يا متعلمين يا بتوع المدارس

في اوروبا والدول المتقدمه اللي يشيل سلاح في اماكن عامه يتقتل في الحال ولا احد يتحدث عن حكوك الانسان، وفي قطر حبسوا الراجل الشاعر ابن الذيب علشان قصيده فيها ريحه هجوم علي الامير، حبسوه كام ياولاد 15 سنه بعد الرافه وكان محكوماً عليه بالسجن مدي الحياه، وبرضه محدش اتكلم عن حكوك الانسان وحرية الرأي، ولا قناه الجزيره جابت سيره

الموضوع، وفي امريكا عملوا حزق تجول وقفلوا الشوارع علشان يمسكوا العيال اللي فجروا سباق بوسطن، وحابسين الشيخ العجوز الضرير عمر عبدالرحمن من سنين وعندهم جوانتنامو، وبرضه محدش جاب سيره حكوك الانسان، طيب اشمعني مصر هي اللي عليها العين وكل ما حد من الاخوان يتزحلق وهو ماشي في مظاهره غير سلميه او اعتصام مسلح او يحرق قسم شرطه او يفجر عربيه او يقطع طريقاً او يعطل الدراسه في الجامعه كل الدنيا تقول لك سيبهم اوعي تكلمهم دي حريه وحكوك انسان، ولما فكرت الحكومه تطلع قانون ينظم التظاهر زي كل بلاد الدنيا قامت القيامه وارتعشت الايادي ولم يخرج القانون لتظل المظاهرات التخريبيه تبرطع في ارض مصر دون اي اخطار مسبق ودون موافقه رغم وجود قانون الطوارئ.

واللي زاد وغطي مظاهرات طلاب الاخوان المتعلمين بتوع المدارس في جامعات القاهره والزقازيق والازهر وخلي بنات جامعة الأزهر علي جنب وتعالي شوف عملوا ايه، وايه علاقه اللي عملوه بالسلميه؟.. وشوف طلاب القاهره والزقازيق عملوا ايه ومحدش قادر يعمل اي حاجه وهم يستخدمون السنج والمطاوي وميّه النار والشماريخ بمنتهي الفجر وقله الادب وبيتصوروا ويعملوا نفسهم ميتين ومتعورين عشان الجزيره تصورهم وتفضح مصر.

لازم نفوق بقي ونعرف ان المؤامره كبيره جداً وخطيره جداً ومش لازم نستني اكثر من كده لحد ما نلاقي البلد ضاعت ونص شعب مصر متعلق علي المشانق وأرض الوطن بتتشحت وبتتمزق وينعق فيها الغربان، هل نسيب شويه العيال دول ينفذوا مخطط التنظيم الدولي للاخوان الذي عقد اجتماعات مكثفه في لاهور وفي الدوحه وفي اسطنبول ورصد المليارات لاسقاط الدوله وهناوا انفسهم علي نجاح الخطه وارباك الجيش المصري واضعافه وتمزيق الشعب وشل الاقتصاد حتي يخرج الناس في ثوره جياع لا تبقي ولا تذر ماذا ننتظر لقد شوهوا كل شيء في الوطن حتي الحيطان لوثوها بكتاباتهم وعباراتهم البذيئه وخطهم العفش.

واصبحت مصر الان لا تستطيع ان تقول ان فيها حاجه حلوه مثلما تقول الفنانه ريهام عبدالحكيم في رائعه عمر خيرت.

ويبدو ان اخلاق الساده الاخوان نشرت الفساد ايضاً في الذوق العام والاخلاق، وكيف لا وهم من فتح السجون واطلق المساجين والبلطجيه يمرحون برعايه فائقه من الدوله، وهم من استاجروا اطفال الشوارع والمتسولين والبلطجيه للتظاهر والاعتصام والحشد، وايضاً هم مسئولون عن التدني البشع في لغه الحوار بين المصريين تسمع لغه حوار في الشارع وفي العمل وفي المدرسه والجامعه من عجائب الدنيا تقول معها يا بخت الاطرش، الي اي منحدر اخلاقي فظيع وصلنا لدرجه ان التحرش والمخدرات والسيوف والسنج وميّه النار اصبحت لغه التفاهم بين الناس والجيران، والدنيا بقت غوغائيه شديده جداً دوشه وزحام وكلاكسات وخناقات وشتيمه قليله الادب جداً تسمعها عادي خالص ولا بقي فيه حياء ولا دم ولا ادب، فقط عشوائيه وانحطاط في كل شيء.

هذا ما اتي به الاخوان شجعوا هذه الفوضي والعشوائيه وتبنوا البلطجه والبلطجيه وحيا مرسي ثقافه التوك توك والميكروباص، والشخرمون طاخ في الترالولي.\nوكثير جداً من مواقف الحياه اليوميه سباحه في الوحل بمجرد ان تنزل الي الشارع بسيارتك او بتاكسي او بالمواصلات العامة تسمع وتشاهد سيركاً منصوباً فيه كل فنون السباحه في الوحل، فمتي يا ربي تتخلص مصر من هذا الوحل، نحتاج ثوره ثقافيه واجتماعيه تغسل وجه مصر من هذا الوحل وتعيدنا الي ايام ما كان الناس مؤدبين ومحترمين، حتي البنات كانوا بيلبسوا «ميكروجيب» وما كنش فيه تحرش ولا معاكسات.. ايه اللي جري منكم لله يا اخوان.