي اعطاه الفرصه كامله ليكشف كل الاوراق والحقائق .. وعلّق ثالث كان متغاظ جدا من التعليقين السابقين : العادلي امبارح كان ناقص يغني ظلموه .. والقاضي كانت الدمعه حتفر من عينه .. والعادلي بيترافع عن نفسه 3 ساعات .. كان ناقص هو نفسه " اي العادلي " يرفع الجلسه للاستراحه وكوبايه شاي وسيجارتين ويرجع يكمّل قصيده " مصر التي في خاطري وفي فمي احبها من كل روحي ودمي "!

دي التعليقات .. بس كلها صح وغلط .. لا اللي قال انه مظلوم صح وبرضه مش غلط ..ولا اللي اتريق عليه صح .. ولا غلط .. مش فزوره اصلها .. الحدوته يا ناس تتلخص في 18 يوم .. احنا بنحاكم مبارك والعادلي علي احداث حصلت في 18 يوم .. فقط لا غير .. مبارك متهم بالتحريض علي قتل المتظاهرين .. عندك اثبات ؟ هه .. بتقول ايه سعادتك ؟ يابني اسمعني : عندك دليل ؟ .. بصراحه لا .. وانا يعني كنت سمعته .. طيب العادلي هو اللي امر بقتل المتظاهرين .. عندك اثبات ؟ هه .. ياحبيبي اسمعني .. سمعته او شفته بعينك ؟ .. بصراحه لا .. خلاص يبقي مفيش قضيه .. براءه لمبارك وللعادلي!

لو ده حصل .. حد يقدر يلوم القاضي؟ .. طبعا لا .. والحقيقه .. الحقيقه .. لو احنا بنحاكم مبارك والعادلي علي القضيه دي بالتحديد ، لازم ياخدوا براءه .. واللي يعترض يبقي مبيفهمش .. لاننا بعد الاخوان مامسكوا الحكم ، عرفنا ايه اللي حصل في الـ 18 يوم .. بس المصيبه الحقيقيه ان احنا بنحاكمهم علي الـ 18 يوم .. مش علي الـ 30 سنه .. شفنا فيهم من مبارك ومن العادلي الذل والهوان وقله القيمه واتمسح بكرامتنا الارض .. 30 سنه .. لو فيه قانون في البلد بيحاكم علي افساد الحياه السياسيه والاقتصاديه والصحيه والتعليميه والهبابيه والملوخيه ووشك في الحيط وقفاك ليا .. لو فيه قانون في البلد بيحاكم علي الحاجات دي .. يبقي الحكم العادل علي مبارك الشنق .. ايوه الشنق .. يلبس كده زي الباشا البدله الحمرا ويتجر جر لحد غرفه الاعدام ونفسك في ايه قبل ماتموت .. وبلاش العادلي ياخد اعدام .. بس السجن مدي الحياه بصفته مسؤول عن قطاع الداخليه بس ، مش البلد ككل.

ده .. لو كانت الثوره فعلا مشيت لنهايه الطريق صح .. لكن لانها ثوره بدات كده وكده " جس نبض يعني " .. وبعدين اتقلبت فعلا ثوره شعبيه بنزول الناس المكوّيه كويّ .. فبقينا مش عارفين ايه الصح .. كنا متاكدين مليون في المائه ان مبارك هو اللي حرّض وامر بالقتل .. وان العادلي نفّذ .. كنا فاكرين كده .. مكناش لسه نعرف المخطط الاخواني القذر .. فالدنيا كانت اخر لخبطه .. لا انت عارف راسك من قفاك ولا مين مع مين ومين ضد مين .. فطبيعي وطبيعي جدا .. اذا كنت حتحاكم مبارك بتهمه التحريض .. طبيعي طبعا انه حيطلع منها براءه وكذلك " حبيبي" العادلي .. اذا كان المساعدين بتوعه السته اخدوا براءه في المحاكمه الاولي .. وهو اخد تابيده كمسؤوليه سياسيه عن اللي حصل .. بس ان كنت عايز الحق .. ياخد براءه .. مادام يا ابن الحلال بتحاكمه علي قضيه ، لو انت جدع وراضع من بز امك بجد تقدر تُدينه فيها.

عشان كده لا اللي شايف انه مظلوم غلطان .. ولا اللي شايف انه يستحق الحرق صح .. في القضيه دي بالذات .. انما لو حنحاكمه علي اللي عملته الشرطه في 30 سنه ، او علي الاقل في سنوات توليه الوزاره .. حنعدمه .. لو حاكمناه انه كان الكرباج بتاع مبارك اللي بيضرب به معارضيه حنشنقه .. لو حاكمناه انه كان بس وزير داخليه دوله مبارك ونظامه .. حنفرمه .. لكن مادام حتحاكمني بس علي قضيه فارغه انا فعلا بريء منها .. يبقي خد دي مني " ده العادلي اللي بيقول " : انا بقدم بلاغ دلوقتي وع الهواء للنائب العام ضد دومه وجميله اسماعيل وساميه جاهين بتهمه تخريب المنشئات اثناء الـ 18 يوم .. وبالمره بقي علاء الاسواني لانه كتب تويته بيتريق عليّا فيها وبيقول اني استحق جايزه نوبل .. وفي السكه برضه اقبضوا علي الواد احمد عفيفي اللي بيكتب دلوقتي المقال .. لانه وم الاخر كده مش عاجبه اللي بيحصل ولا مرافعتي ودفاعي عن نفسي امام المحكمه.